XOVES 27 de MAIO do 2021

Outra emisión máis deste noso programa "Galegos no BAIX", con ganas de aprender e informar dalgunhas cousas interesantes. Comezamos coa nosa sintonía e conectando con Oliver Fernández, Presidente da A.C.G.Rosalía de Castro para que nos informe da próxima celebración do 40+1 Aniversario da Entidade, que para conmemorar ese evento teñen previsto facer a ofrenda floral no busto de Rosalía de Castro en Can Mercader, así como unha actuación excepcional no colexio Torre de la Miranda (C/ Almogávares,10 de Cornellà), o día 5 de XUÑO. Participarán o Coro Rociero da Hermandade de Cornellà, a Batucada Aritmia, o cuarteto EVOÉH, as pandereteiras "Rosalieiras" e o Grupo da Entidade. Os actos serán completamente gratuitos pero terán que anotarse no teléfono 620 236 571, para cumplir coas normativas sanitarias do coronavirus. Desexámoslles moitos éxitos.

Dámoslle paso, a seguir, ao noso colaborador Henrique Fernández-Mon Sánchez, e a Oriana Méndez, filóloga galega, escritora, poeta e actualmente concellal no Concello de Vigo. Agradecémoslle a súa participación no noso programa de hoxe. Ven de recibir o "XVIII Premio de Poesía A Fundación" polo seu libro "Interna". Felicitámola e mantemos unha breve conversa para sabermos algo máis da súa traxectoria creativa. Agradecémoslle estes minutos que nos concedeu.

Continuamos, na segunda hora coa crónica do noso correspondente en Monforte de Lemos, Xosé Manuel F.Montes, encargado da sección QUEN CHE PREGUNTOU? na que nos comunica as súas escollas informativas en forma de Ghústanme e Desghústanme, acompañadas dalgunhas notas extraídas da súa libretiña pequena, como Refráns populares e ditos interesantes. Tamén nos envía a súa "viñeta" alusiva a algún momento do programa, que hoxe ten que ver co poeta Lois Pereiro. ¡Moitas Grazas!

A seguinte conversa-entrevista é con Diego Veiga, componente do Grupo Musical MOURA, de quen vimos escoitando algunha peza musical que recibimos hai uns días, como é a Muiñeira Maruxaina, coa que o recibimos e dámoslle as grazas por atendernos. Fálanos da composición dese Grupo Musical que basea as súas interpretacións na fusión da música tradicional co rock, dándolle un impulso e unha expresión musical moi rompente, moi nova e introspectiva, como el mesmo a define. Seguiremos a súa traxectoria e desexámoslles moitos éxitos.

Despedímonos ate o vindeiro xoves. Que teñan unha feliz semana. Aquí podedes escoitar o programa enteiro.