XOVES 10 de FEBREIRO do 2022

Lucía Pérez - Na miña pel

Comezamos escoitando a nosa sintonía de sempre e saudando a tódolos oíntes e seguidores. Escoitamos un bocadiño de música, concretamente a dun videoclip de Lucía Pérez: Na miña Pel. Precisamente aproveitamos a ocasión para conectar con ela e falar dese traballiño tan fermoso. Coméntanos algunhas cousas da súa traxectoria, da próxima edición dun CD que recollerá esta canción na que seguro incluirá un mínimo de dez pezas. Tamén nos comenta parte dos compromisos que ten previsto realizar, os desexos de poder actuar en Cataluña, concretamente en Barcelona, da próxima visita a Miami, nun acontecemento e celebración moi interesante... ... Agradecémoslle a súa amable atención e desexámoslle moitos éxitos.

Damos a coñecer algunhas informacións. Próxima celebración dunha "Calçotada", concretamente o sábado día 12. Concerto de Guadi Galego o día 13 no "Casinet de Hostafrancs" e outras cousiñas...

A segunda intervención é a do noso correspondente na capital da Ribeira Sacra, Xosé Manuel F. Montes, encargado da sección "Quen che Preguntou". Fainos a súa crónica co seus "Desghústanme" e "Ghústanme", finalizando con algún apunte sacado da súa observación minuciosa, popular e retranqueira.

 

Ledicia Sola

Continuamos, na segunda hora conectando con Ledicia Sola, actriz galega de moito prestixio. Forma parte do elenco de actrices que intervendrán na obra de Teatro "Cigarreras", baixo a Dirección de Cándido Pazó. Estarán no Teatre Romea de BCN, dende o día 22 de febreiro ate o día 6 de marzo. Os espectadores que desexen asistir poden entrar na páxina do Teatro para reservar as entradas, porque teñen un pequeno desconto si as adquiren con tempo, antes da estrea. Unha conversa moi interesante. Agradecémoslle a súa atención e desexámoslle moitos éxitos, a ela e a tódolos compoñentes.

Miguel Anxo Mato

A última conversa-entrevista é con Miguel Anxo Mato Fondo, escritor, poeta e crítico literario nado en Ponteceso. Comentamos con el a súa dedicación á escrita, tanto poética como narrativa. Fálanos da súa última publicación: Sisley no Xuncal da Trave. E agasállanos coa lectura dun dos seus poemas. ¡Moitos éxitos! e ¡Moitas grazas Miguel Anxo!. En vindeiras datas voltaremos a poñernos en contacto para que nos sigas explicando cousas da túa creación literaria.

A vindeira semana máis. ¡Que teñan unha feliz semana!

XOVES 03 de FEBREIRO do 2022

Unha emisión máis deste noso programa tentando comunicarnos con tódolos nosos oíntes e seguidores. Dúas horiñas de radio en galego con música, conversas, entrevistas e informacións diversas. Despois da sintonía do programa (a Danza dos DEDOS, composta polo grande Xiao, cando aínda non tiña os 18 anos, que precisamente cumpriría hoxe). Dámoslle a ben-vinda e conectamos con Galicia para conversar-entrevistar ao Dtr. Gumersindo Rego Fernández. Agradecémoslle a súa aportación de hoxe.

A segunda colaboración é con dona Mari Carmen Sánchez Iravedra, da Empresa "Embutidos artesanos Suarna". Infórmanos da realización o próximo día 27 de febreiro da "31 Festa da Androlla-2022" en Navia de Suarna. Fálanos dos seus produtos e onde se poden adquirir. Desexámoslle moitos éxitos.

Continuamos o programa saudando a Rubén Pérez, enólogo da Adega Ponte da Boga, na Ribeira Sacra. Unha conversa moi interesante e coa que non só coñecemos un pouco máis polo miúdo esta Adega e os seus produtos, senón que tamén aprendemos algo máis dese traballo tan importante que se está a facer relacionado co cultivo das uvas autóctonas desa D.O. Agradecémoslle a súa amable atención e desexámoslle que sigan colleitando moitos máis ouros nas diversas exposicións e mostras ás que acuden. Precisamente mandámoslle os nosos parabens por ter acadado nada menos que 5 Ouros recentemente con diversos viños presentados.

A última conversa-entrevista é con Uxía, unha das máis grandes voces da música tradicional galega, que nos fala da próxima publicación dun CD do Grupo "Malvela" que titularán "O Benquerer". Tamén nos adianta que está a preparar outro CD, seu, que levará por título: "De tu casa a la mía", que próximamente presentará en Santiago de Compostela... Agradecémoslle o tempo que nos dedicou e desexámoslle que siga colleitando moitos éxitos.

E despedímonos ate o vindeiro xoves á mesma hora. 

Aquí vos deixamos o programa completo.

XOVES 27 de XANEIRO do 2022

Comezamos unha nova emisión de "Galegos no BAIX" dándolle a ben-vida aos nosos oíntes e seguidores ofrecéndolles unha peza das "Tanxugueiras", que veñen de ofrecer unha intervención excelente na clasificiación para a Eurovisión, no Festival que se está a realizar en Benidorm Fest. A primeira conversa é con dona Rosalía Morlán que nos fala do seu último traballo "Camelias de amor", que debido á Pandemia aínda non foi presentado. Agradecémoslle a súa amable atención.

A segunda comunicación é con Rosalía Fernández Rial, outra poeta licenciada en Filoloxía e Doutora en Didáctica das linguas e expresión dramática pola Universidade de Santiago de Compostela. Estudou e toca o acordeón, fai teatro e, sobre todo escribe. Agradecémoslle que nos conceda este tempo para entrevistala e coñecer un pouco, máis polo miúdo, parte da súa creatividade e moi concretamente dese "Desnortada" que acaba de publicar en Espiral Mayor. Desexámoslle moitos éxitos.

A sección "Quen che preguntou?" do noso correspondente na capital da Ribeira Sacra, Xosé Manuel F. Montes, coma sempre é unha selección de noticias debulladas mediante os seus "Desghústanme e Ghústanme" que sempre son moi acaidos. Finaliza coa sentencias e recollidas puntuais relacionadas coa fraseoloxía e outras ocurrencias populares e tradicionais.

Continuamos na segunda hora conectando con Aurelio Blanco Trincado, Presidente do Instituto de Estudios Valdeorreses. Fálanos da importancia que ten a elección de Florencio Delgado Gurriarán, algo do que levan traballando dende ese Instituto. Tamén nos comenta moitas máis cousas relacionadas coa fundación dun Museo antropolóxico no Barco de Valdeorras, da gastronomía e dos viños con D.O. Valdeorras.

E finalizamos o programa de hoxe recibindo ao grande Xosé Avelino González Fernández, máis coñecido por "Avelino González". Actor galego, contacontos, narrador, director e tradutor de teatro... Agradecémoslle a súa participación de hoxe no noso humilde programa e fainos partícipes dos proxectos e traballos nos que está inmerso. Desexámoslle moitos éxitos.

Desexamos que volvan a conectar con nosoutros o próximo xoves. Aquí deixamos o programa enteiro.

XOVES 20 de XANEIRO do 2022

Inma López Silva

Unha nova emisión do "Galegos no BAIX" comezando saudándovos e ofrecéndolles un bocadiño de música para conectar coa primeira convidada de hoxe, dona INMA LÓPEZ SILVA, Profesora, escritora, investigadora e crítica de teatro. Felicitámola por ser elexida como Profesora para a "Escola de Letras", organizada pola Deputación de Pontevedra xuntamente coa Editorial Galaxia. Fálanos do obradoiro, de Narrativa que terá cos alumnos inscritos, cuxo cupo xa está esgotado, da súa traxectoria como escritora... A súa conversa é unha lección de aprendizaxe para nosoutros e unha primicia para tódolos nosos oíntes e seguidores. Agradecémoslle a súa amable atención.

 

Continuamos o programa e conectamos co noso correspondente na capital da Ribeira Sacra, Xosé Manuel F. Montes, encargado da sección "Quen che Preguntou? que nos fai a súa crónica semanal cos "Deghústanme" e "Ghústanme" correspondentes. Nesta ocasión tamén nos envía a súa "viñeta" alusiva a un tema que tratamos na audición. ¡Moitas grazas Xosé Manuel!

Sara Inés - Castro Caldelas

Comezamos a segunda hora conectando con dona Sara Inés Vega Núñez, Ilma. Alcaldesa do Concello de Castro Caldelas. Felicitámola pola celebración dos FACHÓS deste ano, con reservas e coas medidas de prudencia recomendadas polas autoridades sanitarias. Unha festa de San Sebastián que data de 271 anos de existencia e que non se puido celebrar completa, como en anos anteriores, xunto coa xoranda gastronómica que a acompaña, pero ese fogo purificador paseóu un fachón de nada menos que 35 metros polas rúas de Castro Caldelas. Desexámoslle que sigan acadando moitos éxitos.

Vacas Jersey en pastoreo

A conversa-entrevista que mantemos para finalizar o programa de hoxe é con Xesús Mazaira Varela da Queixería Airas Moniz, no Lugar de Outeiro - San Salvador de ASMA - Chantada. Felicitámolo polos éxitos que están acadando coa manteiga e os Premios que lle concederon ao queixo SAVEL. Agradecémoslle a súa información detallada e desexamos que sigan acadando grandes éxitos.

O vindeiro xoves, se podemos, moito máis. Que teñan unha feliz semana! Aquí deixamos o programa enteiro.

XOVES 13 de XANEIRO do 2022

Unha emisión máis deste noso programiña convidando ao ademirado poeta da Ribeira Sacra PACO LEDO, que nos recibe moi amablemente e entrevistámolo para que nos conte parte da súa traxectoria creativa. Agasallános coa lectura dun dos seus poemas e despedímolo con música de Xoan Eiriz, que musicou algúns poemas doutro poeta amigo noso, Suso Díaz.

A continuación conectamos co noso correspondente na capital da Ribeira Sacra, Xosé Manuel F. Montes, encargado da sección Quen che Preguntou?, que sempre ten preparada a súa crónica semanal cos seus "Desghústanme e Ghústanme" correspondentes. Finaliza a súa intervención coa lectura das frases e ocurrencias que ten na súa "libretiña pequena". Agradecémoslle a súa colaboración, moi estimada.

A segunda hora comezámola voltando novamente a Galicia para recibir ao cantautor e músico XABIER VIZCAÍNO. Ven de actuar recentemente na Televisón de Galicia xunto con Lucía Pérez, estreando un tema composto precisamente por el. Falamos da súa traxectoria musical dos concertos e doutras cousas de interese para tódolos nosos oíntes.

Despois entrevistamos a Mari Carmen Sánchez Iravedra, de "Embutidos Suarna", que ultimamente ofrecen os seus productos na plataforma "Son de Lugo" aínda que ela mesma nos indica que poñéndose en contacto con Mari Carmen encárgase de enviar os productos solicitados. Felicitámola porque ven de recibir un Premio que lle entregou a Asociación de Empresarios Galegos, a finais do mes de decembro pasado, "Son Emprendedora Rural" ¡Parabens! e a seguir colleitando éxitos.

Finalizamos informando do Concerto que dará o Grupo Caamaño&Ameixeiras mañá mesmo, venres día 14 no Tradicionarius de Gràcia. Tódolos nosos oíntes e seguidores que desexen asistir aínda están a tempo de poder adquirir as entradas para esa fermosa actuación.

E despedímonos ate o vindeiro xoves, á mesma hora. Desexando que teñan unha feliz semana.

XOVES 23 de DECEMBRO do 2021

Este último programa do ano 2021 comezámolo coa nosa sintonía de sempre e escoitamos unha panxoliña de Berogüetto para recibir á primeira convidada: Sonia Melón, poeta galega. Agradecémoslle a participación no programa de hoxe e agasállanos coa lectura de dous poemas que adica a tódolos oíntes e seguidores e un, en particular a un seu seguidor incondicional. Enviámoslle os nosos mellores desexos para este Nadal e que teña unha boa entrada de aninovo.

A segunda conversa é co noso correspondente na capital da Ribeira Sacra, Xosé Manuel F. Montes, que nos aporta a súa crónica semanal, cos seus"Desghústanme" e "Ghústanme", que se converten nas informacións precisas e escollidas por el. Tamén nos envía a viñeta de hoxe, relacionada cun dos comentarios emitidos no programa. Desexámoslle Boas Festas e un farturento aninovo 2022.

 

Continuamos, na segunda hora, conectando novamente con Galicia para falar coa nosa amiga, poeta-pastora, Nieves Fernández Vidueira, que nos informa do acto que se celebrou en Viana do Bolo o sábado pasado. O visionado dun documental sobre lendas, contos e outras cousas. As protagonistas son as propias mulleres do rural, entre as que se atopaba precisamente e nosa Nieves. Felicitámola e desexamos que pase unhas felices festas do Nadal e que teña unha ventureira entrada de aninovo.

E finalizamos as entrevistas deste ano falando con Beatriz Busto Miramontes, antropóloga que ven de publicar o libro: Pandereteiras de Mens. Agradecémoslle as diversas informacións sobre este traballo tan interesante, que ven acompañado dun CD para entender mellor esa recopilación de cantos, interpretados por 5 mulleres cantadoras do noso tradicional galego e acompañadas coa pandeireta.

 

E despedímonos desexando que teñades un Bon Nadal e un feiticeiro aninovo 2022. Aquí tedes o programa completo.

XOVES 16 de DECEMBRO do 2021

Comezamos este penúltimo programa de "Galegos no BAIX" escoitando unha panxoliña para recibir a Guido Álvarez Parga, Guía Oficial de Turismo de Galicia. Felicitámolo polo traballo e proxectos que está a realizar en Galicia, pero moi concretamente na cidade de Lugo, así como tamén polo de Profesor-Titor Grau de Turismo na UNED de Lugo. É para nosoutros unha honra telo, de cando en vez, na nosa emisión e ir descubrindo algún que outro proxecto dos que vai poñendo en marcha. ¡Felices Festas, Guido! e ¡Moita sorte na túa xeira turística e educativa!

A seguinte é unha entrevista que nos concedeu o Gañados do 1º Premio de "35 Certame Internacional de Poesía en Língua Galega, Rosalía de Castro de Cornellà", que é Xosé Luís Santos Cabanas. Un escritor e poeta galego co que disfrutamos moi agradablemente. A súa amena conversa sérvenos de leución e aprendizaxe sobre o traballo que foi premiado, así como tamén a traxectoria de Tina Modotti, á que fai referencia o poema premiado. Disfrutamos da lectura que el mesmo nos agasalla. ¡Moitas grazas, Xosé Luís! e moitos éxitos!

Continuamos a emisión e voltamos novamente a Galicia porque temos a sorte de poder conversar-entrevistar á gañadora do 2º Premio neste mentado Certame Internacional de Poesía, dona Clara Vidal, unha poeta galega residente en A Coruña. Fálanos dese poema gañador "A formación dos continentes" e tamén disfrutamos coa súa lectura dalgún deses poemas. ¡Moitas grazas, Clara!

Temos agora o privilexio de entrevistar a unha moza moi noviña, que nos abraia coa súa voz: Claudia Pajares. Escoitamos unha peza musical que ela mesmo interpreta, casi á capela, e somos os primeiriños que conseguimos falar con ela. Non é galega, pero canta coma se o fora, coma os anxos. Desexámoslle o mellor e prometémonos voltar a conectar con ela para seguir disfrutando da súa fermosa voz e interpretación que, por certo ela mesmo nos confirma que é auto-didacta. Aquí podedes escoitar un bocadiño da canción.

E finalizamos a emisión de hoxe conectando con Antonio Marzabal, un escritor galego que ven de publicar a súa última novela: SEMENTE, ambientada no Courel lugués. Coméntanos que algo de seu ten esa novela, que  nesa novela relata parta das súas propias vivencias. Desexámoslle que teña moito éxito.

O vindeiro xoves máis. Que teñan unha feliz semana!

XOVES, 9 de decembro do 2021

 Comezamos outra nova emisión escoitando a nosa sintonía de sempre, saudando aos nosos oíntes e seguidores, e despois de escoitar outro bocadiño de música, poñémonos en contacto coa Presidente de GaliciAME, dona Merchi Álvarez. Acaba de chegar de Corea do Sul, onde lle aplicaron unha nova técnica curatoria e que ao parecer estalle a dar moi bos resultados. Felicitámola polo éxito que está tendo con esas novas prácticas. Cóntanos algo desa experiencia e fálanos dos seus anceios para que todo siga a decorrer con ben. Desexámoslle sorte para que en vindeiras datas, no verán do vindeiro ano ou no mes de decembro se poida levar a cabo esa Gala que se viña celebrando anualmente para conseguir aportacións e conceder as becas coas que potenciar a investigación sobre a AME. Desexámoslle que teña unhas Boas Festas do Nadal e un aninovo farturento de saúde e benestar.

A segunda conversa-entrevista é con Xoan Curiel, músico e cantautor de A Fonsagrada, que nos fala do seu ultimo traballo CD Treides comigo. Estivo de xira con numerosos concertos por Galicia adiante e coméntanos que agora desexa coller un tempiño de lecer e descanso.  Desexámoslle que acade moitos éxitos e que teña un Feliz Nadal e un próspero aninovo 2022.

Seguimos o programa informando da próxima presentación, o sábado día 11 a partir das 19h, no Auditori de San Ildefonso de Cornellà, da xulipedia.com, que nos fará o propio autor Xulio Simón e Luís Losada. Tamén teremos a oportunidade de recoller o CD que acaba de gravar a A.C.G.Rosalía de Castro de Cornellà, que leva por título "Rosalía en Cornellà". Tamén actuarán os Gaiteiros do Grupo e as Rosalieiras. Despois, á noite teremos unha cea conmemorativa do "35 Certame Nacional de Poesía en Língua Galega" xunto coa publicación dos gañadores deste Certame Literario.

A segunda hora continuamos conectando novamente con Galicia para falarmos con Manuel - Foteiro de A Fonsagrada, que nos fai de correspondente dende aquela vila da montaña. Infórmanos, moi polo miúdo, das diferentes actuacións que tiveron lugar nesa celebración, a fin de semana pasada, da "VI Foliada da Fonsagrada". Unha morea de músicos e Grupos estiveron celebrando ese grande acontecemento. Agradecémoslle a súa amable atención e tamén lle enviamos os nosos mellores desexos para estas Festas do Nadal.

Despois falamos con Alva Pico, traductora e profesora de Valadouro, que reside actualmente en Barcelona. É un primeiro contacto co que nos pon ao corrente da súa traxectoria, e coidamos que en vindeiras datas poderemos incorporar nas nosas audicións como unha colaboradora máis. Agradecémoslle a súa amable atención.

Despedimos o programa desexando que teñan unha feliz semana. O vindeiro xoves máis, e á mesma hora de sempre.

XOVES 2 de DECEMBRO do 2021

Outra edición máis deste noso programa en língua galega. Comezamos coa sintonía de sempre, saudamos aos nosos oíntes e seguidores, escoitamos un bocadiño de música e poñémonos en contacto co primeiro convidado: Luís Chapela Bermúdez, autor do libriño recentemente publicado: PEROXO, un rapaz da aldea. Fálanos da súa escrita, dos momentos agradables que lle proporcionou a súa escrita e das presentacións que está a realizar, nas bibliotecas da zona, e noutros lugares onde lle-lo solicitan. Ten previsto facelo tamén noutros lugares, como en Vigo, a partir do ano 2022. Unha lectura que paga a pena comentar e que recomenda para empregar nas escolas. Desexámoslle moitos éxitos.

Falamos das diferentes actividades que ten previsto a nosa A.C.G.Rosalía de Castro, de Cornellà. Veñen de presentar, a fin de semana pasada o Certame Nacional de Poesía en Lingua Galega, Rosalía de Castro, no CULTURGAL de Pontevedra. Un recoñecemento moi celebrado. Tamén se realizou un Certame Poético no que participaron dúas poetas gañadorasa do mentado Certame. Precisamente a fin de semana que ven, o día 11 concretamente presentarase, no Auditori Sant Ildefons, o CD Alborada en Cornellá, gravado polos gaiteiros do Grupo, as cantarieras -Rosalieiras- e os gaiteiros senior. Tamén se poderá asistir á presentación da "xulipedia.com", do noso amaigo e colaborador Xulio Simón. No transcurso dunha Cea no local social da Entidade, faranse públicos os nomes dos 3 gañadores do "XXXV Certame".

Recibimos ao noso correspondente na Ribeira Saacra, Xosé Manuel F. Montes, encargado da sección QUEN CHE PREGUNTOU? que nos facilita as súa crónica semanal cos "Desghústanme e Ghústanme" cos que percorre as diferentes informacións salientables que el mesmo escolleu. E finaliza coas anotacións que recolle na súa "libretiña pequena". ¡Moitas grazas Xosé Manuel!

Conectamos novamente con Galicia, para achegarnos a Navia de Suarna, e falar con Xosé Luís Pérez Fernández, un apicultor que xa ten acadado algúns premios pola calidade da mel que recolecta. Concretamente a AGA (Asociación Galega de Apicultores) concedeulle o 1º Premio "Mel 5 Estrelas" pola modalidade "Mel floral de Queiroga". Fálanos dos traballos que precisan o coidado das abellas, a recolección do mel, o envasado e a distribución.

 

Despois falamos con Miguel Anxo Rodríguez, un empresario de Figueiredo, Concello de Ribas de Sil que elabora un aceite de grande calidade: Aceites Figueiredo. Está traballando para conseguir unha producción exquisita, con olivos milenarios e que está acadando un renome especial, pola calidade do producto e polo empeño de conseguir un producto elaborado con moito esforzo e cariño. Desexámoslle moitos éxitos.

Despedímonos de tódolos escoitantes, seguidores e simpatizantes ate o vindeiro xoves. ¡Que teñan unha feliz semana!

XOVES, 25 de NOVEMBRO do 2021

Outra emisión máis do noso "Galegos no BAIX". Sintonía de ben-vinda, un bocadiño de música e conectamos con ELOI CALDEIRO, (Compositor, músico, cantante, batería, letrista, poeta, pero sobor de todo CREADOR). Temos a honra de entrevistalo e falar distendidamente con el. É o fundador e lider do Grupo BRATH. Virán a dar dous concertos o día 26 a Cal Ninyo, en Sant Boi e o día 27 en Barcelona, no Tradicionarius de Gracia. Desexámoslles moitos éxitos.

A segunda intervención é a do noso correspondente na capital da Ribeira Sacra, Xosé Manuel F. Montes, que se encarga da sección QUEN CHE PREGUNTOU? Fainos a súa crónica informativa semanal, cos seus Desghústanme e Ghústanme correspondentes, e nesta ocasión envíanos a súa "viñeta" alusiva a un momento da emisión de hoxe: As galletas Mariñeiras. ¡Moitas grazas. Xosé Manuel! 

A continuación conectamos con Xoan L. Fuertes Saavedra, do Grupo Fuxan os Ventos. Fálanos un chisco da próxima celebración dos 50 anos da súa creación. Tamén nos comenta que posiblemente editarán un CD no primeiro trimestre do 2022. Dámoslle os nosos parabens.

Na segunda hora falamos co Presidente da A.C.G. Rosalía de Castro de Cornellà, Óliver Fernández, que nos comenta algunhas das actividades que realizaron e das próximas a celebrar: O tradicional Magosto, a comezos de mes, a Excursión a Peñíscola, o Campionato de Tute, a presentación do noso Certame no Culturgal de Pontevedra para a príxma semana (os días 27 e 28 de novembro), a Edición dun CD cos 12 pezas musicais que levará por título : "Alborada en Cornellà", Conferencia sobre a "Xulipedia.com" para o 11 de decembro, xunto coa cea de socios e simpatizantes e o fallo dos premiados no "XXXV Certame Nacional de Poesía Rosalía de Castro de Cornellà".

Seguimos cun bocadiño máis de música e conectamos con Xosé Lois, xerente da Empresa "Da Veiga - Galletas Mariñeiras". Coméntanos as vicisitudes que tiveron que pasar con esta pandemia que estamos a padecer, que seguen adiante co seu proxecto e que próximamente, quizáis para antes do Nadal, presenten unha novidade interesante, con novos productos. Desexámoslle moitos éxitos.

E finalizamos as conversas entrevistando a Esther Corral do "Bar Galicia" do Concello de Betanzos. Campeón do concurso organizado dentro da Semana da Tortilla de Betanzos. Felicitámola polo seu premio e desexámoslle que siga disfrutando e facendo felices aos seus clientes.

E despedímonos ate o vindeiro xoves á mesma hora. 

¡Que teñan unha feliz semana!

XOVES 18 de NOVEMBRO do 2021

Comezamos dándolles a ben-vinda a tódolos nosos oíntes e seguidores para, despois de escoitar un bocadiño de música, conectar con Galicia para falar con Juan Parcero, un escritor de Moaña, que xa ten publicado tres novelas. Fálanos desas obras que compoñen unha triloxía (triloxía do esquecemento) ambientada precisamente na súa localidade natal, Moaña, con protagonistas inventados, pero que teñen moito a ver coa creación literaria que se pode atopar na súa escrita. Está a piques de publicar unha nova obra relacionada coa Ciencia Ficción, pola Editorial Galaxia. Comprometémonos voltar a comunicarnos con el cando se poña no prelo,  para celebralo.

A segunda intervención é a do noso correspondente na Ribeira Sacra, Xosé Manuel, encargado da sección Quen che Preguntou? Fainos un percorrido polas informacións escollidas cos seus "Desghústanme e Ghústanme" e continúa con dúas fermosas frases con certa sorna retranqueira, que ten recollidas na súa "libretiña pequena". ¡Moitas grazas!

Despois voltamos novamente a Moaña, para falarmos con Carlos, un dos socios de "A MeixoEira Sociedade Cooperativa Galega". Elaboran Queixo de Cabra. Parabenizámolo porque veñen de recibir a Medalla de Bronce no World Cheese, recentemente celebrado en Oviedo. ¡Felicitacións e desexos de que sigan colleitando moitos éxitos!.

Falamos a continuación con Beatriz Dourado, poeta galegocatalana -como ela mesmo se define- a quen admiramos pola súa traxectoria e bon facer creativo. Falamos de poesía, da súa participación no "IV Certame de Poesía Torre de Caldaloba" como membro do Xurado, da próxima presentción dun traballo relacionado coa infancia, e agasállanos coa lectura de dous poemas: un da súa autoría e outro que se inclúe nun libriño que nos recomenda "Manifesto 25-N", da nosa benquerida e admirada Andrea Fernández Maneiro. ¡Moitas grazas pola túa participación de hoxe!

E finalizamos a emisión de hoxe voltando a Galicia, para falarmos con Román, un dos socios da "Sociedade Cooperativa A Carqueixa", que veñen de inagurar unha tenda na Plaza de Abastos de Lugo: "O Sabor dos Ancares". Felicitámolos tamén e desexamos que sigan tendo moita sorte e moitos éxitos.

Despedímonos ate a vindeira semana á mesma hora. 

Aquí deixamos o programa completo.

XOVES 11 do mes dos SANTOS de 2021

Unha nova emisión deste noso programa "Galegos no BAIX", con ganas de aprender e dar a coñecer algunhas cousas interesantes da nosa cultura e das nosas "xentes". Comezamos saudando aos oíntes e seguidores e coa nosa sintonía de sempre... Escoitamos un bocadiño de música do ultimo traballo de Carmen Penim (Cantos de Terra e Sal), e precisamente poñémonos en contacto con ela. Saudámola e dámoslle a ben-vinda para despois comentar diversas e interesantes cousas nas que está a traballar, xunto co seu compañeiro Maurizio Polsinelli. Por certo, aproveitamos a ocasión para enviarlle os nosos parabens a Maurizio, por ter acadado un Premio coa súa creación poética na comarca de Valdeorras. Felicitacións que tamén facemos extensivas a Carmen por esa fermosa aportación e creación musical que titula "Ven que che Canto un Conto" e que está a recibir moitas felicitacións. Desexámoslle que sigan colleitando moitos éxitos.

A continuación, despois de escoitar outro bocadiño de música, retomamos a conexión co noso correspondente na Ribeira Sacra, Xosé Manuel F. Montes, que estivo ausente nalgunhas emisións por causas moi persoais. Comeza cos seus "Ghústanme" e "Desghústanme", que corresponden a súa sección "Quen che preguntou?" habitual, ademais das cousas da súa libretiña. Agradecémoslle a súa aportación e disfrutamos coa súa crónica.

Seguimos a emisión conectando con Andrea Fernández Maneiro, escritora e poeta de Carril (Vilagarcía de Arousa) que ven de recibir o Premio de Poesía "Torre de Caldaloba", polo seu poemario "Contra-Tempos". Falamos del e doutras aportacións creativas. Agasállanos coa lectura duns versos da súa autoría.

Na segunda hora conectamos con Ovidio, do "Mesón CATRO VENTOS", en Lugar de Barbeitos, a Fonsagrada. Un Restaurante de grande prestixio pola súa oferta de carnes á brasa. Moi frecuentado polos pelegríns do Camiño de Santiago, pero tamén por moitos amantes da carne de calidade que se sirve neste establecemento. Carne da súa propia explotación con vacas e tenreiros de raza Vianesa.

 

A última intervención é a da benquerida e admirada Elena Ferro, que xa tivemos nalgunhas ocasións nesta nosa humilde emisión. Fálanos das creacións e publicacións tan fermosas relacionadas coa artesanía en zocos. Felicitámola pola participación con Rubén Riós, nos Documentais "Arrieros Somos". Tamén lle damos os nosos parabens pola súa aportación creativa, relacionada coas persoas da illa de La Palma. E finalizamos agradecéndolle a súa participación de hoxe.

O vindeiro xoves voltaremos. 

Que teñades unha feliz semana. 

Aquí deixamos o programa enteiro.

XOVES 04 de NOVEMBRO do 2021

Comezamos unha nova emisión de "Galegos no BAIX!", dándolles a Ben-vinda e escoitando un bocadiño de música para darlle paso á comunicación con Mon Devane, Artista Urbano, un grande diseñador, pintor e muralista galego, nado en Ourense, con quen tratamos de descubrir algunhas das súas fermosas obras espalladas polas xeografía galega, e moi concretamente na Baixa Limia. Fálanos da súa obra que el mesmo define como fotorealismo monocromático. Ven de realizar unha exposición -Las Estrellas del Camino-  moi interesante e importante xa que recibiu o "Premio Eficacia 2021". Felicitámolo e desexámoslle que siga colleitando moitos éxitos.

A segunda convidada é Susana Fernández, unha enxeñeira que ten ao seu cargo a realización de dous proxectos moi importantes: dúas Plantas de Biogas, que se porán en marcha nas provincias de Lugo e Ourense. Felicitámola por ese traballo e desexámoslle que teña moito éxito. Tamén nos fala da súa localidade de procedencia, Grou, na que ten varios obxetivos que levar adiante e nos que está a traballar para poder darlle máis oportunidades e mellor calidade aos veciños: A rehabilitación dun edificio no que poderán dispoñer dun espazo para talleres de informática e unha biblioteca. Agradecémoslle a súa amable atención e informacións que serven de aprendizaxe para nosoutros.

Continuamos na segunda hora conectando novamente con Galicia para falarmos con dona Marisol Martínez Mato, a "Chef" do Restaurante "Mar de Ardora". Mágoa non poder estar máis preto para poder achegarnos a esa localidade de Cabana de Bergantiños, onde está localizado ese Restaurante que ademais de ter varios e prestixiosos Premios (como o Tenedor de Ouro do 2002, Prato de Ouro da Gastronomía Española... etc.) tamén está nunha localización privilexiada. Dende o mesmo comedor pódese disfrutar dunhas vistas fermosas e engaiolantes. Fálanos dos menús que se poden degustar, nos que non pode faltar a mellor selección de peixes e mariscos así como os seus saborosos postres caseiros. Agradecémoslle a súa atención e desexámoslles que teñan moitos éxitos.

Finalizamos o programa entrevistando a dona Isabel Chapela Lorenzo, natural de Moaña, bióloga, oceanográfica e escritora que acaba de presentar un libro moi interesante: "Nunca fuimos normales". Trátase dun libro que contén varios relatos relacionados coas propias vivencias da autora. Algo noveladas, pero tentando dar a coñecer aos seus posibles lectores, as peripecias que lle aconteceron nos diversos viaxes-embarques que realizou nos ultimos tempos. Agradecémoslle as súas explicacións e prometémonos voltar a conectar con ela, depois de ler o seu libriño, para seguir comentando cousas del. ¡Moitas grazas, Isabel!

Desexamos que volvan a conectar con nosoutros o vindeiro xoves. Aquí lles deixamos o programa enteiro.