Voltamos a ofrecerlles unha nova entrega deste noso programiña en galego: "Galegos no BAIX". Coidamos que é un bocadiño de ledicia a comunicación no noso idioma para que tódolos nosos seguidores se sintan máis achegados ás "nosas cousas". Estamos moi ledos de poder ofrecerlles, cada semana esta horiña de radio entretida, e da que nos sentimos moi satisfeitos pola cantidade de correos e mensaxes que nos teñen enviado ao noso enderezo: "galegosnobaix@gmail.com". Xa lles contestamos a todos e temos unha lista que faremos pública denantes que remate esta tempada, para agasallar aquelas persoas que resulten do sorteo que teremos precisamente ese mesmo día 26 de xuño, data de remate. Terán como premio un reloxio marca "Adolfo Domínguez", tal e como lles tiñamos prometido.
Comezamos falando dalgunhas novidades que acontecen en Galicia e mencionamos a promesa de poder falar, no seu día, con Xan García, Secretario da Asociación NERIA - Costa da Morte, con quen xa mantivemos un primeiro e pequeno contacto a micro pechado, e prometeunos que en vindeiras datas manteremos unha entrevista-conversa sobre aquelas terras tan bravas e fermosas.
Hoxe non poderemos contactar co noso habitual correspondente en Monforte, Xosé Manuel F.Montes. En pago conectamos con Masito Beiró, un amigo e colaborador a quen sempre lle temos que agradecer a súa aportación e desinteresado ofrecemento cada vez que o chamamos. Aquí tedes a nosa conversa con Masito:
Escollemos unha peza de música do grupo: AIRA DA PEDRA, do Bierzo. E proseguimos o noso programiña conectando coas Rías Altas, coa Mariña Lucense, concretamente con PACO RIVAS, que se atopa en FOZ, e con quen mantemos unha conversa moi agradable e entretida, e como non podía ser menos despídenos coa declamación dun dos seus poemiñas engaiolantes.
A vindeira semana máis. Non vos esquezades de deixarnos e enviarnos as vosas mensaxes.
No hay comentarios:
Publicar un comentario