XOVES 4 de ABRIL do 2024

Outra emisión máis deste noso programa con música, noticias e entrevistas interesanes. Comezamos coa nosa sintonía de sempre, as salutacións e escoitamos unha primeira peza musical para recibir ao primeiro convidade de hoxe: ALBERTE MONTES, Actor, Monologuista, Director, Guionista... Recibímolo dándolle os nosos parabens polo seu traballo e tamén porque ten previsto realizar unha intervención no Centro Galego de Barcelona, esta misma fin de semana, concretamente o sábado. Un espectáculo que titula: "Bueno carallo Bueno". Convida a tódolos nosos oíntes e seguidores a que se acheguen para disfrutar con el. Seguro que se divertirán. Desexamos que teña moito éxito.

Despedímolo con música, outra vez, e voltamos a escoitar outra peza musical, esta vez unha de Carlos Núñez, "Aires de Pontevedra", para recibir á segunda participante, dona CHARO VALCÁRCEL, Profesora xubilada, Licenciada en Filoloxía e Poeta. Agradecémoslle a súa participación e aproveitamos para felicitala polo traballo que veñen realizando no "De Vella a Bella", en Pontevedra. A publicación nas redes da súa revista dixital número 32, do mes pasado... E tantas cousas. Eles mesmos se definen, na súa páxina (devellabella.com), describíndose deste xeito: somos un grupo de persoas que pensan que a xubilación pode ser unha das etapas máis activas e creativas da vida... e neso están. Aproveitando que falamos de poesía, pedímoslle que nos lea-declame un dos seus poemas, e agasállanos cun poema adicado aos nenos palestinos. ¡Moitísimas grazas Charo! Foi un pracer e unha honra.

Despois de escoitar outra peza musical, neste caso a que foi premiada no aRi(T)mar: "Morena" do Grupo "De Ningures", conectamos con Galicia para recibir ao noso correspondente XOSÉ MANUEL F. MONTES, encargado da sección QUEN CHE PREGUNTOU? que sempre a desenrola cos seus "Ghústanme e Desghústanme" escoillidos entre as diferentes noticias galegas. Despois deixanos unhas frases recollidas na súa "Libretiña pequena" e algunha que comparte coa fraseoloxía publicada por Xosé Antonio Pena Romay. Sempre lle estamos agradecidos pola súa grande colaboración e participación.

Despois de escoitar unha peciña de música interpretada por Efrain Díaz, co "Pito Galego", poñémonos en contacto con MIGUEL MOSQUERA, Luthier, artesano deste mesmo instrumento: O Pito Galego. Mantemos con el unha pequena conversa-entrevista na que nos pon ao corriente do seu traballo de investigación e elaboración dese tradicional instrumento galego que tivo unha grande repercusión na música tradicional e que estivo un tempo moi esquecido e pouco valorado, pero hoxe en día está tendo moita repercusión e bastante posta en valor, tanto é así que o Pito Pastoril Galego empregouse para interpretar a primeira obra composta para Pito Pastoril Galego cunha Orquestra de música Clásica: "O bosque do asubiador, de Juan Durán". E despedímolo escoitando outra obra interpretada por Efren cun Pito Galego e a zanfona de Ivan Costa: Pitanfona. Agradecémoslle a súa participación e desexámoslle moitos éxitos.

Despedímonos ate o vindeiro xoves á mesma hora. Que teñan unha feliz semana.

Deixamos a quí o programa enteiro.

O día 22 de Marzo pasado, Radio Sant Boi, e en concreto o noso programa "Galegos no BAIX", estivemos na Pedrera de Barcelona, como Representantes de AMEGA (Asociación de Medios en Galego), na entrega de Premios AMIC. Unha Honra para todos nosoutros.

XOVES 21 de MARZO do 2024

Un xoves máis con todos vosoutros. Sigue convaleciente o noso compañeiro ARMANDO FERNÁNDEZ LÓPEZ, a quen lle desexamos unha pronta recuperación. Seguro que no vindeiro programa xa o teremos incorporado completamente mellorado. Comezamos coa nosa sintonía de sempre. Escoitamos un bocadiño de música e poñémonos en contacto co primeiro convidado: don ARMANDO REQUEIXO CUBA, Investigador (CRPHI), Crítico Literario, Profesor Universitario (USC). Un grande amigo e colaborador que nos atende moi amablemente e con quen mantemos unha conversa chea de ensino, aproveitando precisamente que estamos a celebrar o día Internacional da Poesía. Explícanos que ven de participar en varios actos relacionados con este evento de hoxe, no Instituto Padre Sarmiento e despois de falar connosco terá unha actuación acompañando a dona Helena Villar Janeiro e despois outra na presentación do libro que leva por título "Cando o avo esqueceu o meu nome"doutra grande poeta, Rosalía Morlan. Agradecémoslle a participación de hoxe no noso programa.

Voltamos a escoitar outro bocadiño de música, concretamente a Foliada de Pontevedra, para recibir a dona ANA SANTOS SOLLA, da Asociación DE VELLA A BELLA, que onte tiveron un acto poético cheo de engado. Felicitámola e cóntanos cómo foi este acto que programaron e ao que asistiron unha morea importante de poetas para declamar os seus versos e tiveron un cheo completo de asistencia. Ela tamén declamou, xunto coa compañeira Charo Valcárcel. Fálanos das moitas e diversas actividades que veñen desenrolando en Pontevedra e á que convida participar a tódolos interesados. Agradecémoslle a información detallada e desexámoslle que sigan colleitando moitos éxitos.

Comezamos a segunda hora conectando co noso correspondente na capital da Ribeira Sacra, Monforte de Lemos, XOSÉ MANUEL F. MONTES, encargado da sección "QUEN CHE PREGUNTOU?" coa que nos informa das noticias escollidas cos seus "Me ghustan e Desghústanme", e finaliza cos seus apuntamentos da "libretiña pequena" que sempre son moi acaídos e con certa retranca galega.

A ultima entrevista-conversa é co Ilmo.Sr. Alcalde do Concello de  SOBER, don LUÍS FERNÁNDEZ GUITIÁN. Parabenizámolo porque esta fin de semana (días 22. 23 e 24 de abril) celebrará a "44 FEIRA DO VIÑO DE AMANDI", declarada de Interese Turístico de Galicia. Fálanos do cartel elixido mediante concurso, que corresponde ao vilalbés Eduardo Pérez Baamonde. Terán como pregoeira a periodista da TVG, LUCÍA RODRÍGUEZ, nada en Castro Caldelas, e como ela mesmo di: "eu son cen por cen da Ribeira Sacra, coma os viños..." Participarán nada menos que 22 adegas que terán os seus "stands" de exposición nunha grande carpa axeitada para tal fin, onde compartirán con outros expositores de produtos galegos da zona, así como tamén cerámica de Gundivós. Tamén se entregarán tres Primeiros Premios un primeiro para viños tintos, un premio para viños brancos, un premio para viños rosados da anada 2023 e outro para viños envellecidos en barrica. Desexámoslle que teña moitos éxitos e despedímolo escoitando a peza "Amandi", interpretada pola Banda de Música de Sober.

Aproveitamos para despedirnos de tódolos nosos oíntes e seguidores, desexándolles que teñan unha feliz Semana Santa. Voltaremos no mes de abril. ¡Que sexan felices!

Deixamos aquí o programa completo.

XOVES 14 de MARZO do 2024

Outra semana máis con todos vosoutros. Disculpamos a ARMANDO FERNÁNDEZ, que hoxe ten outras obrigas que cumplir, pero que seguro poderá incorporarse na próxima emisión. Comezamos coa nosa sintonía de sempre, coas salutacións e un bocadiño de música para recibir ao noso primeiro convidado, don XOSÉ LUNA SANMARTIN, da Estrada, Profesor, Licenciado en Xeografía e Historia, Dramaturgo, Escritor e Poeta. Felicitámolo porque está convidado a participar no evento "3x3" de poesía, que propón Pepe Formoso no Hotel Literario Bela Fisterra e tamén no Bela Muxía. Agasállanos coa primicia e lectura dun seu poema co que vai a encetar a súa intervención o próximo sábado. Mantemos unha conversa moi afable e desexámoslle moitos éxitos.

A segunda intervención é a do noso benquerido amigo MANUEL RIVERO PÉREZ, Lincenciado en varias especialidades (Socioloxía, Psicoloxía, Antropoloxía...), investigador e escritor que nos fala a presentación do seu ultimo libro: "Universo Aurora Sampedro Piñeiro. Una adelantada a su tiempo". Tamén aproveitamos para que nos axude a coñecer un pouco o Camiño de San Rosendo, tamén chamado da Raíña Santa, do que tanto ten investigado e traballado. Precisamente descúbrenos que está a traballar nunha próxima publicación dedicada a San Rosendo. Agradecémoslle a súa participación de hoxe.

Escoitamos outro bocadiño de música e poñémonos en contacto con NACHO BAL, guía de Montaña, que nos fai partícipe da súa afición e traballo relacionado co deporte do montañismo e escalada. Forma parte do grupo de Empresa León Aventura S.L., que teñen varios lugares varios rocódromos e escolas de aprendizaxe para escalar e outras actividades moi interesantes: Montañismo, Escalada.  Espeleoloxía, Barranquismo, Descensos no río Sil, Augas Bravas, Sendeirismo, Via Ferrata... ... Actividades todas elas acompañadas de guias profisionais e xa programadas para esta Semana Santa. Agradecémoslle as informacións tan detalladas e tan interesantes.

E completamos a emisión chamando a dona PILAR ANSEDE, Presidenta do Centro Galego de Barcelona que nos pon ao corriente das diferentes actividades que realizarán antes de finalizar este mes, e antes da Semana Santa, como a actuación Teatral, incluida no mes do teatro, de "FURAFOLLAS Agrupación Teatral" previsto para este sábado próximo. A seguinte semana será o Grupo Catalán "Teatre a l'ombra". Descansarán na Semana Santa para reanudar os eventos o día 6 de abril ás seis da tarde coa actuación de "ALBERTE MONTES", cun seu monólogo. Tamén anuncia a preparación dunha grande actuación prevista para o día 23 de abril, con motivo da "festa do libro" día de San Jordi, no que teñen previsto instalar un "stand" de exposición e asinado de libros en galego e catalán, na propia Ramblas de Barcelona, diante mesmo do Centro Galego de BCN. Aínda non teñen a nómina de autores, que faltan por confirmar, pero pronto teremos información. Desexámoslles moitos éxitos.

E despedímonos ate o vindeiro xoves á mesma hora. Que teñan unha feliz semana!

Deixamos aquí o programa enteiro.

XOVES 7 de MARZO do 2024

Un programa máis con todos vosoutros. Dúas horas de Radio en Galego, con música, entrevistas e conexión con Galicia para recibir noticias. Despois da sintonía do programa e as salutacións oportunas, poñemos un bocadiño de música. Primeiro disculpamos ao noso compañeiro Armando Fernández, que hoxe non pode acompañarnos e a continuación poñémonos en contacto con BEATRIZ VILA FREIRE, Delegada a Apehl (Asociación de Empresarios de Hostalería e Turismo) da zona sur de Lugo. Infórmanos de varias e interesantes celebracións que teñen previsto realizar: "Estase Cocendo", "E para comer Lugo", próximas Feiras do Viño na Ribeira Sacra, participación na Feira Internacional de Turismo ITB Berlin, próxima participación cun stand na "Volta Ciclista a España". Desexámoslle moitos éxitos.

A segunda intervención é con JUAN CARLOS CAMBAS, músico compositor, pianista de grande prestixio, que nos recibe moi amablemente e felicitámolo polo seu último traballo publicado: Un CD que leva por título: "CAMIÑO ABERTO" Canto libre de Argentina e Latinoamérica. Escoitamos algunha das pezas coas que nos agasallou e que seguiremos escoitando en vindeiras emisións. Este traballo é unha mostra musical extraordinaria. A intérprete vocalista é Rosa Leiro, que fai dúos fantásticos con outros músicos e grandes intérpretes galegos e arxentinos. Os interesados poden mercar este fantástico CD, na súa páxina persoal: juancarloscambas.com, e tamén nas redes. Agradecémoslle a súa participación no noso programa de hoxe e desexámoslle que siga colleitando moitos éxitos.

Comezamos a segunda hora conectando co noso correspodente na capital da Ribeira Sacra, Monforte de Lemos, XOSÉ MANUEL F. MONTES, encargado da sección QUEN CHE PREGUNTOU? As súas informacións e noticias fainas cos seus ME GHUSTAN e DESGHÚSTANME, escollidas entre as moitas novidades acontecidas na Galicia. Despois finaliza a súa intervención coas anotacións da súa "libretiña pequena", para a que nos solicita unha música que teremos que escoller para vindeiras ocasións. Tamén nos envía a súa "viñeta" alusiva a un momento comentado no programa de hoxe, e que aquí compartimos con todos vosoutros. Desexamos que teña unha feliz semana.

Voltamos novamente a Galicia para falarmos con CRISTINA CORRAL SOILÁN, Profesora, Escritora e Poeta luguesa, que recibimos con música de Antonio Zambujo e Uxía: "A gotinha d'agua". Felicitámola (Moitos parabens!) porque acaba de ser elixida para participar no "Lugopoetica 2024" xunto con Olga Novo, previsto para o mes de maio próximo. Fálanos dese evento que se celebrará en Lugo, baixo o patrocinio do Colectivo Egeria e o apoio da Universidade de Educación a Distancia. A primeira sesión celebrouse o 29 de febreiro coa participación de Marica Campo e Eva Teixeiro. Tamén nos comenta a súa participación e codirección na Rede ESPORA, Radio para nenos, e que tamén lles dan clase aos profesores nesta materia. Quedounos para o final a próxima edición dun libro para nenos, que próximamente nos presentará. Agardamos poder ofrecerlle-la, claro. Despedímonos ate o vindeiro xoves. 

Deixamos aquí o programa completo.

XOVES 29 de FEBREIRO do 2024

Comezamos unha nova emisión do "Galegos no BAIX" de cada xoves, coa nosa sintonía de sempre, as salutacións oportunas, un bocadiño de música e dámoslle a benvida ao primeiro convidado: FRAN de Arte - Lixo en Redondela. Agradecémoslle a súa participación no programa. Fainos partícipe da proposta que cada ano teñen previsto realizar en Redondela con motivo desta celebración Arte-Lixo que consiste en recoller a maior pare de restos para convertilos en arte espallado polas rúas de Redondela. Este ano o tema elexido está moi relacionado coa Problemática Ambiental da Industria do Téxtil. As datas deste ano son dende o 13 ata o 20 de abril. Desexamos que teñan moito éxito.

Hector e Xosé Alvarez Díaz

A segunda intervención é a de HECTOR ÁLVAREZ DÍAZ, un adegueiro propietario, xunto con seu irmán Xosé, da Adega "A Señora", nome primitivo da súa casa onde naceron, en Coea. Estes dous irmáns recuperaron algunhas viñas que tiñan, e replantaron algunhas cepas, xunto con algúns inxertos en cepas de moita antigüidade, e a partir deste ano dos mil vintecatro xa comezaron a comercializar ese viño con IXP das Terras do Navia. Tamén se dedica á extracción de mel. Os interesados deben poñerse en contcto con eles no teléfono: 646 136 014. Aínda non teñen actualizada a súa páxina de Internet, pero todo chegará. Seguiremos a súa andaina.

Continuamos a programación e falamos co noso correspondente en Monforte de Lemos, XOSÉ MANUEL F. MONTES, encargado da sección QUEN CHE PREGUNTOU? é unha recolleita de informacións que nos explica cos seus "Me ghustan e Desghústanme", moi acaídos. Tamén nos envía unha recomendación aos oíntes e seguidores para que esta fin de semana se acheguen á localidade de Arzúa, xa que esta fin de semana será a celebración da "49 Festa do Queixo de Arzúa 2024". do 1 ao 3 de marzo, cun programa moi extenso, que comprende exposición, concurso e venta de queixo, festival musical e concertos... etcétera.

Gisela

Entrevistamos a GISELA RODRÍGUEZ, Directora do Grupo de Teatro de aficcionados "Anduriña", da nosa Asociación Cultural Galega Rosalía de Castro. O motivo da conversa é que nos fale da próxima posta en escea da obra adaptada que leva por título: "Cinderela e os postres de El Rei". Unha adaptación do texto de Nunila López (grupo de teatro Seliña). Explícanos que non quere desvelar o entramado da obra, pero ten que ver moito coa reivindicación de liberdade feminina. Tódolos interesados deberán pasar a recoller as entradas (gratuitas) á Sé da Asociación na rúa Federico Soler de Cornellà. A representación será no Auditorio de San Ildefonso o vindeiro domingo día 16 de marzo, a partir das 18h. Desexamos que sexa todo un exito de interpretación e de audiencia, cun cheo completo.

E despedímonos ate o vindeiro xoves á mesma hora.

Deixamos aquí o programa completo.

XOVES 22 de FEBREIRO do 2024

Adelino

Un xoves máis con todos vosoutros. Dúas horas de Radio en galego, con música, entrevistas e noticias dende Galicia. Despois da nosa Sintonía, das salutacións axeitadas e un bocadiño de música, conectamos co noso primeiro convidado: DON ADELINO PÉREZ GIL, Presidente da D.O.Bierzo, e xerente das Adegas Adriá. Coméntanos unha serie de eventos e noticias relacionadas co Consello Regulador da D.O.Bierzo, da asistencia á celebración en Barcelona no Barcelona Wine Week, colaboración coa Universidade de León, en Ponferrada... Tamén nos fala un chisco da súa bodega, da súa páxina web que poden consultar para mercar algún dos seus productos. Agradecémoslle a súa amable atención e desexamos que sigan colleitando moitos éxitos.

Agus

A seguinte conversa é con AGUS BARANDIARÁN, do Grupo de Música Folk "KORRONTZI", en Euskadi. Escoitamos primeiro unha das súas pezas do ultimo Libro-Cd, que virán a presentar ao CAT, Centre Artesá Tradicionaarius de Gracia, o día 1 de marzo, para un Concerto que celebra o seu 20 aniversario. Felicitámolo, dámoslle os nosos parabens por tal acontecemento. Comentamos algunhas cousas interesantes do Concerto e de que tamén haberá sorpresas moi interesantes, así como que terán a presencia do grande músico "Kepa Junquera", que estará asinando o seu ultimo traballo á entrada o espectáculo. Un grande acontecemento que será unha "romería", tal e como el mesmo nos adianta. Desexamos que teñan moito éxito.

A segunda hora comezámola conectando con Galicia, concretamente co noso correspondente na capital da Ribeira Sacr. Monforte de Lemos: XOSÉ MANUEL F. MONTES, encargado da sección QUEN CHE PREGUNTOU? e que sempre nos fai partícipe da súa crónica, cos seus "Me ghustan e Desghústanme" sempre moi acaídos e que refrexan a súa escolla das noticias e aconteceres na nosa Galicia. Finaliza coas súas anotacións persoais da "libretiña pequena".

Quico Cadaval

E por último recibimos ao grande Contador e Contacontos galego, don QUICO CADAVAL, Actor, Director, Adaptador Teatral, Impulsor do movimento de radioteatros en Galicia nos anos noventa. Agradecémoslle que nos atenda. Felicitámolo porque está desenvolvendo e realizando unha morea de actividades, entre as que resalta a súa faceta como Director Teatral, concretamente a posta en escea da obra de Vicente Risco "O Porco de pé", que está tendo unha resposta de público excelente. Felicitámolo pola súa intervención na Radio Nacional con Pepa Fernández, no seu programa "No es un día cualquiera" dos fins de semana. Unha verdadeira honra para nosoutros a súa particpacióm no noso programa. Desexamos que siga colleitando moitos éxitos.

Despedímonos ate o vindeiro xoves á mesma hora. ¡Que teñan unha feliz semana.

 

Deixamos aquí o programa enteiro.

XOVES 15 de FEBREIRO Do 2024

Oli Xiráldez

Outro xoves máis con todos vosoutros, para ofrecerlles dúas horas de Radio en Galego. Hoxe con visita incluída, en directo e en primicia para tódolos nosos oíntes e seguidores. Despois da nosa sintonía, as salutacións e ben-vinda, ofrecémoslles escoitar a Alborada de Rosalía interpretada por Oli Xiráldez e Chuco Estévez, para recibir precisamente a OLI XIRÁLDEZ, Luthier de Gaitas e Frautas Galegas. Felicitámolo porque está elixido para representar a Galicia nunha exposición de artesáns de instrumentos musicais en Coimbra (Portugal). Aproveitamos para falar do seu taller, dos instrumentos que fabrica, da súa implicación e participación na Asociación de Gaiteiros de Galicia, como Vicepresidente. Convídanos a que participemos no grande evento que esa Asociación realiza cada ano en Guitiriz. Tamén temos tempo para falar da colaboración, dende fai trece anos, que teñen coa "Casa de Rosalía" en Padrón. Unha honra telo na nosa emisión. Desexamos que teña moita sorte e moitos éxitos.

Manuel Suárez

A continuación poñémonos en contacto con MANUEL SUÁREZ SUÁREZ, doutor en Dereito e Ciencias Sociais, que foi Secretario do Patronato da Cultura Galega en Uruguay. Cóntanos ese suceso que lle aconteceu cando tiña cinco anos en Baio. Estaba xogando cun amigo e compañeiro nun lugariño perto do monte, cando foi atacado por unha loba que o feriu gravemente, e que foi rescatado polo seu padrin, aínda que con algo de inquedanza, porque a loba tratara de escondelo entre unhas pedras. Despois das vicisitudes que sofriu, porque tivo que ser trasladado a Santiago de Compostela para curalo e facerlle unha transfusión de sangue, a súa inquedanza estaba nos aconteceres posteriores, xa que a xente quería interesarse pola circunstanciaa acontecida e incomodábase e case se agobiaba con tanta pregunta. Falamos tamén da súa estancia en Uruguay e da súa experiencia e relación con grandes persoeiros da nosa Cultura Galega en Montevideo. Deixamos para outra ocasión a súa faceta como representante en Galicia da Fundación "Carlos Gardel" e da Academia Nacional do Tango en Uruguay. Agradecémoslle a súa participación no programa de hoxe.

Falamos agora coa escritora e poeta FINA TIZÓN FRAGA, que nos ven a presentar o seu último libro de relatos: "CÍRCULO DE VIDAS". Coméntanos cómo foi o traballo de confección e creación dese libro de relatos escrito en castelán e galego. Agasállanos coa lectura dun deles, en galego. O libro está accesible para todo o público que desexa adquirilo poñéndose en contacto con ela polo messenger ou na súa propia páxina. Aínda non tivo tempo para presentalo públicamente, por eso lle agradecemos a súa presentación nesta nosa humilde emisión radiofónica. Desexamos que teña moito éxito.

Pablo Deiros

Escoitamos a peza titulada: "Dime que volverás" que está interpretada por PABLO DEIROS DÍAZ, un rapaz de Becerreá, que está estudiando Administración de Empresas e que compaxina os estudos con traballos de DJ en discotecas de Lugo e outras cidades, como Vigo, Madrid e outras. Ten feito algúns concertos en diversos locais, e pódese dicir que é un autodidacta casi completo, xa que ademais de compoñer e cantar tamén toca o piano, a guitarra e a batería... Agradecémoslle a súa participación de hoxe no programa e desexámoslle que teña moito éxito na súa andaina musical, e despedímolo coa súa propia canción.

Despedímonos ate o vindeiro xoves e deixamos aquí o programa enteiro.

XOVES 8 de FEBREIRO DO 2024

Comezamos outra emisión do noso programa coa sintonía de sempre, as salutacións oportunas e escoitamos unha peza de música do escritor e músico FRANCISCO CASTRO, a quen chamamos para que nos poña ao corrente da súa nova andaina, despois de deixar a súa responsabilidade na Editorial Galaxia. Agradecémoslle a súa amable atención e felicitámolo por ese primeiro CD que acaba de publicar. Cóntanos algunhas cousas interesantes relacionadas co seu quefacer diário e das propostas e proxectos que ten previstos. Desexámoslle moita sorte e moitos éxitos.

A seguinte intervención é con JUAN PEDRO SÁNCHEZ, Presidente de ASOBECAT, que nos presenta ao Ilmo.Sr.Alcalde de Corullón, don LUIS ALBERTO ARIAS, Concello elexido para homenaxear este ano no "XX Festival del Botillo 2024, en Cataluña". Comentamos algunhas cousas interesantes relacionadas con ese Concello, ao que nos convida visitar o Sr. Alcalde. Son productores de castañas e tamén de viño e de cereixas. Un pobo Berciano que paga a pena coñecer e que a súa Concelleira de Cultura, dona Consuelo López Pérez virá a recoller ese galardón en nome do Sr. Alcalde.

 

Continuamos o programa poñéndonos en contacto con LUCIANO PÉREZ, mestre artesán no Obradoiro de Instrumentos tradiconais na Deputación de Lugo. Estivo na inauguración da exposición que aínda está na Biblioteca da Universidade de Barcelona. Fálanos da confección dos instrumentos, dos proxectos tan interesantes que están a realizarse no Obradoiro da Deputación e tamén nos anuncia que estará, novamente na Universidade de Barcelona o vindeiro día 21, para visitas guiadas na exposición dos Instrumentos na universidade. Agradecémoslle a súa amable atención.

Despois de escoitar outra peza de música conectamos con ROCÍO CASTRO, da Fundación Rosalía de Castro, a Casa de Rosalía en Padrón. O motivo da entrevista-conversa é para que nos comente o que están a propoñer para o día 23 de febreiro con motivo da celebración do "Día de ROSALÍA",  mediante o Caldo de Gloria. Teñen nada menos que uns sesenta mil manteis de papel para entregar a tódolos que o desexen, poñéndose en contacto coa Fundación na súa páxina rosalia.gal. Tamén nos fala da posibilidade de recoller un agasallo que ofrecen a tódolos que merquen un libro nas librerías Galegas consistente nun libriño que recolle obras de Rosalía. Comentamos que se poden facer "Amigos de Rosalía" cunha pequena aportación anual para a poiar o traballo que están a facer. Agradecémoslle a súa participación no programa.

E despedímonos ate o vindeiro xoves á mesma hora. ¡Que sexan felices!

Aquí podedes escoitar o programa enteiro.

XOVES 1 de FEBREIRO Do 2024

Un xoves máis con todos vosoutros. Comezamos coa nosa sintonía e as salutacións para despois ofrecedrlles unha primicia musical que nos envióu "Bieitiño Romero": "Beo-Canto Raibas", que nos sirve para recibir a primeira convidada de hoxe: dona BEGOÑA BLANCO BLANCO, Concelleira de Educación, Cultura, Turismo e Política Lingüística do Excmo.Concello de Lalín. Agradecémoslle a súa amable atención e felicitámola pola celebración da "LVI Feira do Cocido de Lalín". Fainos unha pequena descrición das moitas actividades e eventos que se realizan neste evento tan importante que está declarado de Interese Turístico Internacional. Desexámoslle que teñan moitos éxitos.

A segunda intervención é a de dona HORTENSIA BAUTISTA FERNÁNDEZ, de "Chambo-Libris", que nos fala desa Ascicación Cultural sin ánimo de lucro, que ven realizando un labor moi interesante relacionado cos libros e a súa utilización. Teñen un blog onde especifican as actuacións e actividades que veñen realizando, entre as que destacan a presentación delibros, a entrega dos mesmos a outras bibliotecas e persoas con dificultades, os Recitais Poético-Musicais... etcetera. Seguiremos en contacto.

Escoitamos outro bocadiño de música e conectamos co noso correspondente comunicador e viaxeiro incansable, XOAN ARCO DA VELLA, que comenta con nosoutros algúns aspectos das súas publicacións fotográficas do noso patrimonio popular, nesta ocasión moi relacionadas cos cruceiros, cos petos das ánimas, cos muiños do Folón e do Picón, cos fornos comunais... ... unha verdadeira fonte de coñecementos tradicionais e populares moi interesantes.

Continuamos o programa e falamos agora con CARLOTA IGLESIAS, Sumelier do Restaurante "Cabanas" en Lalín, que ven de recibir o Premio Juli Soler ao Talento e Futuro do viño, promovido pola Spanish Wine Academy de Ramón Bilbao.  Felicitámola e dámoslle os nosos parabens por acadar tan prestixioso galardón. Fálanos da súa traxectoria vocacional e persoal, da súa dedicación e traballo nese Restaurante que ela define como familiar, pero cheo de prestixio e de grande sona na contorna. Ofrecen uns menús moi variados con moita calidade e grande diversidade. Augurámoslle moita sorte e moitos éxitos. Voltaremos a conectar con ela cando pase esta tempada do Cocido, que tanta demanda está a ter. Agradecémoslle a súa participación.

E despedímonos ate o vindeiro xoves á mesma hora.

Deixamos aquí o programa enteiro.

XOVES 25 de XANEIRO do 2024

Un programa máis con todos vosoutros. Comezamos coa nosa sintonía de cada semana e despois das salutacións escoitamos unha peza do ultimo CD de LELÍA, para recibir á poeta TERESA RIOS, de Ponteareas, que nos falará do seu último libro de poemas: "Corpo Nomade", que foi Accésit do Certame de Poesía Erótica "ILLAS SISARGAS". Aproveitamos para felicitala e coméntanos algo da súa producción literaria e da súa creatividade poética. Agradecémoslle a súa atención e agasállanos coa lectura dun fermoso poema seu. Desexamos que siga tendo moitos éxitos.

A seguinte intervención é a de BIEITO ROMERO, do Grupo LUAR na LUBRE, que virá a Barcelona a presentar o seu último CD, que leva por título ENCRUCILLADA XX. Teremos a sorte de disfrutar da súa actuación no Festival Musical de Barnasants o día 16 de febreiro próximo. Mañá mesmo farán un grande concerto no Teatro Capitol da Coruña, ao que asistirán unha boa presa de artistas que os acompañarán na actuación. Precisamente falounos do Libro-CD que veñen a presentar, seguindo a Xira que están a realizar, que conten 16 cancións. O libro ten unha serie de fotografías moi interesantes así como escritos de moitos amigos e personaxes importantes da nosa música galega. Desexamoslles moita sorte e moitos éxitos.

Continuamos a segunda hora dándolle paso ao noso correspondente na capital da Ribeira Sacra, Monforte de Lemos, XOSE MANUEL F. MONTES, encargado da sección QUEN CHE PREGUNTOU? que nos ilustra coas súas noticias escollidas en forma de Me Ghustan e Disghústanme. E finaliza cos seus apuntes de fraseoloxía e ditos galegos, recollidos na súa "libretiña pequena". Tamén nos envía a viñeta alusiva ao programa que compartimos, no parágrafo anterior. Un debuxo de Bieito Romero. ¡¡GRAZAS!!

Despois de escoitar unha peza do ARDENTÍA-Música Galega, conectamos con LUÍS PREGO, un dos compoñentes deste emblemático Grupo de música Galega, que nos fala da exitosa fórmula que acaban de compartir con todo o público, consistente e subir ás plataformas de Internet (Spotify, Youtube... etcétera), tódolos seus discos publicados ata o momento. Felicitámolo e dámoslle as grazas por ese agasallo que poderemos disfrutar todos.

 

E despedímonos ate o vindeiro xoves á mesma hora. Que sexan felices.

Deixamos aquí o programa completo.

XOVES 18 de XANEIRO do 2024

Un xoves máis con todos vosoutros. Comezamos coa nosa sintonía de sempre, as salutacións oportunas e despois de escoitar un bocadiño de música, conectamos con SARA RODRÍGUEZ FERNÁNDEZ, Licenciada e Traductora autora do "Diccionario galego do Bierzo", que xa vai pola súa segunda edición. A entrevista decorre con moita e agradable comunicación. Fainos un pequeno percorrido da súa traxectoria e traballo de investigación para poder editar ese Diccionario, que tivo como mentor a Henrique Costas, da Universidade de Vigo e outros profesores que arrouparon ese traballo engaiolante. Agradecémoslle a súa amable atención e desexámoslle que teña moitos éxitos.

A segunda intervención é a de SERGIO FERNÁNDEZ FERNÁNDEZ, un socio da Asociación Val de Torés, constructor e dono da Vivenda Rural: Casa Eladio. Fálanos do Patrimonio Cultural daquela zona, da Torre de Torés, da Torre de Doncos, do Pazo de Doncos... ...etc. A Asociación á que pertence está moi involucrada e poder restaurar e recuperar ese patrimonio tan importante para esa zona rural tan rica e patrimonio cultural. Precisan os permisos para poder realizar eses traballos de restauración. Agradecémoslle a súa amable atención e desexamos que teñan moita sorte.

Falamos agora co Presidente da Asociación de Bercianos en Catalunya (ASOBECAT) JUAN PEDRO SÁNCHEZ, que nos fala da próxima Rolda de Prensa que se realizará no Hotel Front Air Congress de Sant Boi o vindeiro día 27 de xaneiro ás 18h, para dar a coñecer a celebración do "XX Festival del Botillo en Catalunya" previsto para o mes de febreiro, no que se entregarán os galardóns oportunos aos Bercianos do ano e ao Concello berciano elexido este ano. Desexámoslle moitos éxitos.

Continuamos e poñémonos en contacto con ROSANA PRIETO, guia cultural e responsable do BNG na zona sur de Lugo, que nos fala la próxima celebración da Concentración simultánea que se realizará na Estación de Sants de Barcelona e na Estación de ferrocarril en Monforte de Lemos, o vindeiro día 27 ás 12h da mañá, para reivindicar a reposición e posta en marcha do Tren Nocturno que facía o traxecto Barcelona-Galicia e viceversa. Ogallá que sexa todo un éxito esta concentración.

Recibimos a visita, nos estudios do Vicepresidente da Asociación de Bercianos en Catalunya (ASOBECAT) ALFONSO MIGUEL MARTIN, xunto con Pepe o peluqueiro do Bierzo, que nos visitan para dar a coñecer e completar a información xa anunciada por Juan Pedro, da celebración da "Rolda de Prensa" prevista para o día 27 ás 18h no Hotel Front Air Congress de Sant Boi, para informar do "XX Festival del Botillo en Catalunya", previsto para o día 18 de febreiro próximo. Tamén nos comunican a entrega dos galardóns ao adegueiro JAVIER ÁLVAREZ, da adega Almazcara-Majara, a Juan Pablo Gándara de Toreno, escritor e ao Concello de Corullón. Desexamos que teñan un grande éxito.

Despedímonos ate o vindeiro xoves á mesma hora. Deixamos aquí o programa completo.

XOVES 11 de XANEIRO do 2024

Comezamos o ano dándolles a benvida coa nosa sintonía de sempre e despois de escoitar un bocadiño de música poñémonos en contacto con GUMER PORTAS LÓPEZ, responsable de comunicación de RADIO LALÍN (Pontevedra). Un novo fichaxe para a nosa emisión, dende Galicia. Agradecémoslle a súa amable atención e recibimos unha colaboración moi interesante, relacionada con variass actividades e actuacións previstas na localidade de Lalín. Fálanos da próxima "Feira do Cocido de Lalín", declarada de Interese Turístico Internacional,  que será a cincuenta e sete edición, que xa se coñece o autor do cartel anunciador -Fernando Pereira, que ademais terá como pregoeira a Yolanda Castaño,  Premio Nacional de Poesía 2023. En vindeiras datas seguro que poderemos ter en antena a algún dos responsables deste evento para poder recibir de primeira man as noticias e actos previstos (eso nos adianta Gumer). Fálanos da entrega de Premios Patrimonio Cultural do Seminario de Estudos do Deza, que será presentado precisamente por Gumer. Agradecémoslle a súa aportación e participación no noso programa de hoxe.

A segunda intervención é unha conversa con  dona MARINA SÁNCHEZ, escritora e poeta ourensana. Recibimos precisamente a súa participación escoitando un conto que ela mesmo nos envióu. Despois entrevistámola-conversamos e falamos da súa traxectoria creativa e poética, das súas intervencións en sendos actos interesantes, no Marcos Valcarcel, no Liceo de Ourense... ... etcétera. A súa creatividade está recollida en moitas publicacións, tanto en revistas como en xornais e nun seu propio canal cultural de comunicación. Ten varios libriños publicados e prometémonos voltar a conectar con ela nunha vindeira ocasión e comprometela para que nos declame algunha das súas poesías. ¡Moitas grazas Marina!

Conectamos agora co lugués LOIS PÉREZ, mestre, escritor, creador e poeta. Agradecémoslle a súa participación no programa de hoxe. Compartimos con tódolos nosos oíntes e seguidores o texto que nos facilitou:      "As nenas e os nenos, as crianzas, talvez elas sexan a única 'gloria bendita' que existe sobre a face deste mundo podre e traidor. Desprenden unha ardentía que lles é propia e, a través dese fío que nos pon en contacto co que un día fomos, distinguimos o mellor da condición humana no seu estado esencial: a inocencia, a fraxilidade imprevisíbel, o porvir esperanzado, a ilusión vulnerable, o amor puro onde aínda non intervén o cálculo e onde a probabilidade non importa nada cando se trata de arder de emoción, confiados unicamente a 'ser'. Iso que tantas veces vemos nos ollos dunha crianza e que nos ofrece algo parecido a unha verdade que se nos revela. Por iso, a infancia, si, é a gloria bendita deste mundo. Aí reside toda a forza transformadora que podería cambiar o mundo o día de mañá, a nosa única posibilidade de supervivencia como especie. Pero os que teiman en mandar no mundo cando só son emisarios da nada máis absoluta, teiman en asasinar nenas e nenos, crianzas, a centos, a milleiros. Noutras xeografias ensaian 'superpoderes' para disfrazaren ditaduras onde pagarán os de sempre. E asasinan tamén outro futuro posíbel deste mundo, xa só un soño esgotado, un tesouro baleiro, un eco xordo. Ten razón un bo amigo meu, un irmán, o Martiño, faloume o outro día de que estas son 'datas tramposas'. E si que o son. O espello que nos achegan estes días é máis límpido e transparente ca nunca e enfróntanos a un paradoxo incómodo: a nosa felicidade habita ao carón do horror, ese que se ve alí atrás do espello. E doe porque é unha obriga aproveitarmos a oportunidade de vida que se nos brinda pero case resulta imposíbel preguntarse que lugar habitamos, aboado a toda a atrocidade cruenta e inimaxinábel que desfila diante dos nosos ollos cada día en tempo real. Que xente estraña é esta que nos rodea, que pode envolverse nunha bandeira e agredir a quen non pensa coma ela e, porén, manifesta a súa indiferenza e o desprezo máis absoluto ao infanticidio máis terríbel que a nosa xeración vai contemplar nunca? Saben que van morrer como todos os demais? Saben que eles tamén foron nenos? Ou non saben absolutamente nada? Non senten absolutamente nada? Non soñaron nunca coa marabilla? Cando esqueceron que nada disto lles pertence máis cós outros?  Sabemos que a xustiza, a idea de xustiza, é un valor relativo na medida en que é unha construción abstracta que non ten entidade ningunha máis ca aquela que nós lle damos en cada tempo. Pero poucas veces coma esta precisamos tanto dela e de estarmos dacordo no que significa. Dela depende salvar o noso futuro ou caer dunha vez por todas na barbarie máis absoluta."   Precisamente baseamos a conversa sobre algunhas destas reflexións que nos transmite este escrito tan fermoso e engaiolante.  Desexámoslle feliz ano.

A ultima conexión é con Baldomero Iglesias, máis coñecido como MERO, fundador de "Fuxan o Ventos" e tamén do Grupo folk "A QUENLLA". Falamos con el do seu ultimo traballo publicado: "Na Lírica emoción". Un CD con 12 pezas dedicadas íntegramente ao poeta e escritor AVELINO DÍAZ, exiliado en Bos Aires, que sempre mostrou o seu posicionamento claro contra a dictadura, contruíu país dende a diáspora e deixou un intenso traballo.  Cóntanos cousas moi interesantes deste seu traballo e prometémonos adquirilo para poder compartilo con tódolos nosos oíntes e seguidores. Agradecémoslle a súa amable atención e desexamos que sigan acadando moitos éxitos.

Despedímonos ate o vindeiro xoves á mesma hora. Deixamos aquí o programa completo.