XOVES 20 de DECEMBRO do 2018

Ultimo programa do ano 2018, que comezamos saudando a tódolos oíntes e seguidores. Propoñémoslles escoitar unha peciña musical do ultimo CD de Xabier Vizcaíno, e deseguida conectamos con dona ROSALÍA MORLÁN, unha grande poeta galega e amiga, que nos pon ao corrente das súas ultimas creacións literarias, moi relacionadas coa escrita para nenos. Muy posiblmente presentará este novo libro: "O DRAGÓN ANTÓN E O SAPO ROSENDO". Agradecémoslle a súa amable atención e desexámoslle todo o mellor para o vindeiro ano 2019.

A segunda intervención é con XABIER VIZCAÍNO, que nos conta parte das súas ultimas actuacións e conceertos, en compañía de LUCÍA e outros músicos que o acompañan. Comezaron na vila de Celanova o venres pasado e continuarán en padron. Serán catro Concertos por toda Galicia. Felicitámolo por ser elixido como "Embaixador de Galiciame para o 2019" e desexámoslle moitos éxitos e moitas Felicidades nestas festas Nadalencas, e que as disfrute xunto con tódolos seus.

Continuamos coa participación do noso correspondente en Monforte de Lemos, Xosé Manuel F. Montes, encargado da sección QUEN CHE PREGUNTOU? e que desenvolve con minuciosidade cos seus Me Ghustan e Non Me Ghusta,. tan axeitados, relacionados coa actualidade galega do momento. Tamén nos envia unha relación de varias "Curiosidades" que destaca. Deséxanos Felices Festas e nós correspondémoslle devolvéndolle os desexos, con moito agarimo.

E finalizamos coa intervención da nosa correspondente nos Ancares, FERNANDA FOLLANA NEIRA, que fai un pequeno repaso das actividades populares, relacionadas coas navidades. Algunhas delas rescatadas do esquecemento, pero moi celebradas naquela contorna, como "O Apalpador"... Despedímola desexándolle Boas Festas.

E o mesmo lles desexamos a tódolos nosos oíntes e seguidores:

¡QUE TEÑADES UNHAS FESTAS DO NADAL MOI FEITICEIRAS E QUE O ANINOVO 2019, VEÑA CHEO DE BONDADES!!! 

Até o ano que ven, que agardamos volvan a sintonizarnos. ¡Apertas!

XOVES 13 de decembro do 2018

Na GALA de Galiciame

Despois das salutacións de inicio conecta con Daniel da empresa familiar CAURELOR, co que comenta varias das actividades recentes e dos produtos que ofrecen dende a súa páxina e dos que se poden adquirir e aproveitar para disfrutar deles nestas festas nadalencas.

Seguimos o programa comunicando Miriam González, unha das responsables do Documental "A Memoria da RAIA" que ten que ver coa investigación e o proxecto que encetaron Iris Justo, Andrea Pérez e Miriam González no verán do 2016, e que as levou coas súas propias cámaras a percorrer varios puntos da fronteira, como Medeiros de Monterrei, Montealegre, Chaves, Verín, Chaves, Vilarelho da Raia, Cambedo da Raia, Souteliño, Oimbra... e moitos pobos máis pertencentes a esa Raia galego-portuguesa chea de grandes verdades que se poñen en valor gracias a este traballo que nos seguirán ofrecendo e expoñendo estas mozas galegas.

A sección "Quen che preguntou?, como cada semana, a cargo do noso correspondente XOSÉ M. F. MONTES, comeza comentando a recente presenza de Armando na "IV Gala-Xantar de GALICIAME".Depois continúa cos seus "Me ghustan e Non me ghustan" que sempre ten moi ben escollidos. Tamén nos envía a súa colaboración en forma de viñeta, que teredes que aproveitar para seguirnos na vindeira emisión do próximo xoves, xa que terá moi boas e fermosas consecuencias agradables, en forma de agasallos para os oíntes e seguidores.

Finaliza a programación de hoxe coa participación da nosa correspondente nos Ancares FERNANDA FOLLANA, que nos informa de varios acontecementos moi interesantes para estas datas do Nadal, e tamén fainos algunhas recomendacións para disfrutar naqueles lugares lucenses.

A vindeira emsión será a que finalizará a nosa participación radiofónica deste ano. Non deixen de conectarnos, que teremos varias sorpresas moi interesantes e agasallos para os que nos seguen e queiran participar en directo con nosoutros.

XOVES 29 de NOVEMBRO do 2018

Gonzalo Hermo e Armando nos estudos de R.Sant Boi

Outro programiña máis con todos vosoutros. E comezamos dándolles a ben-vida. Un servidor, Xulio, atópase desprazado pero participa con Armando para recibir a GONZALO HERMO, que moi amablemente nos visita nos estudos de Radio Sant Boi. Aproveitamos para felicitalo por ter acadado varios Premios e moi concretamente o 3º do "32 CERTAME de Poesía Rosalía de Castro de Cornellà". A verdade é que temos a sorte de manter unha nómina de amigos, colaboradores e participantes coas nosas cousas moi celebrados e de grande renome no eido cultural. Desexámoslle moitos éxitos.

A segunda intervención é a de BEATRIZ VILA FREIRE, responsable e delegada da Asociación Provincial de Hostelería e Turismo en Monforte de Lemos. Comenta moitas das celebracións e actuacións da devandita Asociación, así como outras das moitas cousas que suceden na Ribeira Sacra, en localidades veciñas e na mesma provincia de LugoContinúa coa participación na sección QUEN CHE PREGUNTOU? do noso correspondente XOSE MANUEL F. Montes, que sempre ten preparada unha interesante  colaboración cos seus Me ghustan e Non Me ghustan, relacionados coas noticias que acontecen en Galicia concretamente. Despois envíanos a súa creación en forma de viñeta alusiva a algún momento do programa de hoxe.

E finaliza o programa coa conversa coa nosa amiga CARMEN PENIN, Profesora e Cantautora galega que nos informa de varias actuacións que tivo a semana pasada en Ourense, o día 4 de decembro no Auditorio de Vigo e unha próxima en Ribadeo.

Despídese ate a vindeira semana, que non será precisamente o día 6, xa que é festivo. Polo tanto agardámosvos o día 13 de decembro á mesma hora, non deixedes de sintonizarnos.

XOVES 22 de NOVEMBRO do 2018

Un programa máis que comezamos saudándovos a todos. Aos nosos oíntes e seguidores e escoitando unha peciña musical para comunicarnos directamente con Galicia, concretamente con Vigo, onde se atopa o noso primeiro contertulio: MANEL MONTEAGUDO, un mariñeiro que, despois dun accidente moi grave, converteuse nun escritor e creador literario. Cóntanos parte das súas vicisitudes dende cativo, cando con14 anos se "enrolou" nun buque de pesca e despois nun mercante no que sofriu un desgrazado accidente que o tivo postrado e doente durante moitos anos, e agora é un creador literario afincado en Vigo. Prometémonos voltar a falar con el, para que nos siga contando moitas cousas e nos debulle outras máis, relacionadas coa súa escrita persoal, coa que disfruta moito.

Seguimos co programa e escoitamos unha peza do ultimo disco de EMILIO RUA, "Duetos", que presentará no Teatro Principal de Ourense o próximo sábado día 22. Agradecémoslle a súa amable atención e a distendida conversa que mantemos con el, na que nos conta moitas cousas relacionadas coa súa traxectoria musical e dos seus concertos. 

Quen che PREGUNTOU? é a sección que leva adiante o noso correspondente Xosé Manuel F. Montes,  na capital da Ribeira Sacra, Monforte de Lemos. Sempre ten preparados os seus Me Ghustan e Non Me ghustan que están moi relacionados coa actualidade galega do momento. E apórtanos a súa creación cunha viñeta alusiva ao programa de hoxe, que compartimos con todos.

E temos para o final do programa á nosa benquerida MERCHI ALVAREZ, de Galiciame, que nos pon ao corrente da "IV Gala-Xantar de Galiciame" na Adega Condes de Albarei, en Cambados, prevista para o día 6 de decembro. Agradecémoslle a súa aportación e desexámoslle moitos éxitos.

E despedimos o programa ate o vindeiro xoves, que prometemos voltar. ¡Sexan felices!

15 de NOVEMBRO do 2018

Outro programiña máis con todos vosoutros. Comezamos dándolles a ben-vida e escoitando unha peza de música galega para poñernos en contacto con ROBERTO REGAL, grande Enólogo, Adegueiro e Empresario galego, concretamente de Chantada (Lugo), que nos fala da colleita deste ano 2018, de Enonatur, do viño de autor e dos proxectos que ten para degustar.

A seguinte intervención, é a conexión con XOAN CURIEL, cantautor galego que nos comenta o seu ultimo traballo "A casa do terror". Tamén falamos das diferentes actuacións e concertos que ten realizado esta tempada, así como a próxima, precisamente hoxe mesmo na "Casa das Crechas" en Santiago de Compostela esta mesma noite. Comentamos a súa faceta teatral e o traballo que está a preparar (un novo CD) que moi pronto nos presentará a tódolos seus seguidores. Agradecémoslle a súa participación.

Na segunda hora, como cada semana, conectamos co noso correspondente na capital da Ribeira Sacra - Monforte de Lemos - Xosé Manuel F. Montes, encargado da sección QUEN CHE PREGUNTOU? Fainos un percorrido noticiario cos seus ME GHUSTAN e Non ME GHUSTAN, moi relacionados coa actualidade galega do momento. Recoméndanos a asistencia a algunha das Feiras e Mostras que se poden disfrutar a vindeira semana: IV Feira do Mel de Montaña en Muras. "Exportur Galicia" no Pazo de Congresos en Ourense e finaliza contándonos un conto, que podedes escoitar neste "podcat".

Despois falamos coa nosa correspondente nos Ancares: Fernanda Follana Neira, que nos fala de Deporte en Lugo (ciclismo), do peche de dúas Casas Rurais moi interesantes na zona: A Casa de Curro e o Albergue dos Ancares. Ogallá se volvan a abrir para disfrute de todos. E acaba comentándonos o percorrido da "Via  Romana XIX", que pasa pola montaña luguesa ata Lugo. Un percorrido moi recomendable e moi ben sinalizado.

Despedímonos ate o vindeiro xoves. Que teñan unha feliz semana.

08 de NOVEMBRO do 2018

Comezamos o programa escoitando unha peza de música, do  Grupo de música TIRULEQUE - do seu CD "Outro que tal baila" - para darlles a ben-vinda e deseguida conectar con Galicia para falar con "Chiña" - Concepción ARZA, de "Delicias do Souto", que nos recibe moi amablemente e fálanos das Tartas, Tortas, Bolachas e Bikas de Castañas que elaboran no seu establecemento, aló en Folgoso do Courel. Agradecémoslle a súa colaboración.

Despois de escoitar outra peciña musical, voltamos a conectar con Galicia, concretamente con don José Antonio García Martínez, Presidente da Asociación de Productores de Aceite e Aceituna de Galicia. Infórmanos das actividades que están a realizar para recuperar os olivos autóctonos da nosa terra, e da próxima Festa que celebrarán nunha Almazara o vindeiro sábado en Quiroga, para agasallar a certos colleiteiros e tamén ao primeiro dos colleiteiros de Aceite de Galicia. Desexámoslles moitos éxitos.

Continuamos informando da celebración da "20 Mostra de Danza del Baix Llobregat", prevista para o día 10 de novembro, a partir das 5:30 en Can Massallera, de Sant Boi, organizado pola Casa de Sevilla e na que participará a "Irmandade Galega de RUBI".

Falamos con KIKE de Navia, Henrique Fdez-Mon Sánchez, que ten preparadas algunhas noticias relacionadas con Navia de Suarna.

A seguinte son certas comunicacións e informacións variadas, relacionadas cos nosos oíntes e seguidores, que sen eles non estaríamos nós tan orgullosos de seguir en antena.

Continuamos, despois de disculpar ao noso correspondente Xosé Manuel, que hoxe non pode participar connosco e conectamos con don Xosé Lois Llamazares, responsable da Empresa "Galletas Mariñeiras DA VEIGA", en Chantada, co que mantemos unha conversa chea de información.

E despedimos o programa ate o vindeiro xoves, que agardamos volvan a sintonizarnos.

XOVES 25 de OUTUBRO do 2018

Un programa máis con todos vosoutros. Comezamos con música de XABIER Vizcaíno, do seu ultimo CD "Alas de Papel", e conectamos con Galicia para falr con Henrique Fernández-Mon Sánchez, o noso amigo Kike de Vidal, que ten preparada a súa intervención relacionada cos "Magostos" tan manidos naquelas terras de Navia de Suarna. Facemos unha salutación a MERCEDES TARACIDO e ao seu esposo MÁXIMO, que nos ecoitan dende Suíza. Acabamos de recibir o libro de Mercedes: "Por camiños e Carreiros", do que falaremos con máis detemento en vindeiras emisións e agradecémoslle a súa escoita.

Despois conectamos con XABIER VIZCAÍNO, o autor do CD "Alas de Papel", que estamos a escoitar hoxe no programa. Comentamos a súa "Xira Americana" que tanto éxito tivo e tan contento polas múltiples interpretacións ás que tivo que acudir así como das actuacións que tivo no verán, moi espalladas por Galicia. Ten previsto voltar a facer outra xira polas Américas así como achegarse a Barcelona no vindiero ano e aquí o agardamos para compartir con el as súas inquedanzas.

Na segunda hora conectamos, coma sempre co noso correspondente Xosé Manuel F. Montes, encargado da sección QUEN CHE PREGUNTOU? que nos fai unha pormenorizada información do Magosto Cultural da Asociación de Anguieiros para esta fin de semana. Engaiólanos cos seus ME GHUSTAN e NON ME GHUSTAN, que podedes escoitar aquí, e envíanos a súa "viñeta" alusiva a algún momento do contido do programa de hoxe. ¡Moitas grazas, Xosé Manuel!

Despois conectamos con FERNANDA FOLLANA, a nosa correspondente na montaña luguesa dos Ancares, que nos fai unha crónica moi interesante relacionada cos Magostos e algunhas que outras curiosidades daquela zona e coméntanos os Menús do "Outono Gastronómico" que podemos atopar en dúas Casas Rurais: "Casa Lareira en Vilar e Casa O'Crego en Vilaquinte". Tamén nos relata o percorrido que se pode facer por aquela contorna. 

E despedímonos de todos vosoutros desexando que volvan a sintonizarnos o vindeiro xoves á mesma hora.

Xoves 18 de outubro do 2018

Outra semaniña máis con todos vosoutros, ofrecéndolles dúas horas de radio en galego. Comezamos recitando unha das poesías coas que nos agasalla no facebook a nosa admirada amiga poeta pastora Nieves Fernández Vidueira, que ven moi a xeito pola tempada na que estamos (relacionada coas castañas) e a chegada desa gota fría coa que remata a súa creación. Permitímonos a "licencia" de copiala aquí, para disfrute de todos vosoutros:

Atopei unha castaña
que nunha touza varaba,
non atopaba o camiño
e pola pedra esbaraba.

Onde vas meu queridiño
que a lua está menguada,
non te arrisques a caere
castaña.... Sen ser curada.

Eu ben sei que foi a chuvia
que te fixo beber moito,
e co avaneo do vento
unha cantiga eu escoito.

A castaña está rachada
non sei quen a cosería,
coseuna a Lúa de noite
regouna o Sol polo día.

E coa mornura da neboa
amansou ata os ourizos,
benditos os castiñeiros
que non os tiñan buguizos.

E atopei unha castaña
que polo monte corría,
xa comezou a campaña
e tamen a gota fría.
Nieves Fernández Vidueira

A seguir conectamos con Mery, da Asociación Cultural Galega "AGARIMOS de Badalona, que nos pon ao corrente das múltiples actividades desenvolvidas durante o verán e neste comezo de curso 2018-19 e das que teñen previsto realizar en vindeiras datas. Agradecémoslle a súa aportación e prometémonos voltar a conectar con ela próximamente.

Celebramos a visita de Ricard Ros de Música Fol del Baix Llobregat RIU, que ven a presentarnos o seu ultimo traballo-CD DELTA, e falarnos da próxima mini-xira que celebrarán co Grupo de música Celta-irlandesa BÖJ de Ferrol os días 27, 28 e 29 de Outubro en Sant Boi e Esplugues de Llobregat. Agasallounos coa entrega de dúas entradas para asistir "de valde" -gratuitamente- a algún dos concertos que teñen previsto realizar: o día 26 na Masia de Sant Boi, o día 27 unha sesión vermouth na Colonia Güell e o día 29 en Esplugues de Llobregat. Desexamos moitos éxitos.

A seguinte intervención e a do noso correspondente en Monforte de Lemos, Xosé Manuel F.Montes, encargado da sección Quen che Preguntou? e comeza cos seus "Me ghustan e Non Me ghustan" para finalizar coas curiosidades e propostas interesantes.