XOVES 15 de FEBREIRO Do 2024

Oli Xiráldez

Outro xoves máis con todos vosoutros, para ofrecerlles dúas horas de Radio en Galego. Hoxe con visita incluída, en directo e en primicia para tódolos nosos oíntes e seguidores. Despois da nosa sintonía, as salutacións e ben-vinda, ofrecémoslles escoitar a Alborada de Rosalía interpretada por Oli Xiráldez e Chuco Estévez, para recibir precisamente a OLI XIRÁLDEZ, Luthier de Gaitas e Frautas Galegas. Felicitámolo porque está elixido para representar a Galicia nunha exposición de artesáns de instrumentos musicais en Coimbra (Portugal). Aproveitamos para falar do seu taller, dos instrumentos que fabrica, da súa implicación e participación na Asociación de Gaiteiros de Galicia, como Vicepresidente. Convídanos a que participemos no grande evento que esa Asociación realiza cada ano en Guitiriz. Tamén temos tempo para falar da colaboración, dende fai trece anos, que teñen coa "Casa de Rosalía" en Padrón. Unha honra telo na nosa emisión. Desexamos que teña moita sorte e moitos éxitos.

Manuel Suárez

A continuación poñémonos en contacto con MANUEL SUÁREZ SUÁREZ, doutor en Dereito e Ciencias Sociais, que foi Secretario do Patronato da Cultura Galega en Uruguay. Cóntanos ese suceso que lle aconteceu cando tiña cinco anos en Baio. Estaba xogando cun amigo e compañeiro nun lugariño perto do monte, cando foi atacado por unha loba que o feriu gravemente, e que foi rescatado polo seu padrin, aínda que con algo de inquedanza, porque a loba tratara de escondelo entre unhas pedras. Despois das vicisitudes que sofriu, porque tivo que ser trasladado a Santiago de Compostela para curalo e facerlle unha transfusión de sangue, a súa inquedanza estaba nos aconteceres posteriores, xa que a xente quería interesarse pola circunstanciaa acontecida e incomodábase e case se agobiaba con tanta pregunta. Falamos tamén da súa estancia en Uruguay e da súa experiencia e relación con grandes persoeiros da nosa Cultura Galega en Montevideo. Deixamos para outra ocasión a súa faceta como representante en Galicia da Fundación "Carlos Gardel" e da Academia Nacional do Tango en Uruguay. Agradecémoslle a súa participación no programa de hoxe.

Falamos agora coa escritora e poeta FINA TIZÓN FRAGA, que nos ven a presentar o seu último libro de relatos: "CÍRCULO DE VIDAS". Coméntanos cómo foi o traballo de confección e creación dese libro de relatos escrito en castelán e galego. Agasállanos coa lectura dun deles, en galego. O libro está accesible para todo o público que desexa adquirilo poñéndose en contacto con ela polo messenger ou na súa propia páxina. Aínda non tivo tempo para presentalo públicamente, por eso lle agradecemos a súa presentación nesta nosa humilde emisión radiofónica. Desexamos que teña moito éxito.

Pablo Deiros

Escoitamos a peza titulada: "Dime que volverás" que está interpretada por PABLO DEIROS DÍAZ, un rapaz de Becerreá, que está estudiando Administración de Empresas e que compaxina os estudos con traballos de DJ en discotecas de Lugo e outras cidades, como Vigo, Madrid e outras. Ten feito algúns concertos en diversos locais, e pódese dicir que é un autodidacta casi completo, xa que ademais de compoñer e cantar tamén toca o piano, a guitarra e a batería... Agradecémoslle a súa participación de hoxe no programa e desexámoslle que teña moito éxito na súa andaina musical, e despedímolo coa súa propia canción.

Despedímonos ate o vindeiro xoves e deixamos aquí o programa enteiro.

XOVES 8 de FEBREIRO DO 2024

Comezamos outra emisión do noso programa coa sintonía de sempre, as salutacións oportunas e escoitamos unha peza de música do escritor e músico FRANCISCO CASTRO, a quen chamamos para que nos poña ao corrente da súa nova andaina, despois de deixar a súa responsabilidade na Editorial Galaxia. Agradecémoslle a súa amable atención e felicitámolo por ese primeiro CD que acaba de publicar. Cóntanos algunhas cousas interesantes relacionadas co seu quefacer diário e das propostas e proxectos que ten previstos. Desexámoslle moita sorte e moitos éxitos.

A seguinte intervención é con JUAN PEDRO SÁNCHEZ, Presidente de ASOBECAT, que nos presenta ao Ilmo.Sr.Alcalde de Corullón, don LUIS ALBERTO ARIAS, Concello elexido para homenaxear este ano no "XX Festival del Botillo 2024, en Cataluña". Comentamos algunhas cousas interesantes relacionadas con ese Concello, ao que nos convida visitar o Sr. Alcalde. Son productores de castañas e tamén de viño e de cereixas. Un pobo Berciano que paga a pena coñecer e que a súa Concelleira de Cultura, dona Consuelo López Pérez virá a recoller ese galardón en nome do Sr. Alcalde.

 

Continuamos o programa poñéndonos en contacto con LUCIANO PÉREZ, mestre artesán no Obradoiro de Instrumentos tradiconais na Deputación de Lugo. Estivo na inauguración da exposición que aínda está na Biblioteca da Universidade de Barcelona. Fálanos da confección dos instrumentos, dos proxectos tan interesantes que están a realizarse no Obradoiro da Deputación e tamén nos anuncia que estará, novamente na Universidade de Barcelona o vindeiro día 21, para visitas guiadas na exposición dos Instrumentos na universidade. Agradecémoslle a súa amable atención.

Despois de escoitar outra peza de música conectamos con ROCÍO CASTRO, da Fundación Rosalía de Castro, a Casa de Rosalía en Padrón. O motivo da entrevista-conversa é para que nos comente o que están a propoñer para o día 23 de febreiro con motivo da celebración do "Día de ROSALÍA",  mediante o Caldo de Gloria. Teñen nada menos que uns sesenta mil manteis de papel para entregar a tódolos que o desexen, poñéndose en contacto coa Fundación na súa páxina rosalia.gal. Tamén nos fala da posibilidade de recoller un agasallo que ofrecen a tódolos que merquen un libro nas librerías Galegas consistente nun libriño que recolle obras de Rosalía. Comentamos que se poden facer "Amigos de Rosalía" cunha pequena aportación anual para a poiar o traballo que están a facer. Agradecémoslle a súa participación no programa.

E despedímonos ate o vindeiro xoves á mesma hora. ¡Que sexan felices!

Aquí podedes escoitar o programa enteiro.

XOVES 1 de FEBREIRO Do 2024

Un xoves máis con todos vosoutros. Comezamos coa nosa sintonía e as salutacións para despois ofrecedrlles unha primicia musical que nos envióu "Bieitiño Romero": "Beo-Canto Raibas", que nos sirve para recibir a primeira convidada de hoxe: dona BEGOÑA BLANCO BLANCO, Concelleira de Educación, Cultura, Turismo e Política Lingüística do Excmo.Concello de Lalín. Agradecémoslle a súa amable atención e felicitámola pola celebración da "LVI Feira do Cocido de Lalín". Fainos unha pequena descrición das moitas actividades e eventos que se realizan neste evento tan importante que está declarado de Interese Turístico Internacional. Desexámoslle que teñan moitos éxitos.

A segunda intervención é a de dona HORTENSIA BAUTISTA FERNÁNDEZ, de "Chambo-Libris", que nos fala desa Ascicación Cultural sin ánimo de lucro, que ven realizando un labor moi interesante relacionado cos libros e a súa utilización. Teñen un blog onde especifican as actuacións e actividades que veñen realizando, entre as que destacan a presentación delibros, a entrega dos mesmos a outras bibliotecas e persoas con dificultades, os Recitais Poético-Musicais... etcetera. Seguiremos en contacto.

Escoitamos outro bocadiño de música e conectamos co noso correspondente comunicador e viaxeiro incansable, XOAN ARCO DA VELLA, que comenta con nosoutros algúns aspectos das súas publicacións fotográficas do noso patrimonio popular, nesta ocasión moi relacionadas cos cruceiros, cos petos das ánimas, cos muiños do Folón e do Picón, cos fornos comunais... ... unha verdadeira fonte de coñecementos tradicionais e populares moi interesantes.

Continuamos o programa e falamos agora con CARLOTA IGLESIAS, Sumelier do Restaurante "Cabanas" en Lalín, que ven de recibir o Premio Juli Soler ao Talento e Futuro do viño, promovido pola Spanish Wine Academy de Ramón Bilbao.  Felicitámola e dámoslle os nosos parabens por acadar tan prestixioso galardón. Fálanos da súa traxectoria vocacional e persoal, da súa dedicación e traballo nese Restaurante que ela define como familiar, pero cheo de prestixio e de grande sona na contorna. Ofrecen uns menús moi variados con moita calidade e grande diversidade. Augurámoslle moita sorte e moitos éxitos. Voltaremos a conectar con ela cando pase esta tempada do Cocido, que tanta demanda está a ter. Agradecémoslle a súa participación.

E despedímonos ate o vindeiro xoves á mesma hora.

Deixamos aquí o programa enteiro.

XOVES 25 de XANEIRO do 2024

Un programa máis con todos vosoutros. Comezamos coa nosa sintonía de cada semana e despois das salutacións escoitamos unha peza do ultimo CD de LELÍA, para recibir á poeta TERESA RIOS, de Ponteareas, que nos falará do seu último libro de poemas: "Corpo Nomade", que foi Accésit do Certame de Poesía Erótica "ILLAS SISARGAS". Aproveitamos para felicitala e coméntanos algo da súa producción literaria e da súa creatividade poética. Agradecémoslle a súa atención e agasállanos coa lectura dun fermoso poema seu. Desexamos que siga tendo moitos éxitos.

A seguinte intervención é a de BIEITO ROMERO, do Grupo LUAR na LUBRE, que virá a Barcelona a presentar o seu último CD, que leva por título ENCRUCILLADA XX. Teremos a sorte de disfrutar da súa actuación no Festival Musical de Barnasants o día 16 de febreiro próximo. Mañá mesmo farán un grande concerto no Teatro Capitol da Coruña, ao que asistirán unha boa presa de artistas que os acompañarán na actuación. Precisamente falounos do Libro-CD que veñen a presentar, seguindo a Xira que están a realizar, que conten 16 cancións. O libro ten unha serie de fotografías moi interesantes así como escritos de moitos amigos e personaxes importantes da nosa música galega. Desexamoslles moita sorte e moitos éxitos.

Continuamos a segunda hora dándolle paso ao noso correspondente na capital da Ribeira Sacra, Monforte de Lemos, XOSE MANUEL F. MONTES, encargado da sección QUEN CHE PREGUNTOU? que nos ilustra coas súas noticias escollidas en forma de Me Ghustan e Disghústanme. E finaliza cos seus apuntes de fraseoloxía e ditos galegos, recollidos na súa "libretiña pequena". Tamén nos envía a viñeta alusiva ao programa que compartimos, no parágrafo anterior. Un debuxo de Bieito Romero. ¡¡GRAZAS!!

Despois de escoitar unha peza do ARDENTÍA-Música Galega, conectamos con LUÍS PREGO, un dos compoñentes deste emblemático Grupo de música Galega, que nos fala da exitosa fórmula que acaban de compartir con todo o público, consistente e subir ás plataformas de Internet (Spotify, Youtube... etcétera), tódolos seus discos publicados ata o momento. Felicitámolo e dámoslle as grazas por ese agasallo que poderemos disfrutar todos.

 

E despedímonos ate o vindeiro xoves á mesma hora. Que sexan felices.

Deixamos aquí o programa completo.

XOVES 18 de XANEIRO do 2024

Un xoves máis con todos vosoutros. Comezamos coa nosa sintonía de sempre, as salutacións oportunas e despois de escoitar un bocadiño de música, conectamos con SARA RODRÍGUEZ FERNÁNDEZ, Licenciada e Traductora autora do "Diccionario galego do Bierzo", que xa vai pola súa segunda edición. A entrevista decorre con moita e agradable comunicación. Fainos un pequeno percorrido da súa traxectoria e traballo de investigación para poder editar ese Diccionario, que tivo como mentor a Henrique Costas, da Universidade de Vigo e outros profesores que arrouparon ese traballo engaiolante. Agradecémoslle a súa amable atención e desexámoslle que teña moitos éxitos.

A segunda intervención é a de SERGIO FERNÁNDEZ FERNÁNDEZ, un socio da Asociación Val de Torés, constructor e dono da Vivenda Rural: Casa Eladio. Fálanos do Patrimonio Cultural daquela zona, da Torre de Torés, da Torre de Doncos, do Pazo de Doncos... ...etc. A Asociación á que pertence está moi involucrada e poder restaurar e recuperar ese patrimonio tan importante para esa zona rural tan rica e patrimonio cultural. Precisan os permisos para poder realizar eses traballos de restauración. Agradecémoslle a súa amable atención e desexamos que teñan moita sorte.

Falamos agora co Presidente da Asociación de Bercianos en Catalunya (ASOBECAT) JUAN PEDRO SÁNCHEZ, que nos fala da próxima Rolda de Prensa que se realizará no Hotel Front Air Congress de Sant Boi o vindeiro día 27 de xaneiro ás 18h, para dar a coñecer a celebración do "XX Festival del Botillo en Catalunya" previsto para o mes de febreiro, no que se entregarán os galardóns oportunos aos Bercianos do ano e ao Concello berciano elexido este ano. Desexámoslle moitos éxitos.

Continuamos e poñémonos en contacto con ROSANA PRIETO, guia cultural e responsable do BNG na zona sur de Lugo, que nos fala la próxima celebración da Concentración simultánea que se realizará na Estación de Sants de Barcelona e na Estación de ferrocarril en Monforte de Lemos, o vindeiro día 27 ás 12h da mañá, para reivindicar a reposición e posta en marcha do Tren Nocturno que facía o traxecto Barcelona-Galicia e viceversa. Ogallá que sexa todo un éxito esta concentración.

Recibimos a visita, nos estudios do Vicepresidente da Asociación de Bercianos en Catalunya (ASOBECAT) ALFONSO MIGUEL MARTIN, xunto con Pepe o peluqueiro do Bierzo, que nos visitan para dar a coñecer e completar a información xa anunciada por Juan Pedro, da celebración da "Rolda de Prensa" prevista para o día 27 ás 18h no Hotel Front Air Congress de Sant Boi, para informar do "XX Festival del Botillo en Catalunya", previsto para o día 18 de febreiro próximo. Tamén nos comunican a entrega dos galardóns ao adegueiro JAVIER ÁLVAREZ, da adega Almazcara-Majara, a Juan Pablo Gándara de Toreno, escritor e ao Concello de Corullón. Desexamos que teñan un grande éxito.

Despedímonos ate o vindeiro xoves á mesma hora. Deixamos aquí o programa completo.

XOVES 11 de XANEIRO do 2024

Comezamos o ano dándolles a benvida coa nosa sintonía de sempre e despois de escoitar un bocadiño de música poñémonos en contacto con GUMER PORTAS LÓPEZ, responsable de comunicación de RADIO LALÍN (Pontevedra). Un novo fichaxe para a nosa emisión, dende Galicia. Agradecémoslle a súa amable atención e recibimos unha colaboración moi interesante, relacionada con variass actividades e actuacións previstas na localidade de Lalín. Fálanos da próxima "Feira do Cocido de Lalín", declarada de Interese Turístico Internacional,  que será a cincuenta e sete edición, que xa se coñece o autor do cartel anunciador -Fernando Pereira, que ademais terá como pregoeira a Yolanda Castaño,  Premio Nacional de Poesía 2023. En vindeiras datas seguro que poderemos ter en antena a algún dos responsables deste evento para poder recibir de primeira man as noticias e actos previstos (eso nos adianta Gumer). Fálanos da entrega de Premios Patrimonio Cultural do Seminario de Estudos do Deza, que será presentado precisamente por Gumer. Agradecémoslle a súa aportación e participación no noso programa de hoxe.

A segunda intervención é unha conversa con  dona MARINA SÁNCHEZ, escritora e poeta ourensana. Recibimos precisamente a súa participación escoitando un conto que ela mesmo nos envióu. Despois entrevistámola-conversamos e falamos da súa traxectoria creativa e poética, das súas intervencións en sendos actos interesantes, no Marcos Valcarcel, no Liceo de Ourense... ... etcétera. A súa creatividade está recollida en moitas publicacións, tanto en revistas como en xornais e nun seu propio canal cultural de comunicación. Ten varios libriños publicados e prometémonos voltar a conectar con ela nunha vindeira ocasión e comprometela para que nos declame algunha das súas poesías. ¡Moitas grazas Marina!

Conectamos agora co lugués LOIS PÉREZ, mestre, escritor, creador e poeta. Agradecémoslle a súa participación no programa de hoxe. Compartimos con tódolos nosos oíntes e seguidores o texto que nos facilitou:      "As nenas e os nenos, as crianzas, talvez elas sexan a única 'gloria bendita' que existe sobre a face deste mundo podre e traidor. Desprenden unha ardentía que lles é propia e, a través dese fío que nos pon en contacto co que un día fomos, distinguimos o mellor da condición humana no seu estado esencial: a inocencia, a fraxilidade imprevisíbel, o porvir esperanzado, a ilusión vulnerable, o amor puro onde aínda non intervén o cálculo e onde a probabilidade non importa nada cando se trata de arder de emoción, confiados unicamente a 'ser'. Iso que tantas veces vemos nos ollos dunha crianza e que nos ofrece algo parecido a unha verdade que se nos revela. Por iso, a infancia, si, é a gloria bendita deste mundo. Aí reside toda a forza transformadora que podería cambiar o mundo o día de mañá, a nosa única posibilidade de supervivencia como especie. Pero os que teiman en mandar no mundo cando só son emisarios da nada máis absoluta, teiman en asasinar nenas e nenos, crianzas, a centos, a milleiros. Noutras xeografias ensaian 'superpoderes' para disfrazaren ditaduras onde pagarán os de sempre. E asasinan tamén outro futuro posíbel deste mundo, xa só un soño esgotado, un tesouro baleiro, un eco xordo. Ten razón un bo amigo meu, un irmán, o Martiño, faloume o outro día de que estas son 'datas tramposas'. E si que o son. O espello que nos achegan estes días é máis límpido e transparente ca nunca e enfróntanos a un paradoxo incómodo: a nosa felicidade habita ao carón do horror, ese que se ve alí atrás do espello. E doe porque é unha obriga aproveitarmos a oportunidade de vida que se nos brinda pero case resulta imposíbel preguntarse que lugar habitamos, aboado a toda a atrocidade cruenta e inimaxinábel que desfila diante dos nosos ollos cada día en tempo real. Que xente estraña é esta que nos rodea, que pode envolverse nunha bandeira e agredir a quen non pensa coma ela e, porén, manifesta a súa indiferenza e o desprezo máis absoluto ao infanticidio máis terríbel que a nosa xeración vai contemplar nunca? Saben que van morrer como todos os demais? Saben que eles tamén foron nenos? Ou non saben absolutamente nada? Non senten absolutamente nada? Non soñaron nunca coa marabilla? Cando esqueceron que nada disto lles pertence máis cós outros?  Sabemos que a xustiza, a idea de xustiza, é un valor relativo na medida en que é unha construción abstracta que non ten entidade ningunha máis ca aquela que nós lle damos en cada tempo. Pero poucas veces coma esta precisamos tanto dela e de estarmos dacordo no que significa. Dela depende salvar o noso futuro ou caer dunha vez por todas na barbarie máis absoluta."   Precisamente baseamos a conversa sobre algunhas destas reflexións que nos transmite este escrito tan fermoso e engaiolante.  Desexámoslle feliz ano.

A ultima conexión é con Baldomero Iglesias, máis coñecido como MERO, fundador de "Fuxan o Ventos" e tamén do Grupo folk "A QUENLLA". Falamos con el do seu ultimo traballo publicado: "Na Lírica emoción". Un CD con 12 pezas dedicadas íntegramente ao poeta e escritor AVELINO DÍAZ, exiliado en Bos Aires, que sempre mostrou o seu posicionamento claro contra a dictadura, contruíu país dende a diáspora e deixou un intenso traballo.  Cóntanos cousas moi interesantes deste seu traballo e prometémonos adquirilo para poder compartilo con tódolos nosos oíntes e seguidores. Agradecémoslle a súa amable atención e desexamos que sigan acadando moitos éxitos.

Despedímonos ate o vindeiro xoves á mesma hora. Deixamos aquí o programa completo.

 

XOVES 14 de DECEMBRO do 2023

Comezamos outra emisión máis coa nosa sintonía de sempre, as salutacións e escoitamos unha peza da grande cantautora Guadi Galego, para darlle a ben-vinda a CLARA VIDAL, poeta coruñesa, recen gañadora do 1º Premio do "XXXVII Certame de Poesía Rosalía de Castro de Cornella-2023" polo seu poema "A Luz Ignota". Non hai moito tempo xa a felicitármos por ter acadado o Premio de Poesía Erótica das Illas Sisargas. Hoxe parabenizámola tamén e mantemos unha conversa moi enriquecedora e chea da interesantes novidades relacionadas coa súa creatividade e ampliando coñecementos sobre ese poema gañador. Tamén podedes atopar máis información sobre esta admirada escritora e poeta coruñesa, na súa páxina: claravidalpoemas.wordpress.com. Agradecémoslle a súa atención e desexámoslle que siga colleitando moitos éxitos.

Despedímonos de Clara e despois de escoitar outro bocadiño de música conectamos novamente con Galicia para falarmos con MARTIÑO MASEDA LOZANO, tamén gañador do 3º Premio do "XXXVII Certame de Poesía Rosalía de Castro de Cornellà-2023", polo poema "Teatro de Marionetas". Unha conversa moi enriquecedora. Fálanos do seu poema que é unha recreación de momentos actuais, nos que considera asistimos, como marionetas, a unha realidade na que os "grandes dominadores" fannos movernos de diversas formas, precisamente parodiando o simil de marionetas. Tamén nos informa do seu traballo a nivel persoal moi interesante. Mencionamos aquí os dous enlaces que podedes ligar, nos que se pode albiscar un pouco máis do seu labor cultural: culturalia.gal e republicadodesacougo.blogspot.com. Agradecémoslle a súa participación de hoxe no noso programa.

Na segunda hora de programa recibimos a crónica do noso correspondente na capital da Ribeira Sacra, Monforte de Lemos, XOSÉ MANUEL F. MONTES. Encargado da sección QUEN CHE PREGUNTOU? fainos partícipes dos seus "Ghústanme e desghústanme" relacionados coas noticias galegas que el mesmo escolle para coñecemento de tódolos nosos oíntes e seguidores. Finaliza coas anotacións da libretiña pequena, moi acaídas e con certa sorna ou retranca galega.

Falamos, a continuación, despois doutro bocadiño de música, con ARANCHA NOGUEIRA GOMEZ,  que tamén felicitamos e parabenizamos por ter acadado o Premio de aRitmar galiza e portugal, polo seu poema, xunto coa poetisa portuguesa María Isabel Fidalgo. Falounos do seu ultimo traballo "Antese" e tamén da súa etapa creativa e poética, xunto cos seus proxectos. Tamén nos comenta a súa situación actual un tanto delicada e desexámoslle que pronto se recupere e volva á situación normal para cumplir ese seu desexo de escribir e publicar eso que nos comenta adicado aos cativos. Desexámoslle que acade moita sorte e moitos éxitos.

Despedímonos ate o vindeiro ano.

 

¡QUE TEÑAN UNHA FELICES FESTAS NADALENCAS E UN FEITICEIRO ANINOVO 2024!

XOVES 30 de NOVEMBRO do 2023

Outro programa máis con todos vosoutros. Comezamos coa nosa sintonía, as salutacións e un bocadiño de música para poñernos en contacto, deseguida, con ANXO BARANGA, do Grupo de Teatro "Furafollas" e outras actividades máis, para que nos fale do evento que se celebrará este vindeiro sábado a partir das 12h da mañá no "Ateneu Roig", onde ofrecerá un concerto a cantautora e compositora galega SU GARRIDO POMBO, Un acto que forma parte dos moitos actos organizados dentro da "Biblioteca Sabela Labraña". Tamén nos informa doutras actividades máis, relacionadas co teatro, cos contos nos colexios... Agradecémoslle a súa atención e desexamos que teñan moitos éxitos.

Unha chamadiña a Galicia para falar con GUZMÁN, da 

Carnicería Murias-Embutidos Artesanais Petín S.L. (Ourense). Fálanos dos produtos artesanais que serve aos clientes que o soliciten. Todos de proximidade e realizados sen ningún tipo de conservantes nin aditivos. Tamén se lle poden pedir cabritos das montañas dos arredores, carne de vaca de primeira calidade, viño da D.O.Valdeorras, Mel, ectcétera... Aconsella aos nosos oíntes e seguidores que fagan os seus pedidos via internet, ou ao seu teléfono (988 311 552), ou visitando a súa páxina web. Agradecémoslle a súa información, moi axeitada para estas datas de Nadal, que seguro lle será util a algún dos nosos oíntes.

A seguinte intervención é a do noso correspondente  XOSÉ MANUEL F. MONTES, encargado da sección QUEN CHE PREGUNTOU. Comeza cos seus "Desghústanlle" e continúa cos "Ghústalle", que é un pequeno resumo das noticias escollidas para facérllelas partícipes aos nosos ointes. Despois fainos unhas "pílulas" recollidas na súa "libretiña pequena". Máis tarde fainos partícipe da súa "Viñeta" creativa que é unha alusión a un dos momentos interesantes da nosa emisión. Xa a emitimos no noso Facebook, pero agora facémola pública neste noso blog. ¡Moitas Grazas Xosé Manuel! Ata outro xoves. Que teñas unha feliz semana.

A continuación falamos con Marcelino de Santiago Viqueira, máis coñecido por KUKAS, "Os Monicreques" o "Titiriteiro máis antigo de Galicia". Agradecémoslle a súa atención e mantemos unha conversa moi amena e moi agradable falando da súa creatividade e dos moitos proxectos e propostas artísticas que están levando a cabo por toda Galicia adiante. Despedímonos ate outra ocasión.

A ultima entrevista-conversa é con ADRIÁN MÉNDEZ FERNÁNDEZ un dos responsables da celebración da "FOLIADA DA FONSAGRADA", prevista para os días 7, 8 e 9 de decembro, cun programa de actividades e actuacións moi interesantes. Por certo hoxe mesmo remata o proceso de inscrición para participar e para poder asistir á botelada prevista. Novidades e sorpresas que serán do agrado de tódolos asistentes. Augurámoslles moitos éxitos e moita sorte.

Despedímonos ate o vindeiro xoves, que non será o día 7 porque temos festa, senón o día 14 de decembro. Que sexan felices. Deixamos aquí o programa completo.

XOVES 23 de NOVEMBRO do 2023

Outro xoves máis con todos vosoutros. Comezamos coa nosa sintonía e salutacións de sempre. Escoitamos un bocadiño de música e recibimos á primeira convidada de hoxe, que é "Meryfos_" (en Instagram), creadora dun personaxe moi interesante "Virtudes" que fala en "castejano" moi retranqueiro e que ten un seguimento moi importante nas redes. Pedíronnos esoutro día que nos puxéramos en contacto con ela, que ten moitos seguidores e moi concretamente en Miami (EE.UU). Pois tivemos a sorte de que nos recibira e, despois de conversar con ela un ratiño, agasallounos cunha pequeniña intervención da súa "Virtudes" falando para tódolos nosos oíntes e seguidores. Agradecémoslle a súa amable atención e desexamos que siga acadando moitos éxitos. Tamén a convidamos a participar na revista "Lúa Nova" da nosa Asociación C.G.Rosalía de Castro de Cornellà.

Continuamos a emisión e conectamos novamente con Galicia, para recibir a "Toniño" compoñente de TREIXADURA. Parabenizámolo pola homenaxe que lle tributaron a Mingos, un dos compoñentes do Grupo, falecido hai un tempo, pero achegáronse a Barcia de Mera para acompañar á súa familia e a outras personalidades que se achegaron a aquela localidade, onde ademais reivindicaron o emprego do noso idioma galego en tódolas situacións, tamén nos cemiterios. Estiveron no programa LUAR da TVG, interpretando a famosa peza "Muiñeira de Santo Amaro", coreada por tódolos asistentes. Comentamos varias e interesantes cousas sobre ese grande Grupo Musical galego que tanto encandila nas súas actuacións.

A segunda hora comezámola conectando con LUCÍA FERRO, escritora e poeta lucense coa que comentamos algunhas cousas relacionadas coa súa creatividade escritor e poética. Precisamente estivo presentando o seu ultimo libro: "Brandan" na Librería Bahía de Foz", días atrás. Agasállanos coa lectura dun seu poema dedicado ás persoas deben procurar coidarse de sí mesmos. Convidámola a participar na nosa revista "Lúa Nova" da Asociación C.G. Rosalía de Castro de Cornellà. Agradecémoslle a súa participación no programa de hoxe.

Despois escoitamos unha peza que leva por título "Colgando", do Grupo Musical FACTORIA DE SUBSISTENCIA, para recibir a "Josito Porto" un dos músicos compoñentes. Agradecémoslle que nos atenda e conversamos con el sobre a composición do grupo: Josito Porto, Sabela Dacal, Rafa Otero e Adrián Ríos. Tamén nos fala das súas influencias musicais, dos contactos con outros músicos e compositores, do estudio de gravación AldeaGlobal de Pablo Vidal... Desexamos que teñan moita sorte na súa andaina musical.  E despedímonos ate o vindeiro xoves á mesma hora, coa súa música, claro.

Deixamos aquí o programa enteiro.

XOVES, 16 de NOVEMBRO do 2023

Comezamos outro programa máis coa nosa sintonía de sempre, as salutacións oportunas de cada semana e un bocadiño de música para poñernos en contacto con CLARA VIDAL, unha mestra, escritora e poeta da Coruña, a quen parabenizamos porque acaba de recibir o Premio do XVIII Certame de Poesía Erótica Illas Sisargas-2023, pola súa obra: "Masaxe con argán mal pronunciada". Fálanos dese poemario, que se publicará  por Editorial Caldeirón no ano que ven, 2024. Tamén nos comenta algo da súa creatividade escritora e poética, algúns Premios acadados e agradecémoslle a súa participación no programa de hoxe, desexándolle que siga colleitando moitos éxitos.

Continuamos a emisión, despois doutro bocadiño de música, para recibir a PABLO GONZÁLEZ, da Bodega EDV 2015 SLU. Saudámolo e parabenizámolo por ter acadado varias Medallas de Ouro cos seus viños no Certame que se celebrou en Italia, concretamente no Val de Aosta, na Celebración do "Mondial des vins extremes". Precisamente acudirá a Roma a recoller esas medallas de Ouro o vindeiro día 1 de decembro. Tamén nos comenta a súa participación e ponencia recente no "I Congreso do Control da Velutina", así como tamén nos fai saber que pronto porán no mercado Mel de Galicia, da Ribeira Sacra, procendente dunha súa finca axeitada para tal recolección. Agradecémoslle a súa aportación no noso programa de hoxe e desexámoslle que siga tendo moita sorte e moitos éxitos.

Dámoslle paso ao noso correspondente na capital da Ribeira Sacra, Monforte de Lemos, XOSÉ MANUEL F. MONTES, encargado da sección QUEN CHE PREGUNTOU? que desenvolve cos seus "Me ghustan e Desghústanme", escollendo as novidades e informacións máis salientables que acontecen en Galicia. Sempre moi interesantes. Tamén nos aporta as anotacións da súa "libretiña pequena", ocurrencias e apuntes que viña recollendo das diferentes intervencións e aconteceres que atopa no seu decorrer diário ou nalgún acontecemento. Tamén nos envía a súa "viñeta" relacionada con algún momento da emisión do noso programa, onde figura algunha frase ou comentario emitido. Agradecémoslle a súa colaboración.

 

Despois escoitamos unha peza do "Orfeón TREIXADURA" para darlle entrada a PAULO NOGUEIRA PORTO, gaiteiro compoñente deste grande grupo musical con máis de trinta anos de traxectoria musical e interpretativa. Parabenizámolo por teren realizado unha homenaxe a "Mingos" na súa parroquia natal, Barcia de Mera. Foi un acotecemento moi emotivo ao que asistiron moitos simpatizantes e amigos non só de Mingos senón tamén de Treixadura así como tamén a súa dona Fini e os seus propios fillos, Miriam, Fran e Mingos. Unha exaltación da persoa e unha posta en valor do emprego do noso idioma galego no cemiterio. Tamén tiveron unha actuación importante no programa LUAR da TVG o pasado venres. Agradecémoslle a súa participación no programa de hoxe e aproveitamos para despedirnos coa súa música e desexarlles que teñan unha feliz semana. Ate o vindeiro xoves á mesma hora.

Deixamos aquí o programa enteiro.

XOVES 9 de NOVEMBRO do 2023

No programa de hoxe tivemos a ocasión de comprobar que "Radio Sant BOI" escóitase en Estados Unidos, concretamente en MIAMI. Por aquelas casualidades da vida chamamos a Fina Martínez Fraiz, para felicitala, xa que estaba de cumpleanos. Ao parecer hai un grupo de persoas que se reúnen para escoitar o noso programa. A verdade é que nos enche de satisfacción e hónranos coa súa escoita.

Despois da nosa sintonía de sempre, e das salutacións oportunas escoitamos un bocadiño de música e poñémonos en contacto con ADRIÁN, da Asociación Finca Moreiras, que se dedican á crianza de cabalos de Pura Raza Galega. Teñen unha serie de actividades relacionadas cos cabalos salvaxes daquela zona da Serra da Groba, concretamente en Mougás-Oia (Pontevedra). Fan Hipoterapia con grupos reducidos, Terapia de Comportamento, Terapia Ecuestre, Educación e desenvolvemento persoal... etcétera. Agradecémoslle a súa participación no programa de hoxe.

Falamos con FINA MARTÍNEZ FRAIZ, para felicitala, polo seu cumpleanos. Desexámoslle que cumpla moitos máis, chea de saúde. A verdade é que nos fai moita ilusión comprobar que dende MIAMI (Estados Unidos) teñamos escoitantes e seguidores do noso programa. Seguiremos en contacto con Fina e comprometémonos a seguir conectando en próximas ocasións para que nos describan algunha das actividades que realizan, posto que como nos dí seica hai unha boa colonia de galegos-cubanos alí.

Conectamos con ALBA CUQUEJO, Profesora de Galego na Aula de Idiomas e organizadora, xunto con Estudis Gallecs-UAB, o Recital Poético previsto para o sábado día 11 de novembro ás 18h no Centro Galego de Barcelona. Participarán Tamara Andrés, co seu libro "Irmá paxaro", Ánxela Lema e Sara Villar co seu libro "Excéntricas". Desexámoslle que teñan unha grande asistencia de público e moitos éxitos.

A continuación recibimos a crónica do noso correspondente na capital da Riberia Sacra (Monforte de Lemos), XOSÉ MANUEL F. MONTES, encargado da sección Quen che Preguntou? na que sempre escolle os seus Me ghusta e Desghustan para achegarnos as informacións máis relevantes que el mesmo escolle. Tamén nos aporta as "anotacións particulares da súa libretiña pequena". Agradecémoslle-lo.

Falamos con ÁNXELA LEMA PARÍS, escritora, investigadora e poeta, autora do libro de poemas escrito "a catro mans" que presentaráa no Centro Galego de Barcelona, tal e como nos indicaba Alba Cuquejo ao comezo do programa. Confírmanos que acaba de entregar un seu traballo que seguro sairá publicado na próxima primavera do 2024. Desexámoslle moita sorte.

Felicitamos a "MASHA", María Álvarez Martínez,  porque acaba de gañar o "XV Premio de Poesía Victoriano Taibo de Gondomar", polo seu traballo que leva por título "Dakota". ¡Moitos parabens, "Masha"!!! Xa tiñamos falado con esta autora, tempo atrás, xa que fora premiada tamén no Certame de Poesía Rosalía de Castro de Cornellà. Desexamos que siga colleitando moitos éxitos.

E despedímonos ate o vindeiro xoves á mesma hora.

 ¡Que teñan unha feliz semana!

XOVES 02 de NOVEMBRO do 2023

Nova emisión. Dúas horas de Radio en Galego. Despois da sintonía e das salutacións, escoitamos un bocadiño de música e conecta con MANOLO FOTEIRO, da Fonsagrada. Comentan a creación e reportaxe relacionado co Hotel "Pórtico de A Fonsagrada", rexentado por un matgrimonio que decidiu darlle mellor vida á que foi casa do Alcalde. Novidades e informacións interesantes para tódolos nosos oíntes e seguidores. Moitas grazas Manuel, e moitos éxitos.

A continuación voltamos novamente a Galicia para falar con EDUARDO CARREIRA, un escritor e poeta que despois de comentar algunhas cuestións interesantes agasállanos, a tódolos oíntes e seguidores, coa declamación dunha creación poética da súa autoría. Agradecémoslle a súa aportación no programa de hoxe.

Por terceira vez voltamos novamente a Galicia para recibir a Xulio Couxil, que se atopa en Viana do Bolo. Casualmente asistiu onte a unha manifestación en "Defensa da Mina de Penouta". Precisamente aproveitamos a ocasión para comunicarnos con don JAIME PÉREZ BRANGER, Director Xeral da Empresa Strategic Minerals Spain, que explota esa Mina dende fai uns anos. Mantemos unha pequena conversa para coñecer máis polo miúdo cómo está ese asunto de paralización dos traballos da Mina e recibimos, de primeira man, información pormenorizada. Desexamos que teñan éxito na súa reclamación, para que non se peche a explotación que veñen realizando dende fai algúns anos.

 

A comunicación con ROBERTO IGLESIAS, do Restaurante-Pulpería "Os Pendellos", en Chantada. Falamos con Roberto Iglesias, que nos pon ao corriente das posibles ofertas que teñen na súa carta, con pratos de diferentes prezos e grande calidade. Sentimos moito a interrupción que sofrimos, quizais devido ao mal tempo que estamos a sofrir, e que afecta moi particularmente a Galicia. Desexamos que sigan tendo moita sorte e moitos éxitos.

Despedímonos ate o vindeiro xoves. Que teñan unha feliz semana e deixamos aquí o programa enteiro.