XOVES 21 de MAIO do 2026

Outro xoves con todos vosoutros. Comezamos coa nosa sintonía, as salutacións e un bocadiño de música para recibir ao primeiro convidado: MANUEL VÁZQUEZ OSORIO, Presidente do Centro Galego NÓS de Sabadell. Felicitámolo pola recente celebración da Letras Galegas a semana pasada. A continuación infórmanos da próxima celebración que vai ter lugar na Entidade este mesmo sábado a partir das 19 horas, A Sardiñada anual que sempre congrega a moitos socios e simpatizantes. Desexámoslles que teñan moit asistencia e participación. Tamén nos fala da próxima "Festa Galega" no Eix Maciá, de Sabadell, prevista para os días 12, 13 e 14 de xuño próximo, na que contarán con degustacións gastronómicas a cargo da "Casa Díaz". Inauguración cun pica-pica o venres día 12 e posterior actuación de orquestras e música de verbena. Agradecémoslle a súa detallada información e desexámoslles que teñan moito éxito.

Casa Florencio

A segunda intervención, é a de DANIEL VILA DURÁN, da Casa Florencio, no lugar de O Verdugo, pertencente ao Concello de A Lama. Fálanos de celebración do "Concurso de Espantallos" que xa están expostos na "Ruta da Liberdade", que é un percorrido por un sendeiro cheo de natureza, a carón do río Barbeira. Levan xa varios anos celebrando este evento que ten moita participación e concurrencia. Este sendeiro estivo axeitado e axudaron a limpalo e sinalizado os internos do cárcere da Lama, xunto coa Asociación de veciños. Parabenizámolo polo ese traballo de sociabilidade e posta en valor do entorno natural e de convivencia que amosan. Desexámoslle que teñan moito éxito.

Christian 

A continuación damos lectura a un traballo moi interesante relacionado co nome de ESPOSENDE. Os tres lugares e unha raíz xermánica, pero unha língua con dous brazos. A primeria Santiago de Esposende en Ribadavia, a segunda a dous quilómetros de Ribadavia, Santa Mariña de Esposende, no concello de Cenlle. E a terceira, e máis famosa, Esposende de Portugal. Cidade, concello e freguesía, na foz do río Cávado. Un fermoso texto que nos enviou CHRISTIAN SALLES, brasileño, e grande entusiasta dos nosos programas, a quen lle agradecemos a súa aportación. ¡Moitas grazas, CHRISTIAN!

Recibimos a crónica do noso correspondente na capital da Ribeira Sacra -Monforte de Lemos- XOSÉ MANUEL F. MONTES, encargado da sección QUEN CHE PREGUNTOU? que el subdivide en tres apartados que levan por título a) Bule-Bulo, b) Que pasa que pasa, na Ribeira Sacr, e c) Sabedoría popular, na que recolle ditos, refráns, frases e anotacións na súa "libretiña pequena". Finaliza coa colaboración dun personaxe que aporta as súas escollas de ditos ou frases enxebres galegas, pouco empregadas.

 

David Carrera

Conectamos novamente con Galicia para falar co Ilmo.Sr.Alcalde de A Lama, don DAVID CARRERA CAL, que nos recibe moi amablemente e preguntámoslle polos diversos sendeiros que teñen no Concello que son moi visitados e de grande interese. Tamén nos fala da Semana Cultural que hai un tempo mudou o seu título por "Verán Cultural". As moitas e diversas Festas, concretamente a Festa gastronómica do Codillo, prevista para primeiros do mes de xuño. Desexamos que teñan moito éxito.

 

Despedimos o programa, con música de fondo, desexando que teñan unha feliz semana e agradecéndolles que nos sintonicen.

Deixamos aquí o programa Completo - Enteiro.

XOVES 14 de MAIO do 2026

Un novo programa, este xoves. Comezamos coa nosa sintonía, as salutacións e propoñemos a escoita da peza "Begoñísima" interpretada por Uxía e Malvela, para recibir a VANESA BALBOA, da Federación de Entidades Galegas en Cataluña (FEGALCAT), coa que mantemos unha conversa moi amena, para recibir información da próxima celebración esta fin de semana, o 16 de maio, no Centre Civic Cotxeres Borrell de Barcelona: Festival Intercultural de música e canción Tradicional, no que participarán a Irmandade A nosa Galicia de Mollet, Grupo Kredo de Ucrania, Dulzaina Sierte de Castela e León, Cantoría Re-Quinto de América e a Cova da Serpe de Barcelona. Tamén nos comenta que o vindiero día 29 de maio celebrase unha Conferencia que impartirá a Profesora e Escritora Pura Salceda, sobre a vida e obra de Begoña Caamaño, no Salón de Tinell do Concello de Barcelona. Agradecémoslle a súa participación no programa de hoxe.

Continuamos a emisión poñéndonos en contacto con FERRAN BOTIFOLL, responsable do Grupo Amateur de Teatro "Denigrantes Comediantes" que acaban de estrenar o domingo pasado, en Nigrán, un novo proxecto teatral que leva por título "O QUE CALAMOS". Fainos unha pequena descrición dese traballo teatral tan interesante, co que recibiron unha excelente acollida e moita participación dos veciños e interesados. Precisamente grazas a esa actuación e demanda tiveron unha actuación nas Pontes e tamén foron reclamados para unha actuación próxima en Goián. Augurámoslles moitas máis actuacións e "bolos" para seguir disfrutando coa súa proposta teatral tan interesante.

Poñémonos en contacto con BEATRIZ VILA FREIRE, responsable en Monforte, da Asociación de Empresarios da Hostelería da provincia de Lugo. Parabenizámola, porque nos informa da celebración que están a realizar cada xoves deste mes de maio, no Centro do Viño da Ribeira Sacra, en Monforte de Lemos. Ese evento leva por título: "Marida MAIO", que xa vai pola súa 3ª Edición, na que se pode disfrutar da enogastronomía, con mostra de adegas e os seus viños, exposición de artesanía e oleiría. Segue a traballar nesa grande mostra gastronómica sendo unha grande embaixadora do "Para comer Lugo". Agradecémoslle a súa información detallada e desexamos que teña moitos éxitos.

Conectamos con JUAN CARLOS ARMESTO, Ilmo.Alcalde do Concello do Saviñao. Fálanos da "XX Festa do Viño e da Cereixa de Belesar", organizada pola Asociación desa localidade e patrocinada polos concellos de Saviñao e Chantada. Será esta fin de semana, os días 16 e 17 de maio. Unha celebración que conta cunha traxectoria excelente. Haberá unha carpa onde estarán os expositores cos seus produtos, especialmente as adegas e os propios produtores de cereixas para degustación dos asistentes. Tamén terán música pra amenizar o evento. Agradecémoslle a súa colaboración informándonos e desexamos que teñan moito éxito e moita asistencia para disfrutar entre todos.

Informamos de diversas actuacións ás que asistirá a Banda da Asociación C.G.Rosalía de Castro de Cornellà. Esta fin de semana. días 16 e 17 de maio, en Badalona, participando na Festa que organiza a Asociación C.G.Agarimos de Badalona. A seguinte fin de semana tamén actuarán na Festa do Camiño organizada pola Asociación Irmandade Galega de Rubí, prevista para os dias 29, 30 e 31 de maio próximo. Tamén informamos da próxima celebración da "Festa Galega de Can Mercader" para os días 4, 5, 6 e 7 de xuño próximo. Concretamente a A.C.G.Rosalía de Castro será a encargado do pregón da "Festa Major de Cornella" o día 4 ás 21 horas. Aproveitamos para despedirnos de tódolos nosos escoitantes.

Deixamos aquí o programa Completo - Enteiro.

XOVES 7 de MAIO do 2026

Comezamos esta nova emisión radiofónica coa nosa sintonía, as salutacións oportunas e un bocadiño de música para recibir ao noso primeiro convidado: LUÍS HENRIQUE, fundador do Grupo Musical OS CARUNCHOS. Parabenizámolo porque é un dos artistas convidado a participar na "IV Edición do RURALSIA" organizado polas Mulleres Rurais de Taboada, prevista para o día 9 de maio próximo. A súa intervención contará con poesía e música. A realización deste acto está prevista que se faga no Pazo de San Pedro de Bembibre. Desexámoslle que teña moito éxito.

A seguinte conversa-entrevista é con XIANA MOURENZA, outra artista, poeta e cantautora que tamén participará no RURALSIA de Taboada. Agradecémoslle a sua amable atención e felicitámola pola súa intervención neste evento tan interesante. Coméntanos a súa traxectoria e participación, cómo está de involucrada formando parte deste acto tan importante para a localidade de Taboada, de cómo comezou dende cativiña a bailar e tocar a acordeón. Escribe poemas e envíalle-los a coñecidos e amigos pero, de momento, aínda non os ten publicados. Desexámoslle que teña moito éxito.

Falamos con CRISTINA DOMÍNGUEZ, Concelleira de Turismo do Excmo.Concello de Pantón, que nos fala da "XXXI Mostra de Viños da Ribeira Sacra de Pantón". Unha celebración que comezará mañá mesmo coa apertura de carpas e Degustación e Cata Popular de viños. O sábado voltarán a ter outra cata de viños e a partir das 13:30 celebrarán o "Brinde do Viño" simultáneo en toda España, polo día Movimento Viño D.O. O pregón deste ano correrá a carago do enólogo e sumelier LUÍS L. PAADÍN. Tamén se celebrará a "IX Festa da Empanada", elaborada con produtos do país. Desexamos que teñan moito éxito de asistencia e participación.

A continuación recibimos a dona DIGNA RIVAS, Alcaldesa de Redondela. Parabenizámola pola "XXXIX Festa do CHOCO-2026" que terá lugar os días 8, 9 e 10 de maio próximos. Comezará o venres coa inauguración da Carpa de Degustación e actuación musical da Orquesta Saxo e verbena co Grupo América Vigo. O sábado a apertura da carpa contará coa actuación do grupo de Baile e Gaitas Airiños de San Simón. Contarán coa charla e pregón de Miguel Angel Revilla. Un detalle importante que nos indica é que a ONCE, en homenaxe a este acontecemento imprimiu os boletos do sorteo do día de onte relacionando a Festa do Choco de Redondela. Parabenizámola e cóntanos que tamén tiveron a mesma situación coa Festa da Coca en anos anteriores. Nesta celebración pódense degustar os chocos de Redondela elaborados de moitas e diversas formas, encebolados, en croquetas, con arroz, na súa tinta, en empanada ... etcétera. Agradecémoslle a detallada información e desexamos que teñan moito éxito.

Informamos, a continuación da celebración da "Feira do POLBO e SERÁN" que ten organizada a Asociación C.G.Rosalía de Castro de Cornellà, para este sábado día 9, diante da Entidade, na rúa Federico Soler, 71. Os socios poderán recoller unha tapiña de pulpo gratuita. A partir das catro, despois dos postres, cafés e chupitos terán a oportunidade de participar no Serán, cunha Foliada á que están convidados outros grupos.

Recibimos a crónica do noso correspondente na capital da Ribeira Sacra, XOSÉ MANUEL F. MONTES. A súa sección, Quen che Preguntou? comprende tres apartados que desenvolve moi axeitadamente, precedidos dunha entradiña musical moi acaída. Agradecémoslle a súa colaboración estimada.

Deixamos aquí o programa Completo - Enteiro.

XOVES 30 de ABRIL do 2026

Unha nova emisión deste programa de Radio en Galego. Comezamos coa nosa sintonía, as salutaacións e un bocadiño de música para recibir á primeira convidada, MÓNICA FERNÁNDEZ, Sumiller e Directora de Sala do Grupo Bambú (Restaurante 99 Sushi Bar) de Madrid. Galardonada co Premio Nacional de Gastronomía no 2016 á mellor Directora de Sala e co "Prix au Sommelier" (Mellor Sumiller do Mundo) da Academia Internacional de Gastronomía no 2017. Será a encargada de facer o pregón da "XXXIII Feira do Viño de Vilachá". Un acontecemento de grande importancia para aquela contorna. Parabenizámola por esta elección e polo traballo que está realizando, poñendo en valor os viños galegos. Mantemos unha conversa distendida e moi interesante. Agradecémoslle a súa amable atención e desexámoslle que siga colleitando moitos éxitos.

Escoitamos outro bocadiño de música, nesta ocasión o "Valse dos Rosales de Asados", peza que acaban de publicar os CARAPAUS, e aproveitámos esta peza para falar con GUSTAVO COUTO, un dos compoñentes deste Grupo Musical. Parabenizámolo por esta creación musical tan fermosa. Estiveron acompañados cunha cantante excepcional, de noventa anos, a señora Maruxa. O video que nos chegou á Redación ten a participación dunha bailadora clásica contemporánea chea de engado. Coméntanos algunhas das actuacións que tiveron e tamén as que están previstas para este próximo mes de maio e algunhas máis. Desexamos que teñan moito éxito.

Conectamos novamente con Galicia para recibir a LUIS CRESPO, Director do "27 Festival Internacional de Títeres de Redondela - 2026". Parabenizámolo polo traballo que están a preparar e cóntanos algunhas das propostas e actuacións que teñen previsto realizar neses días dende o 11 ata o 17 de maio próximo. Haberá Programación escolar, programación de Sala e programación de rúa. Ao mesmo tempo haberá un Mercadiño Titiriteiro, unha exposición de Os Monicreques de Kukas que se poderá visitar ata o día 22 de maio, e unha exposición de Voces de Gaza os días 21 e 22 de maio. Teñen confirmada a súa asistencia participantes de Francia, Italia, Portugal, Arxentina, Cataluña, País Vasco e Galicia. Desexámoslle moitos éxitos.

Escoitamos unha peza do "Grupo de Pandereteiras Arrancaxestas", da Asociación Cultural Santa Columba de Ribadelouro, en Tui. E falamos coa súa profesora e tamén compoñente das Pandereteiras: AURI RODRÍGUEZ. Veñen de participar nun concurso en Ames e acadaron o terceiro posto. Parabenizámolas por ese posto e tamén porque están convocadas para participar na próxima "23 Romaría Os nosos Fariñeiros Burros e Muiños", prevista para o día 1 de maio. Coméntanos que tamén lle da clases a outras alumnas da Asociación que tamén teñen un nome curioso: "As Pituquiñas". Tamén nos indica que pronto voltarán a participar noutro concurso en Vigo e nosoutros desexámoslles que acaden alomenos ese terciero posto que conseguiron no anterior concurso. Agradecémoslle a súa participación no programa de hoxe.

Neste intermedio damos a coñecer a próxima celebración, concretamente o sábado día 9 de maio, da "Feira do Polbo e Serán", que comezará diante da Asoc.C.G. Rosalía de Castro de Cornella a partir das 14 horas, rúa Federico Soler 71. Poderán degustar unha tapa de polbo tódolos socios. A partir das 16:30h comezará o Serán ao que están convidados outros grupos. Despois Foliada.

A seguinte conversa-entrevista é con XACOBO PÉREZ PAZ, Presidente a Asociación ABUFA (Asociación do Burro Fariñeiro). Parabenizámolo porque será o pregoeiro da "23 Romaría do Río Tripes". Mantemos unha conversa chea de información, agradable e moi interesante. Están a recuperar esta raza de burros fariñeiros e asisten e colaboran con moitas actividades. Tamén traballan con persoas que precisan atención especial como poden ser os autistas. A sede da Asociación está e Brión. Agradecémoslle a súa amable atención e prometémonos voltar a falar con Xacobo, posto que están próximos a celebrarse os Curros e Xacobo é un grande coñecedor e criador de cabalos. Desexámoslle moito éxito.

Despedímonos ate o vindeiro xoves á mesma hora. Grazas por escoitarnos e que teñan unha feliz semana.

Deixamos aquí o programa completo.

XOVES 23 de ABRIL do 2026

Un xoves máis con todos vosoutros. Comezamos coa nosa sintonía, as salutacións oportunas e un bocadiño de música para recibir ao primeiro convidado da tarde: ALBERTO MOSKA ROCK, da Sala Rebullón en Mos. Tal e como indican na súa propia páxina web, pertence ao Centro Social, Cultural e Deportivo As Pedriñas, pertiño de Vigo. É un espazo coñecido pola súa estupenda sonoridade, deseño e sobre todo, moi coñecida polos seus concertos e espectáculos. Precisamente nos comenta as próximas celebracións e ofertas musicais: mañá venres, Lorelia e As Pias, para sábado M.J.Pérez, Bouba e Crúa e para domingo Antía Muiño. Tamén nos comenta que teñen pasado por esa sala moitos artistas de relevancia e tamén tiveron varias actuacións teatrais. Agradecémoslle a súa participación e desexámoslle que teñan moitos éxitos.

A seguinte conversa-entrevista é co Cociñeiro Chef do Baleario Caldaria en Lobios DOMINGO GONZÁLEZ LORENZO. Parabenizámolo pola elaboración recente dun prato elaborado con produtos de proximidade e moi especialmente unha ensalada: Ensalada de perdiz con piña caramelizada, trigo sarraceno ao curri, con vinagreta de castañas e sorbete de gin tonic. É unha colaboración coa Asociación Galega das Castañas e dos Soutos. Coméntanos o seu traballo de acondicionamento e alimento para a boa crianza das perdices, no Tecor de caza de Lobios. E falamos da necesidade de reclamar que se prolongue a estrada autovía G-31 ata chegar á fronteira con Portugal, o máis axiña posible, para beneficio de tódolos habitantes da Baixa Limia. Agradecémoslle a súa colaboración.

Recibimos a crónica do noso correspondente na capital da Ribeira Sacra, Monforte de Lemos, XOSÉ MANUEL F. MONTES, encargado da sección QUEN CHE PREGUNTOU? que está dividida en tres apartados cheos de novidades e contidos moi interesantes.

Eloy, Pablo e Antía

A última entrevista é con PABLO CASTRO, un dos compoñentes do Grupo de música ALANA, da que vimos escoitando varias pezas e interpretacións ao longo do programa de hoxe. Felicitámolo por ese traballo que acaban de publicar e que leva por título "Un saber". O Grupo creouse no ano dous mil dezasete e está composto por Antía Vázquez, Eloy Vidal e Pablo Castro. Xa teñen recibido algúns premios de relevancia e actuaron en diversos lugares emblemáticos, como no Festival Internacional do Mundo Celta en Ortigueira, así como tamén foron elexidos para participar no Festival Interceltique de Lorient ou no Terra Fest de Genève. Agradecémoslle a súa participación no programa de hoxe e desexamos que sigan colleitando moitos éxitos.

Desvelamos o Bulo que nos quixo "colar" o noso correspondente Xosé Manuel: non era certa a presentación literaria. E aproveitamos a música para despedirnos ata o vindeiro xoves á mesma hora.

Deixamos aquí o programa Completo - Enteiro.

XOVES 16 de ABRIL do 2026

Comezamos este xoves coa nosa sintonía de sempre. Disculpamos a presencia do noso compañeiro ARMANDO FERNÁNDEZ, ao que lle desexamos que pronto se reincopore e escoitamos un bocadiño de música para recibir ao primeiro convidado, don XOSÉ GONZÁLEZ MARTÍNEZ, Presidente do Foro Peinador e tamén Presidente dos Amigos e Amigas do Couto MIxto. Parabenizámolo polos moitos e importantes eventos que están a celebrar. Fálanos e recibimos información sobre os actos "En Galego agora e Sempre", que se realizarán próximamente en Parada do Sil, e tamén en Baltar, no Cemiterio de Boisaca (Santiago de Compostela) e en Sabadelle (Chantada). Aproveitamos para que nos informe sobre a concesión de Xuíces Honorarios deste ano así como tamén das persoas que ingresarán, como Académicos Numerarios da Academia das Ciencias Sociais do Couto Mixto. Agradecémoslle a súa amable atención e desexámoslle que teñan moitos éxitos.

A seguinte conversa-entrevista é con XOAN FURANCHÍN, que mantén e actualiza puntualmente a guiafuranchin.com. Un traballo meticuloso e cheo de información, para todas as persoas que desexen coñecer, polo miúdo, que furancho visitar e os que están abertos. Coméntanos que á día de hoxe atópanse abertos cincuenta e sete furanchos en todo Galicia. A tempada comezou no mes de decembro do ano pasado e remata no mes de xullo deste ano. Estes establecementos caracterízanse por ofrecer o viño excedente e acompañan esta oferta cunha serie de tapas entre as once que establece a normativa. Paga a pena visitar, algunha vez un furancho galego para poder disfrutar, non só do seu viño, senón tamén desas racións ou tapas totalmente familiares con sabor á "avoa". Agradecémoslle a súa aportación.

Escoitamos as pezas musicais máis votadas propostas por "aRi(t)mar Galiza e Portugal". A Galega elixida foi unha de Uxía, titulada "Será por Flores" e no apartado luso foi elixida "Menina" de Mar e Carolina Deslandes. Acompañamos as dúas seguintes máis votadas, tanto galegas como protuguesas. O Premio entregaráselle en outono ás gañadoras, na Gala que se celebrará en Santiago de Compostela.

Falamos con GUSI DOMARCO, de "lembrame.gal" que nos deu a coñecer un traballo documental moi interesante, que leva por título: "A Luz das Ánimas". Estrenouse no youtube, o sábado pasado con sub-títulos en galego e portugués, e está a ter unha cantidade respetable de visitas e audición. Parabenizámolo pola parte que lle toca. Infórmanos con detalle dos actores e persoas que participan neste documental, así como do seu director: Sergio Santos Otero. Agradecémoslle a súa detallada información.

A continuación recibimos a ANA VILA PORTOMEÑE (Poeta Labrega), que está a traballar coordinando a próxima celebración do RURALSIA-2026, no Concello de Taboada, previsto para o día 9 de maio próximo. Un momento para recitar, expoñer, contar, cantar ou simplemente disfrutar dunha tarde poética e musical no Pazo de San Pedro de Bembibre. Xa teñen confirmada a asistencia de diversos poetas, tamén gaiteiros pandereteiras e algunha sorpresa máis. Tamén nomearán cabaleiro/a a outra familia vencellada ao concello. Antes de despedirse agasállanos coa lectura dun seu poema. Desexámoslle que teñan moito éxito.

Finalizamos o programa escoitando outro bocadiño de música e despedímonos ata o vindeiro xoves á mesma hora. ¡Grazas por escoitarnos e feliz semana!

Deixamos aquí o programa Completo - Enteiro

XOVES 9 de ABRIL do 2026

Un xoves máis con todos vosoutros. Comezamos coa nosa sintonía, as salutacións oportunas e un bocadiño de música. Conectamos con Galicia para falarmos con MARÍA XOSÉ PORTEIRO, Periodista, política e Escritora de narrativa e ensaio, Licenciada en Publicidade e Relacións Públicas, que ven de recoller, o día 6 de abril pasado, a Medalla do Parlamento, que lle entregaron xunto con outras mulleres, por seren diputadas na cuarta lexislatura autonómica para acudir como representantes de Galicia ao "IV Cumio da Muller en Beijing". Parabenizámola e celebramos esa concesión que pon en valor o traballo que segue a levar adiante na súa tarefa reivindicativa e na que lle desexamos que siga colleitando moitos éxitos.

A segunda entrevista é ao escritor RODRIGO COSTOYA, que ven de publicar e presentar en varias localidades, e moi concretamente no Hotel Literario Bela Fisterra o día 29 de marzo pasado. Edicións Pamies, a súa novela "FILLOS DE GAEL", tamén en castelán. Fainos unha pequena descrición do seu contido e da traxectoria histórica relacionada cos Celtas. Agradecémoslle a súa amable atención e desexámoslle que teña moito éxito. Ten previsto continuar co seu "Tour Gael" por Galicia e moitas localidades da península así como tamén estará na Feira do Libro de Buenos Aires e rematará estas presentacións na Feira do Libro de Madrid no mes de maio. Desexámoslle que teña moito éxito.

A continuación recibimos a crónica do noso correspondente XOSÉ MANUEL F. MONTES, dende Monforte de Lemos, encargado da sección QUEN CHE PREGUNTOU?

 

Seguimos a escoitar outro bocadiño de música e recibimos a ANTONIO DÍAZ FERNÁNDEZ, director da Revista Lua Nova, da A.C.G.Rosalía de Castro. Xa van editados nada menos que 65 números. A portada desta edición é un debuxo de Paco Ascón, que recolle a homenaxe á Muralla de Lugo, que está a cumplir 25 anos da súa declaración como Patrimonio da Humanidade. Nesta ocasión seguen a publicarse un resumo das actividades da Entidade, artigos relacionados coas Letras Galegas do ano pasado e artigos de socios e colaboradores. Felicitámolo pola excelente publicación e agradecémoslle a súa atención.

Aproveitamos para despedirnos ata o vindeiro xoves á mesma hora. Informamos da próxima actividade consistente nunha excursión prevista para este mes de abril, que xa indicaremos a data e o lugar. Damos a coñecer a próxima celebración da "Feira do Polbo" que se realizará o día 9 de maio, diante da Entidade. Tamén adiantamos información sobre as datas da Festa de Can Mercader, para os días 5, 6 e 7 de xuño.

Deixamos aquí o programa Completo - Enteiro.

XOVES, 26 de MARZO do 2026

Outro xoves con todos vosoutros, para ofrecervos un programa de dúas horasa en galego. Comezamos coa nosa sintonía de sempre, as alutacións e un bocadiño de música para recibir ao primeiro convidado, don LUÍS FERNÁNDEZ GUITIÁN, Alcalde do Concello de Sober, que nos informa da "XLVI Feira do Viño de AMANDI", prevista para os días 27, 28 e 29 de marzo vindeiros. Este mes ten a denominación "Mes do Amandi", con diferentes actuacións e actividades de interese. Terán como pregoeiro deste evento ao "Chef" do Restaurante Vértigo, Rafa Centeno. Acaban de concederlle unha Estrela Michelín. Participarán na mostra nada menos que vinteduas adegas, tamén terán unha cata e entregaranse varios premios as adegas cos viños elixidos, nunca falta a participación da banda de música de Sober, haberá mostra de produtos da zona e artesanía, orquestras e charangas para amenizar neses días. Desexámoslle que teñan moito éxito.

Escoitamos unha peza do Grupo Musical LUAR NA  LUBRE, porque a segunda conversa-entrevista é con BIEITO ROMERO, fundador e director deste Grupo Folk. Están a realizar unha xira celebrando os seus 40 anos nos escenarios. Precisamente un dos seus Concertos desta xira, será o vindeiro día 11 no Casino de l'Aliança del Poble Nou, en Barcelona. Concretamente nese concerto presentarán algún dos temas que publicarán no próximo libro-CD previsto para o mes de maio próximo. Augurámoslles moitos éxitos e mandámoslles os noso mellores desexos.

Conectamos con Galicia para falar con XESÚS ALFONSO PARADA JATO d'Meiraos, escritor e artista plástico galego do Courel. Coméntanos que ultimamente está a realizar "Petropictos", que son obras pictóricas realizadas nas pedras, aproveitando a súa formación para realzar algún elemento dos que se representan na pedra. Coméntanos algunha curiosidade dos traballos que lle encargan e tamén nos fala do seu último poemario publicado: Ceuta y Psique. Está próximo a saír do prelo un traballo teatral ilustrado por el mesmo, que levará por título: "A aira dos ventos". Desexamos que teña moito éxito.

Seguimos escoitando a Luar na Lubre e esa peza sírvenos de fondo para recibir a VANESA BALBOA, membro da Xunta Directiva de FEGALCAT (Federación de Entidades Galegas en Cataluña) que nos informa da próxima celebración dunha Conferencia de relevancia, que impartirá Sergio Fernández Aldrey, co título: "Agrupacións e instrumentos tradicionais ao longo da historia da música galega". Celebrarase o domingo día 19 de abril no Centre Civic San Martí, na rua Selva del Mar, 215. Tamén nos comenta que teñen previsto realizar outro evento relacionado coa tradición e a música doutras Entidades no mes de maio, así como do día das Letras Galegas e a entrega dos Alecrís, para o verán. Desexamos que teñan moito éxito.

Finalizamos anunciando que este programa voltará a emitirse o vinderio xoves día 2 de abril, aproveitando que son vacacións de Semana Santa. Desexamos que teñna unhas felices vacacións e voltaremos o próximo xoves día 9 de abril, á mesma hora.

Deixamos aquí o programa Completo - Enteiro.

XOVES 19 de MARZO do 2026

Comezamos este xoves coa nosa sintonía de sempre, as salutacións e unha peza do último disco deo Grupo Musical "Treixadura", para darlle a ben-vinda ao noso amigo investigador e escritor MANUEL RIVERO PÉREZ, que nos fala dun personaxe galego algo esquecido: Lino Novás Calvo. Un periodista, novelista e escritor galego que tivo unha grande producción literaria. Un grande contador de contos, traductor de personaxes relevantes da cultura. Agradecémoslle a súa aportación e detallada información sobre este personaxe, do que seguro publicará un libro e tamén ten previsto celebrar un congreso na súa localidade de nacemento. Desexámoslle moito éxito e procuraremos ofrecerlles as novidades que nos vaia comunicando.

A continuación poñémonos en contacto co Ilmo.Sr.Alcalde do Concello de Arbo, don HORACIO GIL EXPÓSITO, a quen parabenizamos e agradecemos a súa atención. Comunícanos que o vindeiro luns, día 23, estará en Cataluña para presentar, na sede da Asociación de Empresarios Galegos, a "LXVI Festa da Lamprea 2026", evento que repetirá no Centro Galego de Barcelona o seguinte día, martes 24 de marzo. Tamén nos comenta, mentre outras cousas, parte da programación prevista para os días 24, 25 e 26 de abril, que será cando se celebre. Foi declarada Festa de Interese Internacional. Agradecémoslle a atención que nos prestou e desexámoslle que teñan moitos éxitos.

Recibimos a crónica do noso correspondente XOSÉ MANUEL F. MONTES, encargado da sección QUEN CHE PREGUNTOU?

Poñémonos en contacto con TONIÑO LÓPEZ, do Grupo Musical "Treixadura". Felicitámolo pola recente presentación do seu último traballo que leva por título: PORTALÉN, e que vimos escoitando dende o comezo do programa. Presentouse o sábado pasado, día 14, no Teatro A Fundación, de Vigo, acadando un grande éxito. Son 19 pezas musicais, novas no seu repertorio. Coméntanos que foi un traballo de investigación e recollida de moitos anos de traballo. Están moi satisfeitos e xa teñen axendados varios concertos próximos a celebrar. Tamén nos fala da páxina web que renovaron e está moito máis accesible para os interesados. Desexamos que sigan colleitando moitos éxitos e agradecémoslle a súa participación.

Despedimos o programa ata o vindeiro xoves á mesma hora, e escoitamos o tema portalén, do disco.

Deixamos aquí o programa Completo - Enteiro.

XOVES 12 de MARZO do 2026

Un xoves máis con todos vosoutros. Dámoslle a ben-vinda a Antonio Álvarez, que nos visita nos estudios. saludamos aos escoitantes e propoñemos a escoita dunha peciña musical para conectar con Galicia, e recibir ao Periodista e escritor don XOSÉ MANUEL DEL CAÑO, que foi o coordinador do libro: "A Virxe do Cristal. Lenda, Roubo, Asasinato", que a Deputación de Ourense publicou nada menos que catrocentos exemplares e deseguida se esgotaron. Segundo nos explica Xosé Manuel, preténdese facer unha nova edición, tamén venal, para que poida ser accesible aos interesados. Consistirá nunha edición posiblemente en pdf que será accesible por Internet, e na que se poderán ler e admirar os escritos e demais colaboracións de cincoenta artistas que colaboraron. Agradecémoslle a súa detallada información e desexámoslle que teña moito éxito.

A continuación escoitamos outro bocadiño de música, precisamente do Grupo Musical "Treixadura", do que lles ofrecemos, en primicia parte so seu ultimo disco que leva por título "Portalen". E recibimos ao Sr. Alcalde de Quiroga, don Xosé Luís Rivera, a quen felicitamos porque esta fin de semana, concretamente os días 14 e 15 de marzo, celebrarán a "XXVI Mostra do Aceite de Quiroga". Infórmanos, detalladamente, das diferentes actuacións e actividades que pretenden levar a cabo, e moi particularmente o nomeamento do embaixador do Aceite de Quiroga, que este ano recaerá no Chef do Restaurante "Culler de Pau" (O Grove) con dúas estrelas Michelin, don Javier Olleros. O desprazamento en autobús gratuito ao muiño histórico de Bendilló. A 1ª Mostra da Camelias en Quiroga... etcétera. Desexámoslle que teñan moito éxito.

Poñémonos en contacto con CRISTINA ROLDÁN LOMBARDÍA, membro da Xunta Directiva da A.C.G.Rosalía de Castro de Cornella. que nos pon ao corrente dasa diferentes actividades que celebraron recentemente e dalgunha das próximas a realizar, como é a participación do Grupo de Gaitas, próximamente no "San Patricio" en Madrid, a "Feira do Polbo" para o día 9 de maio, a Asemblea Xeral Ordinaria para o día 21 de marzo, o Pregón da Festa Major de Cornellà... Agradecémoslle a súa participación e detallada información. Que teñan moito éxito.

E comezamos unha charla.coloquio co noco convidado de hoxe nos estudios. ANTONIO ÁLVAREZ GONZÁLEZ, Presidente da Asociación Castaño e Nogal de Quintá de Cancelada. Ven de recibir a distinción como "Sendeiro Azul", pola Ruta Quintá - Río Donsal PR - G 159, da que foron promotores e realizadores. Parabenizámolo e escoitamos a súa detallada información sobre esa Ruta que ten nada menos que 18,2 quilómetros de lonxitude, e cinco tramos moi ben diferenciados e sinalizados.

 

Seguimos escoitando outro bocadiño de música e continuamos a conversa co noso visitante e contertulio, Antonio Álvarez. Fálanos do proxecto, de cómo será a continuidade, a implicación dos tres Concellos polos que discorre a Ruta, Becerreá, Cervantes e Navia de Suarna, así como a Deputación de Lugo... etcétera. e voltamos a escoitar outro bocadiño de música.

Finalmente fálanos do libro que editou, personalmente, e que leva por título. HUELLAS Y ACCIÓN DE UN ALMA RURAL, adicado á sua mai, Serafina da Casa da Chá en Quintá de Cancelada. Agradecémoslle a súa participación no programa de hoxe e desexámoslle que teña moito éxito na continuidade da Ruta, recentemente premiada. Despedimos o programa ata o vindeiro xoves á mesma hora.

Deixamos aquí o programa Completo - Enteiro.