XOVES 30 de XANEIRO do 2025

Outro xoves máis con todos vosoutros. A nosa sintonía serve para darlles a ben-vinda e saudarvos para ofrecervos unha primeira peza musical e aproveitar mentres tanto para conectar con Galicia e conectar con SOLE, Guía de Turismo en O BOLO. Coñecedora de moitas curiosidades e cousas interesantes daquela contorna, e moi especialmente do Santuario das Ermidas, que veñen de celebrar unha obra teatral que recuperaron este mesmo ano precisamente o día de Reis. Unha compañía de teatro de Ourense foi a que se encargou da súa interpretación, cos textos que recolleron dos veciños. Fálanos das moitas posibilidades das que se pode disfrutar, da fermosa paisaxe, dos sendeiros que están a recuperar, do enoturismo e do patrimonio cultural moi abondoso. Agradecémoslle a súa amable atención.

Aproveitamos estes minutiños para informar da próxima celebración do "XXI FESTIVAL DEL BOTILLO-2025", que organiza a Asociación de Bercianos en Cataluña (ASOBEAT), previsto para o día 16 de febreiro a partir das 12h, no Hotel Front Air Congress de Sant Boi. Temos previsto entrevistar a unha das familiares das "Bercianas ilustres, a título póstumo" deste ano, que son dona Aurora Rodríguez e dona Silvia Nogaledo (tristemente asesinadas). No apartado de Premio Literario Asobecat-2025, concederáselle a don Miguel Angel Revilla, e o Concello homenaxeado será Camponaraya. A Adega que regará os produtos servidos no xantar é "Cuatro Pasos". Agradecémoslle a Juan Pedro, o Presidente de ASOBECAT, a súa participación e información precisa.

A segunda convidada é MARTA DELGADO GONZÁLEZ, de GROU, grande traballadora e recuperadora da tradición e moi especialmente do "Entroido de Lobios", moi representado polos "Follateiros" que ela mesmo axuda a confeccionar e precisamente veñen de facer unha intervención no Museo do Entroido en Xinzo da Limia, para poñer en valor esa faceta popular tan interesante. Fálanos dos moitos e interesantes aspectos que se poden disfrutar naquela contorna do Xurés e do seu entorno, inclída a "Raia" con Portugal e o Castro Leboreiro. A paisaxe, a fauna a flora, incluído o Lirio do Xurés (planta endémica única naquela zona). Agradecémoslle a súa participación no programa de hoxe.

A segunda hora comezámola conectando co noso correspondente, XOSÉ MANUEL F. MONTES,  na capital da Ribeira Sacra, Monforte de Lemos. Encargado da sección:  QUEN CHE PREGUNTOU?, que xa sabedes está dividida en tres sub-seccións precedidas dunha musiquiña. Despide a súa intervención coa participación dun convidado que aporta a súa suxerencia sobre unha frase popular interesante. Agradecémoslle a súa aportación tan interesante.

Despois falamos con RUBÉN TROITIÑO, encargado da páxina musicasdaterrademontes. Un grande investigador e difusor dese traballo que recolle todo o relacionado cos músicos e todo o que rodea ese tema das Músicas das Terras de Montes. Fálanos de Avelino Cachafeiro e dos compoñentes do Grupo Musical "Gaiteiros de Soutelo de Montes". Ten a particularidade de que esta páxina está aberta a toda a participación dos interesados. Tamén nos comenta que recibiu recentemente unha documentación, que ao parecer corresponde á letra da peza musical "A Muiñeira de Chantada". E despedímonos escoitando a mesma peza "Muiñeira de Chantada" interpretada por Ricardo Portela. ¡Que teñan unha feliz semana!

Deixamos aquí o programa completo-enteiro.

XOVES 23 de XANEIRO do 2025

Unha entrega máis do noso programa "Galegos no BAIX": dúas horas de Radio en galego, con novidades, música e entrevistas para dar a coñecer algo máis da nosa cultura, das "nosas cousas" e facervos partícipes do que seguro tamén participan os nosos oíntes e seguidores. Comezamos coa nosa sintonía de sempre, as salutacións e escoitamos, en primicia unha estrea, unha peza do CD recen publicado do Grupo Musical "A Banda da Loba", para darlle a ben-vinda a MARÍA XOSÉ PORTEIRO, a quen parabenizamos por ter acadado o "III PREMIO MUNDIARIO DE PERIODISMO". Coméntanos as súas impresións relacionadas con ese galardón e agradecémoslle a súa amable atención, desexándolle que siga colleitando moitos éxitos.

A seguinte convidada é XIANA LASTRA, do Grupo Musical "A BANDA DA LOBA", que acaban de publicar o seu último CD: "LOVISMO". Recibímola escoitando unha das pezas dese disco, que estreamos en directo para tódolos nosos oíntes e seguidores. Parabenizámola e enviámoslle os mesmos desexos para todas, e moi especialmente para a que se estrea como "mai". Terán a presentación oficial deste traballo o próximo día un de febreiro na Sala Capitol, acompañadas de varios artistas que participan con elas no disco e que ofrecerán un concerto cheo de sorpresas. Desexámoslle moitos éxitos e agradecémoslle que sempre nos reciban con tanto agarimo para poder informar aos nosos oíntes e seguidores.

Continuamos o programa conectando con ADOLFO (Fito para os amigos e máis achegados) F. Dafonte, grande escultor-artista e especialista con barro. Explícanos a súa técnica ancestral que consiste nun cocido moi antergo con excrementos de cabra e ovella, que ten moi documentado e investigado (e que continúa a investigar). As súas figuras teñen un acabado moi característico que lle-lo confire esa técnica de cocido durante moitas horas. Ten feito moitas exposicións e tamén ten recibido agasallos e premios de certa relevancia polos seus traballos. Agradecémoslle a súa participación de hoxe no noso programa.

Escoitamos outra peza de música e voltamos a Galicia, para conectar con ZE PAREDES, Actor Teatral, Artista e Escritor responsable do texto da obra que se estrenou esoutro día en Arteixo: "Territorios de Liberdade". Unha obra dirixida por Quico Cadaval, coproducción do Centro Dramático Galego, Companhia Certa de Varzim e Tanxarina Títeres. Tamén se representou en Matosinhos e Povoa de Varzim. Coméntanos que ese traballo ten moito a ver coa recreación e unha revisión histórica do 25 de abril, a revoluaçao dos cravos. Agradecémoslle a súa atención e desexamos que teñan moitos éxitos.

Despois de escoitar outro bocadiño de música, poñemonos en contacto con XOSÉ MANUEL SENDÍN, de montesparanhos.com, que nos pon ao corrente da grande tarefa que están a realizar en Covelo, para dar a coñecer moitas das cousas que se realizaban naquela contorna, e moi concretamente o asunto da cera: Centro de interpretación da cera, obradoiro de cereiros, lagar da cera, a Ruta do Xabriña... Un lugar que paga a pena visitar pola súa riqueza etnográfica, paisaxística e natural. Desexamos que sigan acadando moitos éxitos nos proxectos que teñen en marcha. Escoitamos outro bocado de música e despedímonos ate o vindeiro xoves á mesma hora. ¡Que teñan unha feliz semana!

Deixamos aquí o programa completo-enteiro.

XOVES 16 de XANEIRO do 2025

Un xoves máis con todos vosoutros. Aledámonos da presencia nos estudios do noso compañeiro ARMANDO FERNÁNDEZ LÓPEZ, sinal de que xa está bastante recuperado e poderá acompañarnos en directo, como viña sendo habitual. Desexámoslle unha completa recuperación. Comezamos coa nosa sintonía de sempre. As salutacións e escoitamos unha peciña de música para poñernos en contacto co grande amigo MANUEL RIVERO PÉREZ, investigador, escritor e experimentado coñecedor da Baixa Limia. Felicitámoslle a aninovo e tamén o parabenizamos pola recente presentación do libro de Aurora Sampedro e, tamén pola próxima publicación doutro libro adicado a María das Dores Darribe Dopico, outra grande muller galega. Falamos un bocadiño das súas investigacións, do seu traballo recente e da súa teima por publicar a documentación do finado Xosé Lamela Bautista. Agradecémoslle a súa amable atención.

A segunda intervención é con "TATÁN CUNHA" Eduardo Alberto Rodríguez Cunha, de Tanxarina Títeres. Outro grande artista que nos comunica a próxima estrea da función "TERRITORIOS DE LIBERDADE", que se realizará o vindeiro 17 de xaneiro en Arteixo. Dirixida por Quico Cadaval e na que participarán a Companhia Portuguesa "Certa de Varazim Teatro" e "Tanxarina Títeres". Felicitámolo, pola parte que lle toca e tamén pola próxima estrea da película filmada na Illa de San Simón, na que el mesmo participa como actor en memoria de seu avó, segundo nos comenta. Precisamente lémbranos que recentemente foi recoñecida a Illa de San Simón como Lugar da Memoria Democrática, algo que viñan reclamando dende fai un tempo moitos colectivos galegos. Tamén nos fala da asistencia mañá mesmo na presentación do libro de Carlos Labraña: "A biblioteca galáctica contra a IA Fantástica". Desexamos que teñan moito éxito e comprometémonos para entrevistar a este escritor e poeta admirado.

Continuamos a segunda hora conectando co noso correspondente na Ribeira Sacra, XOSÉ MANUEL F. MONTES, encargado da sección "Quen che preguntou?", que está sub-dividida en tres seccións: "o bule-bulo" con seis noticias entre as que el nos propón adiviñar cal é a que pode ser mentira (bulo). A segunda "Que pasa, que pasa na Ribeira Sacra", unha rápida exposición de novidades da propia contorna e a terceira "sabedoría popular", retazos que ten recollidos na súa "libretiña pequena". Todo elo precedido dunha música axeitada e elixida por el mesmo, para darlle un toque persoal. E finaliza coa participación dun convidado que el mesmo escolle e proponlle que interveña. Nesta ocasión trátase de Rafa Aguiar. Agradecémoslle a fermosa crónica de hoxe.

Escoitamos unha peza de música (San Benitiño) do REAL CORO DE TOXOS E FROLES, de Ferrol, para recibir ao seu Presidente: ARTURO LAMAS BRAÑA. Felicitámolo porque próximamente celebrarán o cento dez aniversario da súa fundación e con tal motivo realizarán unha actuación no Teatro Jofre de Ferrol: "Festival 110 Anos Cantando", concretamente o día 25 de xaneiro próximo, no que contarán coa presencia do Presidente da Real Academia Galega, don Victor Friexanes e a participación do Grupo de Cantareiras da A.C. Xacarandaina, xunto co Grupo de Cantareiras "Gradaille" do Real Coro Toxos e Froles. Tivemos un pequeno atranco na comunicación e retomámola despois, pero para despedirnos escoitamos a peza "Alalá de Pantin" interpretada precisamente por Arturo. Desexámoslles moitos éxitos e voltaremos a conectar noutra ocasión con eles.

Despedímonos de tódolos nosos oíntes e seguidores ate o vindeiro xoves á mesma hora.

Deixamos aquí o programa completo-enteiro.

XOVES 9 de XANEIRO do 2025

Primeiro programa do ano. Comezamos coa nosa sintonía e as salutacións oportunas e despois de escoitar un bocadiño de música, poñémonos en contacto con Francisco Xabier Almuiña, da "Casa do Romualdo", unha Vivenda Rural chea de encanto. Mantemos unha conversa moi amena e chea de interesante comunicación. Fálanos de novidades relacionadas coa posibilidade de visitar e disfrutar de varias recomendacións sendeiristas "Ruta embelesadora". Unha casa que data do século XVI, na que se pode disfrutar dunha gastronomía familiar e de proximidade, nun ambiente rural cheo de curiosidades e algunha que outra sorpresa de agasallo para os que teñen a ben alugarse nesta Casa, na Ribeira Sacra. Desexámoslle que teña moito éxito nesa tarefa e agradecémoslle a súa amable atención.

A segunda intervención é con ALFONSO MIGUEL MARTÍN, de ASOBECAT (Asociación de Bercianos en Cataluña), que nos pon ao corrente da próxima realización da "Rolda de Prensa" prevista para o día 18 de xaneiro próximo, no Hotel Front Air de Sant Boi, onde se presentará a proposta do evento previsto para o mes de febreiro, concretamente o domingo día 16 o "XXI Festival del BOTILLO en Cataluña", no mesmo hotel antes mencionado. Coméntanos que na presentación daranse a coñecer os nomes dos Homenaxeados diste ano, a Adega Colaboradora, o Concello Berciano, Ilustres Bercianos e o Premio Literario 2025. Tamén nos fala do menú e outras cousas interesantes. Pronto voltaremos a comunicarnos con Alfonso ou con cualquera outro compoñente da Asociación para que nos informen do prezo e da forma de adquisición dos tiquets de participación. Desexamos que sigan tendo moito éxito.

Continuamos a nosa emisión poñéndonos en contacto con FRANCISCO LÓPEZ, "CHESQUI", do Partido Galeguista, que nos comenta a realización de varios actos moi importantes, en especial o que tivo lugar o día 7 de xaneiro pasado, na vila de Rianxo, para comemorar o 75 cabodano do falecemento de Alfonso Daniel Rodríguez Castelao. Aproveita para comentar algunhas das actuacións nas que estivo presente ae participou xunto con outras representacións políticas e institucionais. Este ano será o ano de Castelao e seguro ue teremos ocasión de poder comentar con el moitas das actuacións que teñen previsto realizarse. Agradecémoslle a súa participación neste primeiro programa do ano.

E finalizamos as entrevistas conectando con Galicia, outra vez. Primeiro escoitamos a voz de Iñaki Gabilondo, poñendo en valor a "verdade", a paz e tranquilidade que ofrece o "Hotel Literario Bela Fisterra". Precisamente co seu responsable: PEPE FORMOSO, é con quen mantemos unha pequena conversa-entrevista que nos enche de coñecemento e, de interesante comunicación sobre este establecemento que é un referente non só turístico senón tamén un lugar de aprendizaxe literario e lingüístico, xa que a súa biblioteca vai converténdose nun lugar de encontro e consulta de moitos intelectuais que escollen ese lugar para disfrutar dunha estancia inolvidable. Desexamos que siga colleitando moitos éxitos. E despedímonos ate o vindeiro xoves á mesma hora. ¡Que teñan unha feliz semana!

Deixamos aquí o programa enteiro-completo.