XOVES 12 de MARZO do 2020

Comezamos outra emisión máis deste programiña "Galegos no BAIX", dándolles a ben-vida e despois de ofrecerlles un bocadiño de música para conectarmos con UBALDO PÉREZ, do Restaurante Los Ancares, na rúa Robrenyo de Barcelona. Fálanos de que se cancela a celebración da "Calçotada" prevista para a vindeira a fin de semana do 12 de marzo, por mor do posible contaxio que pode producirse dese virus tan maléfico. Agradecémoslle a súa amable atención e colaboración co noso programa.

Saudamos a Max Pàrraga Díaz, un Filólogo Catalán, Professor de Llengua i Literatura a l'ESO i al Batxillerat, que pertence ao "Grupo GALAUDA", e que imparte clases de galego no Instituto para rapaces que teñen como optativa esa asignatura. Fálanos da súa experiencia e do éxito que ten acadado en anteriores edicións. Agradecémoslle a súa visita e concertamos que en vindeiras datas voltará a acompañarnos para compartir esta experiencia da radio.

Conectamos agora con Galicia para falar con dona BENEDICTA SÁNCHEZ, esa artista revelación que acadou un Premio Goya pola súa interpretación maxistral na película de Oliver Laxe: "O que arde". Felicitámola e falamos con ela da súa traxectoria, das súas impresións e outras cousas. Comprometémonos a voltar a "abordala" para seguir comentando cousas da súa traxectoria e agradecémoslle a súa implicación, como galega de raíz, e do honrados que nos sentimos dela.

Seguimos, na segunda hora, coa conexión con Xosé Manuel F. Montes, o noso correspondente na capital da Ribeira Sacra, Monforte de Lemos. Encargado da sección QUEN CHE PREGUNTOU? A súa crónica comeza coa escolla dos seus TOPs relacionados coas escollas noticiadas e continúa coas ofertas Festeiras en Galicia, para finalizar cos apuntes de fraseoloxía galega. Tamén nos envía a súa aportación creativa en forma de viñeta, alusiva a algún momento do programa de hoxe. ¡Grazas!

E finalizamos as intervencións de hoxe coa crónica da nosa correspondente na "Porta dos Ancares": Becerreá, FERNANDA FOLLANA NEIRA, que sempre ten algunhas notas informativas interesantes que comunicarnos.

A vindeira semana voltaremos, á mesma hora e con máis entrevistas, noticias e música. 

¡Sexan Felices!

XOVES 05 de MARZO do 2020

Comezamos outro progama máis con ganas de pasar dúas horiñas de radio en galego, con entrevistas, música galega e novidades interesantes. Despois das salutacións iniciais poñémonos en contacto con MERCHI ALVAREZ, Presidenta de GaliciAME, que nos pon ao corrente de varias novidades e informacións relacionadas con esa Asociación e as súas actividades. Desexámoslle moitos éxitos e prometémonos voltar a conectar con ela para que nos siga informando.

Escoitamos unha peza musical do ultimo disco de PAULIÑA: "Malfalada", unha roqueira de Cambados. Conectamos con ela e falamos da súa traxectoria, do seu CD e dos Concertos que ten previsto realizar. Agradecémoslle a súa amable atención e desexámoslle moitos éxitos.

Continuamos na segunda hora conectando co noso correspondente XOSÉ MANUEL F.MONTES, encargado da sección QUEN CHE PREGUNTOU? que ten preparada a súa sección cos apartados TOP das novidades, as recomendacións Festeiras, as recolleitas de frases populares e o seu envío da "viñeta" alusiva a algún momento da emisión de hoxe. ¡Moitas grazas Xosé Manuel!

Despois falamos con FERNANDA FOLLANA NEIRA, a quen parabenizamos polo éxito acadado na celebración dese evento deportivo no que ela mesma formou parte da súa elaboración e coordinación. Tamén nos comenta a realización de actos preparados pola Asociación "Teitos de Piornedo". Agrdecémoslle a súa participacións semanal, que tanto apreciamos.

A vindeira semana máis. ¡Agardámosvos!

XOVES 27 de FEBREIRO do 2020

Despois das salutacións iniciais, conectamos con Galicia para falar con don MANEL MONTEAGUDO, un escritor galego afincado en Noia, que nos fala do seu ultimo traballo, un libro que leva por título: "Camiño a lagoa dos bardos" de máis de catrocentas páxinas todo el escrito en verso, e segundo el mesmo nos informa, adicado ás mulleres. Fainos un agasallo lendo un dos seus poemas. Desexámoslle moitos éxitos.

Recibimos nos estudos a Ricard Ros, que nos ven a presentar o "Xº Festival RUBRIFOLKUM" que se celebrará os días 5, 6 e 7 de marzo. Tamén recibimos e saudamos aos dous compoñentes do "Grupo MoOom" - Ciara Cabodevila e Sebastián Serpell -. Ricard ponnos ao corrente das novidades que este ano teremos neste Festival Tradicionarius do Baix Llobregat. Escoitamos un bocado de música dalgún dos participantes neste evento.

Continuamos a conversa con eles, e aproveitamos a presencia de Ciara e Sebastián - Grupo MoOom - para que nos interpreten unha peza do seu repertorio.

Seguimos debullando as diversas actuación no "Rubrifolkum 2020" e escoitamos outro bocadiño máis de música doutro dos participantes neste Festival.

Tamén nos volven a interpretar outra peza de "MoOom". Despois depedímonos deles desexando que teñan moitos éxitos e contamos poder voltar a telos connosco para disfrutar da súa creatividade musical, tanto de Ricard Ros como de Ciara e de Sebastián.

A continuación conectamos coa nosa correspondente en Becerreá,  Fernanda Follana Neira, que ten preparada a súa crónica semanal relacionada con aquelas terras Ancaresas de Lugo.

Despois falamos con SÉS, María Xosé Silvar, que está en Barcelona, para presentar o seu ultimo traballo "Liberar as arterias". Precisamente mañá, venres día 21 ás 21h na Sala Luz de Gas, fará a súa presentación deste CD cun concerto para tódolos asistentes. Agradecémoslle a súa amable atención e desexámoslle moitos éxitos.

Que teñan unha feliz semana. O vindeiro xoves máis. ¡¡Agardámosvos!!

XOVES 20 de FEBREIRO do 2020

Un xoves máis con todos vosoutros. Comezamos escoitando un sigle "no salón das cereixas" que pertence ao CD "As catedrais Silenciadas" de Xabier Díaz e as Adufeiras. Precisamente a primeira intervención-entrevista é con XABIER que nos fala dese novo trballo tan interesante e dos concertos e a xira que teñen preparada para ir presentando este novo traballo. Concretamente a 1ª presentación será en Barcelona, con motivo do Tradicionarius, o día 21 de Marzo. Agradecémoslle a súa participación e atención que sempre nos dispensa. Desexámoslle moitos éxitos.

A segund conversa-entrevista é co Doutor PEDRO GUERRA, fundador e Director da Clínica Dental Valldaura, que será homenaxeado, como "Berciano Ilustre 2020" no XVII Festival del Botillo en Cataluña, que promociona e organiza ASOBECAT. Acompáñanos nos estudos o Presidente, Juan Pedro Sánchez, que participa na pequena terturlia que mantemos co Doutor.

Despois conectamosn novamente con Galicia para falar con EFREN ALVAREZ, dono, xunto con ANDRÉS da empresa  WETACA, que elabora comida para levar. Podedes escoller entre 20 pratos diferentes, 4 Entrantes e 4 postres... en próximas datas voltaremos a conectar con eles.

Conversamos con don VICTOR ROBLA, propietario da Adega Viños de Arganza, que nos comenta parte da historia e fundación desta explotación vinícola do Bierzo e que este ano será a encargada de regar e acompañar, cos seus tinto mencía e branco godello, ao XVII Festival do Botillo de Cataluña. Felicitámolo e desexámoslle que sigan colleitando moitos éxitos.

A seguinte comunicación é a do noso correspondente Xosé Manuel F. Montes que nos fai partícipe das noticias, e unha crónica semanal con tempo preciso para que non se alporicen. Comenta moi sucintamente a súa escolla das TOP semanais, sempre moi ben acaídas. Despois fala  das Festas Gastronómicas dagora e finaliza comentando algo enxebre, galego, que escoitou na última viaxe que tivo que facer a Vigo. Tamén nos envía a súa aportación viñetista. 

Seguimos adiante comentando as actividades relacionadas coa Asociación C.G.Rosalía de Castro, de Cornellà, e que seguro teremos tempo de amplialas e comentalas con máis detenemento en vindeiras datas. Cando menos quedan aquí reflexadas para tódolos nosos oíntes e seguidores.

E falamos con Juan Pedro Sánchez, Presidente de ASOBECAT, co que imos debullando toda a noticia que está relacionada co "XVII Festival do Botillo en Catalunya". Comentamos a elección dos "Bercianos Ilustres do 2020" que recaeron no "Doutor Pedro Guerra" (con quen falamos no comezo), e don Jesús Álvarez (párroco de Cacabelos e algunhas poboacións máis), dignos merecedores de ter acadado ese galardón polos seus méritos. Grandes e orgullosos Bercianos que participarán nese Festival antes mencionado. Dámoslle as gracias a todos e despedímonos ate a vindiera semana á mesma hora.

Non deixen de sintonizarnos. ¡Que teñan unha feliz semana!

XOVES 13 de FEBREIRO do 2020

Un xoves máis con todos vosoutr@s emitindo en galego perante dúas horiñas con noticias, comentarios, entrevistas e música galega. Dámoslle a benvida e conectamos con CIARA CABODEVILA, Responsable da Oficina de Turismo da Xunta de Galicia no Centro Galego de Barcelona. Unha conversa que nos achega información desa Oficina. Agradecémoslle a súa participación e voltaremos a comunicarnos para que nos siga dando noticias.

A segunda conversa-entrevista é co Ilmo.Sr.Alcalde de Navia de Suarna, don José Fernández Fernández, con quen mantemos unha conversa moi interesante relacionada coa próxima celebración da "XXX Festa da Androlla".

Recibimos nos estudos a visita deo Presidente de ASOBECAT, Juan Pedro Sánchez, que nos ven a informar da "XVI Fiesta del Botillo en Cataluña", prevista para o vindeiro día 29 deste mes de febreiro. Tamén aproveitamos para falar con don Jesús Álvarez Alvarez, cura-párroco de Cacabelos e outros pobos do Bierzo. Foi elixido "Berciano Ilustre 2020" pola súa faceta sacerdotal, pola súa dedicación especial na recuperación e restauración de moitas igrexas e ermitas da zona, pola atención aos pelegríns da Ruta Xacobea, polo seu traballo a prol das Cofradías... etcétera. Felicitámolo e desexamos poder saudalo persoalmente nesa celebración no Hotel Front Air de Sant Boi.

A ultima intervención é da nosa correspondente nos Ancares Lugueses, concretamente en Becerreá, Fernanda Follana Neira, que nos aporta a súa crónica informativa dos aconteceres daquela zona.

A vindeira semana máis. Non deixen de sintonizarnos.

XOVES 6 de FEBREIRO do 2020

Comezamos outro programa máis dándolles a ben-vida e ofrecéndolles unha peciña musical para despois conectar con Galicia e falarmos con dona ROSARIO ALVAREZ BLANCO, Presidenta do Consello da Cultura Galega. Felicitámola por ter recibido, recentemente, o Premio Cidade de Pontevedra no apartado de Persoa Física, e conversamos con ela para que nos dea un chisco de información sobre a Exposición na Galería do Paraninfo da Universidade de Barcelona: "Outros verbos, novas lecturas: Valle-Inclán traducido (1906-1936). Acudirá a Barcelona o día 11 a UAB onde se impartirá unha Conferencia a cargo de dona Rosario Mascato baixo o título: "Galeguidade e Traducción no Valle Inclán". Agradecémoslle a súa amable atención.

A segunda conversa é con Guadi Galego, que acaba de publicar o seu ultimo traballo: IMMERSIÓN. Tamén aproveitamos para felicitala por ter acadado o Premio á Promoción da Realidade Plurilingüe do Estado no 2020. Tamén está proposta para poder acadar o Premio MIN de Música Independente. Coméntanos a xira que está a realizar presentando este libro-CD, en Galicia, que virá a Barcelona -concretamente á Sala Luz de Gas- despois a Madrid, ao País Vasco... Desexámoslle moitos éxitos.

Continuamos con outro bocadiño de música e conectamos agora con ROBERTO REGAL, da Adega ENONATURE, na Ribeira Sacra. Cóntanos a súa experiencia na Exposición que tivo lugar en Barcelona ate o día 5 de febreiro. Está moi satisfeito deste grande evento e fálanos dos seus proxectos, dos seus traballos... Sempre aprendemos algo con este Adegueiro e Enólgo galego.

Na segunda hora conectamos co noso correspondente na capital de Ribeira Sacra, Xosé Manuel F. Montes, que sempre ten preparada unha crónica con noticias escollidas e recomendacións moi axeitadas, tanto gastronómicas como festeiras e finaliza a súa intervención coas frases e ditos galegos que el mesmo anota na "súa libretiña pequena". Fermosa a súa aportación gráfica. ¡Moitas grazas!

A nosa correspondente nos Ancares, Fernanda Follana Neira, tamén nos agasalla coa súa crónica de novidades e "cousas interesantes" dende Becerreá. E así trancorreu o noso programa de hoxe.

Voltaremos o vindeiro xoves. ¡Que teñades unha feliz semana!

XOVES, 3o de XANEIRO do 2020

Comeza o programa conectando con Galicia para falar con Rubén Xerente dos Embutidos Casa Castelao, con quen manten unha conversa-entrevista relacionada coa súa ctividade e cos productos tan exquisitos que están a producir. Agradecémoslle a súa aportación.

A segunda comunicación é con Manuel Vázquez Osorio, Presidente do Centro Galego NÓS de Sabadell, que nos dá cumprida información das Actividades que veñen realizando e das que teñen previsto para esta tempada. Tamén nos comunica a recente visita e reunión de traballo cos diferentes membros doutras Asociacións Galegas, que tivo lugar na Sede da Asociación coa presencia do Ilmo. Sr.Secretario Xeral de Emigración da Xunta de Galicia, don Antonio Rodríguez Miranda.

Conceta novamente con Galicia para falar con Xabier Moure, arqueólgo e investigador galego de prestixio, que nos explica as moitas achegas que o ano pasado se produciron naquela zona dos Ancares Galegos. Agradecémoslle a súa colaboración de hoxe.

Comentamos algunha noticia relacionada co Cine Galego, que está de celebración por ter acadado na ultima edición dos Premios Goya, nada menos que dúas estatuiñas: á mellor artista revelación, dona Benedicta e o Premio á mellor Fotografía, polo filme "O que arde", de Oliver Laxe.

E finalizamos o programa desexándolles unha feliz semana. O vindeiro xoves máis.

XOVES 23 de XANEIRO do 2020

Outra semaniña máis con todos vosoutros, tentando ofrecervos dúas horiñas de radio en galego. A primeira comunicación será con María José Sante Riopedre, Presidenta da Asociación NENOS da Ponte dos Santos, dedicada ao transporte de persoas con discapacidade mental e física ao Colexio de Educación Especial EDE en Tapia de Casariego. Agradecémoslle a súa participación no programa de hoxe e desexámoslle que sigan aumentando en socios.

A segunda intervención-entrevista é con PEPO SUEVOS, grande artista e humorista a quen felicitamos por ter recibido o "Premio ao Mellor Monologista 2019" que lle concedeu FETEGA Teatro Galego. Unha conversa moi amena e chea de humor.

Continuamos o programa e poñémonos en contacto con JUAN PEDRO SÁNCHEZ, Presidente da ASOBECAT, que nos informa do "XVII Festival del Botillo 2020 en Cataluña". Como en anos anteriores celebrarase no Hotel Front Air Congress de Sant Boi de Llobregat, o día 29 de Febreiro ás 19 horas. O prezo é o mesmo de anos anteriores. Aproveitarán para homenaxear a dous Berciano Ilustres: don Pedro Guerra (Médico Odontólogo) e don Jesús Álvarez (párroco de Cacabelos). O pobo homenaxeado deste ano será "Noceda del Bierzo", con productos facilitados por "Embutidos Santa Cruz". A Adega Arganza será a que servirá o viño Mencía tinto e Godello branco.

A última conversa é coa nosa correspondente nos Ancares Lugueses, FERNANDA FOLLANA NEIRA, que sempre ten preparada unha crónica relacionada con asuntos relacionados con aquela zona.

A vindeira semana que ven máis. 

Non se esquezan de sintonizarnos. 

¡Sexan felices!

Xoves 16 de XANEIRO do 2020

Unha semaniña máis con todos vosoutros. Agradecemos a visita nos estudos de Guido Álvarez Parga, que nos aompaña. Precisamente, con el comezamos a primeira intervención-entrevista para que nos fale da súa traxectoria profisional e dos seus proxectos tan interesantes. Dámoslle as nosas máis expresivas grazas e despois de dexarlle que teña moitos éxitos na súa andaina, continuamos o programa escoitando unha peciña musical que nos serve para saudar ao segundo convidado.

A peza musical do CD "Poemas de amor en outono", de XOÁN EIRIZ, sérvenos para darlle a ben-vida a este grande intérprete, profesor e músico galego. "Cada poema unha canción", así reza unha das frases dese CD que nos agasallou. Comentamos con el a autoría deste grande traballo, que actualmente está en promoción e que podedes adquirir poñéndovos na súa páxina ou na de Toño Núñez, autor dos poemas que musicou precisamente Xoán Eiriz. Unha primicia que compartimos con todos vosoutros e que desexamos que disfruten del. En vindeiras datas voltaremos a conectar con XOÁN para que nos comente e informe onde poderemos escoitalo en directo, nos Concertos que ten previsto realizaar para a súa presentación.¡Moitas Grazas Xoán Eiriz!

Continuamos, na segunda hora, falando co noso correspondente na capital da Ribeira Sacra, Monforte de Lemos, Xosé Manuel F. Montes, encaargado da sección QUEN CHE PREGUNTOU?  Comeza comentándonos a experieincia da súa visita a Viana do Bolo a fin de semana pasada, con motivo da VIBOMASK, unha celebración extraordinaria e moi recomendable, non só pola vistosidade senón tamén pola súa orixinaliddade. Fainos un pequeno percorrido polas escollas TOP que seleccinou esta semana. Recoméndanos varias Festas Gastronómicas e apúntanos algunhas frases retranqueiras da súa "libretiña pequena". Tamén nos envía a súa aportación creativa en forma de viñeta alusiva a algunha das intervencións no programa de hoxe. ¡Grazas!

Falamos agora con Jaume Gubianas, diseñador gráfico catalán, que ven de confeccionar o Cartel anunciador da 50 Festa da Androlla do 2020 en Viana do Bolo, dotado con 1500 €uros. Dámoslle os nosos parabens por ter acadado ese Premio tan honroso e que recolle moi acertadamente o que representa esa Festa tan importante para Viana do Bolo. Felicitacións e que sigas colleitando moitos éxitos Jaume. Convidámolo a que visite ese pobo da Galicia interior, a ser posible precisamente no Domingo Gordo do Entroido Vianés, porque así disfrutará da tradición popular enxebre.

Non puidemos conectar con Juan Pedro Sánchez, Presidente de ASOBECAT, pero informounos a todos de que este sábado 18 farase a Presentación-Rolda de Prensa da "XVII Fiesta del Botillo en Cataluña", no Hotel Front Air de Sant Boi. Estades todos convidados. Acompañamos o Cartel anunciador deste grande evento previsto para o día 29 de FEBREIRO. 

 

A vindeira semana voltaremos á mesma hora

¡Agardámosvos!

XOVES 9 de XANEIRO do 2020

Comezamos o primeiro programa do ano dos mil vinte, dándolles a ben-vinda e desexándolles un feliz ano a todos. E a nosa primeira comunicación é con dona Carmen Quinteiro, unha profesora e poeta galega que ven de publicar un poemario-libriño moi interesante. Fálanos da súa faceta creativa e das súas inquedanzas como profesional do ensino. Agradecémoslle a súa aportción.

A segunda intervención é a do noso estimado amigo OSCAR DE SOUTO, un "labrego da palabra" como o define Armando. Mantemos unha conversa moi agradable sobre a súa traxectoria creativa, da presentación e boa acollida que tivo o seu último traballo escrito. Tamén nos avanza algunhas cousas das que están a suceder naquela contorna da Costa da Morte, do Batallón Literario, do "Camiño dos FAROS" e finaliza agasallándonos coa lectura dun poema inédito. ¡Moitas grazas Oscar.!!!

A segunda hora comezámola conectando con Monforte de Lemos, onde se atopa o noso correspondente Xosé Manuel, encargado da sección QUEN CHE PREGUNTOU? A súa crónica, composta polos TOP de noticias escollidas, as recomendacións de Festas Gastronómicas e tamén das outras. Finaliza comentando a frase retranqueira seleccionada. Compartimos a súa primeira viñeta do ano, adicada a unha frase mentada no programa de hoxe.

Fernanda Follana encárgase de axudarnos a finalizar o programa coa súa aportación. Dende Becerreá, onde se atopa, falándonos de varios asuntos Culturais e actuacións que se realizaron nestas semanas festivas nos arredores Ancareses. 

E despedímonos ate o vindeiro xoves á mesma hora. ¡Sexan felices!

Xoves 19 de DECEMBRO do 2019

Último programa do ano 2019. Dámoslles a ben-vinda e despois de escoitar unha peciña de música, poñémonos en contacto con Martiño Maseda, ex-profesor, escritor e poeta que ven de recoller o 2º Premio no XXXIII Certame de Poesía Rosalía de Castro de Cornellà. Falamos con el da súa traxectoria creativa. Tamén nos comunica que acaba de recibir o 1º Premio do XIII Certame Literario de "Terras do Chamoso". Felicitámolo e desexámoslle que siga acadando moitos éxitos máis.

A segunda comunicación é con Antón Cortizas, mestre xubilado, escritor, poeta e realizador do Libro-CD "O colo das palavras" que publicaron en Semente Trasancos. Un libro moi recomendado para os cativos, pero tamén moi importante para todos os que desexen disfrutar da música e da poesía. Podedes dar con él neste enderezo: info@sementetrasancos.gal. Agradecémoslle a súa aportación de hoxe e desexámoslle que teñan unhas Felices Festas e un ventureiro aninovo 2020.

Continuamos na segunda hora coa crónica do noso correspondente en Monforte de Lemos, Xosé Manuel F. Montes, encargado da sección QUEN CHE PREGUNTOU?. Comeza cos seus TOP semanais e finaliza coas pílulas retranqueiras moi recurrentes. Despídese desexando moi Boas Festas.

A derradeira intervención deste ano é a da nosa correspondente Fernanda Follana Neira, falando da contorna dos Ancares Lugueses. Desexámonos mutuamente unhas Felices FESTAS e un próspero aninovo cheo de ventura para todos.

Ate o vindeiro 9 de xaneiro do 2020, que voltaremos aquí á mesma hora ¡¡¡Sexan FELICES!!!

XOVES 12 de DECEMBRO do 2019

Comeza o programa dándolles a ben-vinda a tódolos nosos oíntes e seguidores. Disculpa a non asistencia miña, porque estou desprazado agora mesmo. Conecta con Galicia, concretamente con Mari Carmen Sánchez Iravedra, da Empresa: Embutidos Artesanos Suarna, en Navia de Suarna. Unha empresa na que traballan só mulleres. Tamén comenta algunhas cousas moi interesantes relacionadas coa recente apertura da Ferreteria que recolle unha morea de utensilios e ferramentas que empregaban en épocas anteriores: un museo... Agradécelle a súa participacion.

A segunda comunicación é con Oswaldo Digon Alba, actor cómico galego, que ten unha traxectoria artística moi productiva. Traballou e traballa con moitos artistas da súa profisión. Agradécelle a súa participación neste programa de hoxe. 

A segunda hora continúa conectando co noso correspondente en Monforte de Lemos, Xosé Manuel F.Montes, encargado da sección QUEN CHE PREGUNTOU?. Ten preparada a súa crónica cos seus TOP semanais... : O paritorio do Hospital de Verin; Abundando no circo Vigo-Abel Caballero, a última "neva en Vigo" no mercadillo da Alameda con canóns artificiais; Os galegos, segundo un estudo estatístico do Insitituto Médico Europeo da Obesidade, engordaremos unha media entre 2 ou 5 quilos neste Nadal... No tema de Festas Gastronómicas non puido mirar nestes días, pero no Asunto da Retranca sí que ten anotadas algunhas pinceladas... Despois envíanos a súa aportación gráfica, unha viñeta relacionada coa demografía, a despoboación en Galicia. 

A seguinte intervención é a da nosa correspondente en Becerreá, Fernanda Follana Neira, que nos enche de cultura e proxectos moi interesantes, relacionados con aquelas terras Ancaresas.

Despide o programa ate o vindeiro xoves á mesma hora. 

XOVES 05 de DECEMBRO do 2019

Outro programiña máis con todos vosoutros. Despois das salutacións de rigor ofrecémoslle escoitar un bocadiño de música de "Uxía Lambona e a Banda Molona", con que teremos a honra de compartir os próximos minutos de conversa-entrevista. Dámoslle as grazas a Uxía Lambona e felicitámola pola presentación do seu terceiro CD, que vai acompañado de un DVD, titulado: "Astronauta Sideral". Fálanos da súa traxectoria, dos concertos previstos, de cómo grabaron este traballo... etcétera... Agradecémoslle a súa amable atención.

A segunda conversa-entrevista é con dona Elena Ferro, unha grande artesana Zoqueira, que acaba de recibir o Premio NACIONAL de Artesanía, xunto con PAULA OJEA, outra artesana ceramista que nos enorgullece aos galegos por seren dúas mulleres representantes da nosa Arte Galega. Felicitámola e mantemos unha pequena entrevista, que nos concede, falándonos da súa traxectoria, do seu Taller e das propostas tan interesantes que ofrecen a tódolos que desexen poñerse en contacto con eles. A súa páxina Web: http://elenaferro.com/es/, para saber algo máis e mercar algún dos seus productos. ¡Moitas Grazas, Elena, e que sigades colleitando moitos éxitos!!!

Continuamos na segunda hora conectando novamente con Galicia para que o noso "presentador" de "GALICIAME", Armando Fernández López, para que nos fale dese grande acontecemento que mañá mesmo celebrarán no Salón Principal da Adega CONDES DE ALBAREI, coa participación dunha morea de artistas que seguro farán as delicias de tódolos asistentes e colaboradores deste grande evento.

Finalmente conectamos coa nosa correspondente nos Ancares Luguese, para falar con Fernanda Follana Neira, que nos fai a súa crónica semanal  e volve a reconducir o tema da "Galicia despoboada" cunha pequena anotación moi interesante.

Despedímonos ate o vindiero xoves á mesma hora. 

¡Que teñan unha feliz semana!