XOVES 29 de MAIO do 2025

Unha emisión máis do noso programa que encetamos, coma sempre, coa nosa sintonía, as salutacións oportunas e un bocadiño de música para aproveitar e conectar con Galicia para falar con XOSÉ GONZÁLEZ MARTÍNEZ. Agradecémoslle a súa amable atención e conversamos sobre algunhas cousas moi interesantes. Primeiro felicitámolo pola celebración dos "XXIX Premios Peña Novo-2025" que este ano se lle concederon á Xornalista Esther Estévez Casado, ao historiador Miguel Anxo Seixas e á Asesoría Xurídica da Deputación de Lugo. Coméntanos algunhas cousas curiosas sobre os galardonados e tamén nos adianta a próxima e vindeira celebración da entrega da distinción "Xuíz do Couto Mixto-2025", que terá como novidade a entrega ao "Conselh Generau d'Arán" e a outros destacados persoeiros máis. Sempre é unha satisfación e unha honra poder recibir as súas noticias e explicacións. Desexamos que siga colleitando moitos éxitos.

A segunda intervención, é a do Historiador DANIEL MARTIN GIL, Presidente do "VIII Certame de Relato Curto -Manuel Rivas- da Irmandade Galega de Rubí". Cóntanos que a participación foi moi abondosa e de grande calidade. As catro categorías tiveron os seus premiados. Anúncianos os nomes dos escritos premiados e dos seus autores. Tamén nos comenta algunhas cousas da súa traxectoria profisional e tamén das súas publicacións, que estivo presentando na "Feira do Libro de Sabadell" e informa aos escoitantes que se poden adquirir poñéndose en contacto con el no seu instagram e tamén en Amazón. Desexamos que teña moitos éxitos na súa andaina.

Voltamos novamente a Galicia, concretamente a TUI, despois de escoitar outro bocadiño de música, para poñernos en contacto con GUS ABREU, un grande e extraordinario fotógrafo. Felicitámolo polas publicacións nas que participou e onde se poden atopar moitas das súas fantásticas fotografías. Falamos concretamente do libro "Euro cidade Tui-Valença do Minho" e tamén o libriño das "Festas de San Telmo-2025", cheas de fotografías moi especiais, que recollen recunchos e detalles recónditos da Catedral-Fortaleza de Tui. Tamén nos fala da súa páxina en vimeo.com, que contén unha destacada cantidade de videos moi interesantes. Agradecémoslle a súa amable atención e desexamos que siga colleitando moitos éxitos.

Continuando coa nosa emisión poñémonos en contacto con ANTONIO, Presidente da Irmandade Galega O NOSO LAR de Terrassa, que esta fin de semana celebrarán a "43 Festa Galega de Terrassa-2025", xunto coa posta en valor das "Letras Galegas-2025". Este ano mudan un chisco de situación, será nas Ramblas de Terrassa, precisamente xunto en frente da parada dos Ferrocarriles Cataláns. Comezarán as festas o vindeiro venres a partir das 18 horas, para dedicarlles espazo á xuventude e a participación da Asociación Alma Flamenca coas súas Sevillanas. O sábado terán sesión vermut con actuación de Grupos Galegos e xantar de Socios. Pola tarde continuarán con novas actuacións galegas e verbena a cargo da Orquestra Klan. O domingo continuarán máis actuacións, o Xantar Oficial coa asistencia das Asociacións Galegas colaboradoras e outras de Terrassa, xunto coa participación de autoridades locais e autonómicas. Pola tarde novamente actuacións galegas e verbena a cargo da Orquestra Klan, como final de Festa. Desexamos que teñan moita asistencia e que disfruten amosando a nosa cultura galega: musical, gastronómica e literaria.

Despedímonos ate o vindeiro xoves á mesma hora, ofrecéndolles unha selección de pezas musicais galegas. ¡Que teñan unha feliz semana!

Deixamos aquí o programa Completo-Enteiro.

XOVES 22 de MAIO do 2025

Comezamos o noso programa coa nosa sintonía de sempre, as salutacións e ofrecémoslles un bocadiño de música para poñernos en contacto con PEPE FORMOSO, do Bela Fisterra e Bela Muxía. Parabenizámolo pola fermosa celebración que fixeron no Bela Muxía para celebrar as Letras Galegas 2025, mediante a actuaciónción das Pandereteiras da Universidade Popular de Corcubión XAVIÑANAS e as RINCHONAS. Conversamos con el e fainos partícipe dalgunhas novidades que nos comenta polo miúdo, en especial esa exposición no Bela Fisterra: Ruta dos Peixes e dos Faros, a exposición do Colectivo Retoque Retro. Este venres 23 de maio a partir das 18:30 inaugúrase a exposición cunha selección de pezas creadas con coloridas crebas (refugallos qeu desbota o mar). Tamén no convida á próxima celebración do evento Eno-Literario previsto para o día 7 de xuño próximo e que contará con cen viños de Galicia e cen libros, coa participación de moitos autores e escritores. Agradecémoslle a súa colaboración no noso programa de hoxe e desexámoslle que teña moito éxito.

O seguinte convidado é RUBEN GARCÍA, un músico auto-didacta que toca o Acordión Diatónico con moita mestría. Estivo participando na homenaxe que lle fixeron a Pazos de Merexo, un grande intérprete deste instrumento. Tamén nos comenta que ten actuado en moitos eventos aos que o convidan para tocar. Outra novidade que nos revela, e u pequeno adianto refírese a que pronto terán algunha publicación xunto con un baixista que tamén toca con el. Chamaranse "Zoupalleahí". Agradecémoslle a súa participación e desexámoslle que teñan moito éxito na súa andaina.

Recibimos ao noso correspondente na capital da Ribeira Sacra, XOSÉ MANUEL F. MONTES, encargado da sección QUEN CHE PREGUNTOU? e que está sub-dividida en tres partes: O Bule-Bulo, Que pasa, que pasa na Ribeira Sacra e Sabedoría Popular, na que sempre ten a participación dun personaxe de relevancia. Nesta ocasión é Xan Veiga, que nos agasalla coa súa aportación reflexiva. Agradecémoslle a súa crónica tan ben argallada.

Conversamos un chiquiño co noso novo técnico, DANI, que é o responsable de que esta nosa emisión saia en antena. Agradecémoslle a súa grande profesionalidade e seguro que teremos unha andaina moi fructífera. Aproveitamos para anunciarlles a proposta seguinte para que escoiten e disfruten. Trátase do audio dun documental que leva por título: "Ferro, madeira e pel", dirixido a tódolos públicos no que se aborda o papel das cantareiras homenaxeadas no Día das Letras Galegas 2025. A peza conta coa participación de Tanxugueiras, Xabier Díaz, Bieito Romero, hydn, Aldara Palmeiro e Carlos G. Casás. Buscaremos a maneira de poñernos en contacto co productor, Paco Guitián Valeiro.

 

Podedes disfrutar del no seguinte enlace:  

https://youtu.be/kNgxeJ_5fwM?si=rZSzhed1sC1g2x8B. 

Este é o audio que anunciamos no parágrafo anterior co que seguro disfrutaredes, e con el queremos celebrar o DÍA DAS LETRAS GALEGAS - 2025, con todos vostedes. Agardamos que sexa do voso agrado.

Deixamos aquí o programa Completo-Enteiro.

XOVES 15 de MAIO do 2025

Este xoves comezamos a emisión dende a Radio Municipal de TUI. Unha moi especial atención que tivo con nosoutros a Directora dona BETI REI, que nos atende moi amable e agarimosamente. Dámoslles a ben-vinda e comezamos a misión recibindo ás "PITUQUIÑAS", cantareiras novas que nos agasallan coa interpretación dunha canción das nosas cantareiras, para celebrar por adiantado o día das "Letras Galegas-2025". Este grupo de mociñas son unha mostra das alumnas que dirixe a profesora AURI, que moi amablemente nos recibe e amosa a súa satisfación comprobando cómo cantan e interpretan esa primeira actuación e continuamos a emisión, dende os estudios desta Radio.

A continuación recibimos a visita do Ilmo.Sr.Alcalde de TUI, don ENRIQUE CABALEIRO, a quen felicitamos polas moitas actividades e grandes eventos que se realizan nesta "Euro Cidade" que comparte con Valença do Minho de Portugal. Mantemos unha conversa moi amena, chea de información e coñecementos para que os nosos escoitantes poidan coñecer maís polo miudo as peculiriaridades patrimoniais e culinarias das que se poden disfrutar nesta localidade. Fainos unha mención especial da Catedral-Fortaleza que é un edificio extraordinario e moi visitado polo pelegríns do Camiño de Santrigao Portugués, que moitos comezan precisamente dende TUI. Tamén nos fala da gastronomía especial moi importante, como son as angulas, que aquí reciben o nome de "meixón"... Agradecémoslle a súa amabilidade e participación no noso programa en directo dende esta localidade raiana.

Falamos con AURI, Profesora das "Pituquiñas" que tan ben interpretaron outra peza musical das cantareiras. A verdade é que escoitar a estas interpretes en directo fannos delitarnos coa súa música. Felicitámolas e desexamos que sigan colleitando moitos éxitos.

Temos nos estudios á Conselleira de Cultura, Educación e Mocidade, dona SONSOLES VICENTE, que continúa a darnos a coñecer esta localidade feiticeira, chea de engado. O río Miño, o "Pai Miño" dalle un encanto especial, que recalca o noso correspondente Xoan Arco da Vella, que tamén nos acompaña nesta emisión en directo dende a Radio Municipal de TUI. É un feito histórico, para nosoutros, que se emita o noso porgrama para os galegos do Mediterráneo, dende Tui, mediante a colaboración da Radio Municipal de Tui e a Radio Municipal de Sant Boi de Llobregat. Estamos moi agradecidos pola recepción.

Seguimos emitindo e dámoslle paso a outras intérpretes musicais: as "Arranca Xestas", mozas bravas que nos deleitan coa interpretación dunha peza, mentres falamos con BETI REY, a Directora da Radio Municipal de TUI. Comentamos algunhas peculiaridades desta emisora Municipal que leva moito tempo emitindo con asiduidade, dando a colecer tódalas noticias e acontecementos locais e de relevancia, concretamente este sábado estarán, en directo na celebración da "Letras Galegas 2025" e na Feira do Libro da localidade. Agradecémoslle a súa amable colaboración para que esto se levra adiante sen ningún impedimento. Dámoslles as grazas ao técnico desta Radio Xabier e ao noso técnico de Radio Sant Boi, Dani, que son os responsable de que este programa saíra adiante. Despedímonos ate o vindeiro xoves á mesma hora. ¡Que teñan unha feliz semana!

Deixamos aquí o programa completo.

XOVES 8 de MAIO do 2025

Comezamos o programa dende as instalacións de RADIO ALLARIZ, na localidade do mesmo nome. Agradecémoslle a colaboración do seu responsable CARLOS FERNÁNDEZ DURÁN, que nos recibe moi amablemente e axúdanos nas tarefas de confección deste programa. Un feito histórico, para a nosa emisión e para a propia Radio, xa que emitimos o programa dende Allariz (Ourense). Comezamos coa nosa sintonía e un bocadiño de música para darlle a ben-vida e recibir ao noso correspondente na capital da Ribeira Sacra, XOSÉ MANUEL F. MONTES, encargado da sección QUEN CHE PREGUNTROU? coas sub-seccións acostumadas sempre cheas de interese. Agradecémoslle a súa colaboración.

A seguir recibimos ao Sr. Concelleiro de  Cultura de Allariz, don ALBERTO CONDE RODRÍGUEZ.  A entrevista é un compendio de informacións e novidades moi interesantes relacionadas coas celebracións próximas, como  é o día da Letras Galegas-2025. Convídanos a visitar esta localidade chea de historia e cultura. Fálanos da Festa do Boi, das feiras de produtos locais de alta calidade, da degustación gastronómica tan recoñecida e de grande tradición popular, como é a carne de boi... Agradecémoslle a súa participación no programa de hoxe, que emitimos dende Radio Allariz.

Chamamos a MIGUEL MOSQUERA, responsable da Confitería-Repostería FINA REI, unha referencia moi importante nesta cidade. Fálanos da creación LEGATUM, que consiste en cinco esculturas feitas en chocolate creadas por cinco escultores galegos de grande renome no eido cultural galego (Acisclo Manzano, Soledad Penalta, Arturo Andrade, Xosé Cid e Acisclo Novo). Tamén nos fala dos doces tradicionais, dos amendoados, das roscas, das galletas con nata... Unha marabilla da gastronomía reposteria na que non faltan os bomboóns e toda unha serie de exquisiteces que se poden degustar no seu establecemento. Desexámoslle que sigan colleitando moitos éxitos.

Recibimos ao Vicepresidente da Fundación Vicente Risco, don ANTÓN BLANCO RODRÍGUEZ, un personaxe ilustre da localidade, que segundo nos informaron é o cronista oficial deste Concello. Mantemos unha conversa-entrevista chea de engado e aprendizaxe, na que nos fai un pequeno percorrido pola Fundación Vicente Risco, por algúns recunchos cheos de interese e tamén unhas pinceladas históricas que nos encandilan. Agradecémoslle a súa participación no programa de hoxe, e comprometémonos a voltar a conectar con el noutra ocasión para seguirmos aprendendo e coñecer, máis polo miúdo, algo do patrimonio desta fermosa vila alaricana da provincia de Ourense. E despedímonos ate o vindeiro xoves á mesma hora. Que teñan unha feliz semana.

Deixamos aquí o programa Completo-Enteiro.

XOVES 24 de ABRIL do 2025

Despois do descanso da Semana Santa, comezamos unha nova emisión de "Galegos no BAIX" coa nosa sintonía de sempre, dándolles a ben-vinda e ofrecéndolles a peza "Grándola Vila Morena" de Xosé Afonso, para adiantarnos á celebración da Revoluçao do cravos en Portugal, que se celebrará próximamente mañá, día 25. Precisamente esta peza sérvenos para conectarnos con Galicia e recibir á primeira convidada, dona SONSOLES VICENTE SOLLA, Concelleira de Educación, Cultura e Mocidade de TUI. Fainos un percorrido moi atinado da "Festa de San TELMO de Tui-2025". Coméntanos as diferentes actuacións culturais que teñen previstas e que comezaron co pregón a cargo dese grande actor teatral Avelino González. E continúan con moitas más actividades que nos pormenoriza ata o luns días 28 de abril. Agradecémoslle a súa colaboración e aportación no programa de hoxe e desexámoslle que sigan tendo moitos éxitos.

Continuamos escoitando outro bocadiño de música e voltamos outra vez á mesma localidade galega, TUI, para falar, nesta ocasión, coa Concelleira de Comercio e Turismo, dona ANA MARÍA NÚÑEZ ÁLVAREZ. Agradecémoslle a súa amable recepción e aproveitamos para que nos informe dalgunhas actuacións máis da mencionada "Festa de San TELMO-2025",  relacionadas co comercio, como a IV Feira do Viño da Raia", que tivo lugar a fin de semana pasada, pero como responsable de Turismo e tamén de Patrimonio e Conxunto Histórico, fainos un pequeno percorrido pola fermosísima Catedral-Fortaleza, chea de encanto así como tamén do conxunto medievalista xudeo e outras importantes xoias que se poden admirar nesta vila Euro-Atlántica que paga a pena visitar. Foi unha honra e un pracer contar coa súa colaboración e desexamos que sigan disfrutando da Festa e con moito éxito.

Despois doutra peza musical recibimos á terceira convidada: BETI REY, da Radio Municipal de Tui. Parabenizámola porque acaba de ser elixida, hai pouco tempo, como responsable comunicadora desa Emisora Municipal. Coméntanos a súa faceta engaiolante de transmisión oral e de proximidade que ten a Radio Municipal, que serve para achegar as novidades e outras informacións de interese local a tódolos escoitantes e receptores. A súa participación e recollida de actos e eventos que se desenrolan na cidade e moitas comunicacións que serven para informar con detalle e prontitude. Tamén nos comenta as moitas intervencións nas tivo que participar e asistir nestas Festas de San Telmo deste ano. Agradecémoslle a súa participación e desexamos que siga colleitando moitos éxitos nesa tarefa comunicativa.

Escoitamos outro bocadiño de música e como adianto ao seguinte convidado, que por causas alleas non podemos aínda conectar con el, informamos, e damos unhas pequenas pinceladas relacionadas coa Panadería Rabizas, de Betanzos, que é a segunda máis antiga de España. Un forno do século XVI, está rexentado pola terceira xeración duns propietarios que se fixeron cargo del no ano 1940, segundo temos entendido. Seguimos escoitando algo de música mentres non conectamos con Manolo, ao que tiñamos previsto entrevistar.

Recibimos a MANOLO SANTOS, da Panadería Rabizas. Parabenizámolo porque acaba de recibir no Foro Gastronómico de A Coruña un recoñecemento como unha das Panaderías Históricas. Fainos unha pequena descrición desa panadería que serve pan de alta calidade aos seus clientes. Tamén teñen empanadas, croisants, tartas de amendoas e biscoitos de mazá. Non son pastelaría, pero seguen a servir aos seus clientes como unha panadería tradicional e popular. Tamén atenden encargos para cocer outros produtos que lles solicitan, como asados moi específicos. Agradecémoslle a súa amable atención e voltamos a felicitalo e desexarlle que sigan tendo moitos éxitos e moita clientela. Aproveitamos para despedirnos ata o vindeiro xoves á mesma hora.

Deixamos aquí o programa Completo-Enteiro.

XOVES 10 de ABRIL do 2025

Unha nova emisión do noso programa de cada xoves. Comezamos coa nosa sintonía, as salutacións oportunas e unha peciña de música, poñémonos en contacto con HELENA POUSA ORTEGA, en Salceda de Caselas, que nos fala das actividades que teñen previstas realizar a partir de mañá día 11, o sábado 12, o domingo 13 e o venres 25 relacionadas, todas elas coa Memoria Histórica. Grandes eventos moi importantes con Conferencias, Exposicións e moitas cousas máis, que ela nos detalla con precisión e que ademais pódense consultar na páxina que teñen habilitada. Agradecémoslle as informacións recibidas e desexámoslle que teñan moitos éxito.

A continuación damos a coñecer varias informacións moi interesantes: a próxima celebración da "XLV Feira do Viño de AMANDI". Tiñamos previsto conectar co Ilmo.Señor Alcalde de Sober, don LUÍS FERNÁNDEZ GUITIÁN, pero non puido ser, porque non avisamos con tempo e ten outros compromisos urxentes. De tódolos xeitos sabemos que a persoa que fará o Pregón deste evento será LUCÍA PÉREZ. Comeza esta Feira mañá mesmo, día 11. As cinco da tarde haberá unha pre.cata e a continuación o Pregón denantes anunciado. Tamén comentamos a próxima celebración da "LXV Festa da LAMPREA-2025" que se fai na localidade de ARBO.

Seguimos escoitando outro bocadiño de música e temos a honra de recibir ao Ilmo.Sr. Alcalde de ARBO, don HORACIO GIL EXPÓSITO. Falabamos denantes da Festa da Lamprea e o propio Sr. Alcalde fainos unha intervención moi axeitada relacionada con este acontecemento declarado de Interese Turístico Internacional. Tamén nos fala de "ARBO-MOSTRA", algo que ten unha repercusión moi importante e relevante para os veciños e adegueiros que no Centro de Interpretación do Viño e da Lamprea se poden admirar e informar con precisión. Agradecémoslle a súa amable atención e desexámoslles que teñan moito éxito.

Recibimos a crónica do noso correspondente na capital da Ribeira Sacra -Monforte de Lemos- XOSÉ MANUEL F. MONTES, encargado do apartado "QUEN CHE PREGUNTOU", que está sub-dividido en tres seccións moi específicas: O Bule-Bulo, o Que pasa, que pasa na Ribeira Sacra e a Sabedoría Popular que sempre finaliza coa intervención dun personaxe destacable colaborando coa sú aportación persoal. Sempre agradecidos ao noso correspondente, a quen lle desexaos unha feliz Semana Santa.

Conectamos novamente con Galicia para falar con MIGUEL FERREIRA, da Panadería "O Pan de San Antonio", en Pontecaldelas (Pontevedra). Comezamos a conversa-entrevista falando de que el representa xa a terceira xeración de panadeiros artesáns. Seus avós comezaron aló polo 1939 cun forno tradicional, ata hoxendía, que el segue a tradición familiar, ampliando as ofertas e produtos que os clientes poden degustar e mercar, non só no seu establecemento, senón que tamén se poden adquirir via "on line", xa que teñen un servizo moi importante con pan, empanadas e doces de grande calidade. Ademais están asociados cun Asador de Miranda do Ebro (José Antonio concretamente) que mediante a empresa MORALON, tamén serven esas empanadas e doces de grande calidade. Agradecémoslle a súa participación de hoxe e desexamos que teñan moitos pedidos e moito éxito! Aproveitamos para desexarlles unha FELIZ SEMANA SANTA e despedirnos ate o vindeiro xoves á mesma hora.

Deixamos aquí o programa Completo-Enteiro

3 de ABRIL do 2025

Primeiro programa deste mes de abril, con todos vosoutros. Comezamos coa nosa sintonía de sempre, as salutacións e un bocadiño de música para recibir ao primeiro convidado: ANDRÉS GIRÁLDEZ, Actor que pertence a "Tanxarina Títeres" en Redondela. Parabenizámolo porque está a representar a obra "A burra, a Mesa e o Pau", xunto con outros compañeiros artistas, no Salón Teatro de Santiago de Compostela. Tamén nos fala da próxima celebración do "XXVI Festival Internacional de Títeres de Redondela, Memorial Juanjo Amoedo", previsto para os días 12 ao 18 de maio próximo. Desexámoslles moitos éxitos.

A continuación poñémonos en contacto con RUBÉN, da "CASA CASTELAO", en Fonsagrada. Tamén o parabenizamos pola grande "XXVIII FEIRA do Butelo-2025, na Fonsagrada", o 22 e 23 de febreiro pasado, que contou cunha grande afluencia e participación de veciños. A súa aportación cos produtos que ofrece son un reclamo moi importante nese evento. Fálanos dos produtos que se poden adquirir en moitos establecementos espallados pola península e tamén en Portugal e outras nacionalidades. Tamén se poden poñer en contacto con eles a través da súa páxina web: casacastelao.es, para poder mercalos xa que teñen un servicio online moi eficiente. Agradecémoslle a súa participación de hoxe e desexamos que siga colleitando moitos éxitos.

A seguinte comunicación é coa Ilma.Sra. Alcaldesa de Vilariño de Conso, dona MELISSA MACÍA DOMÍNGUEZ. Felicitámola porque teñen previsto celebrar a "Décima Edición do FESTIVAL INTERNACIONAL VIBOMASK MASCARADA IBÉRICA-2025", a fin de semana do 16 ao 18 de maio próximos. Un evento que congrerará nada menos que cincoenta grupos de máscaras de moitas localidades galegas, portuguesas e doutras nacionalidades, un total de máis de oitocentas persoas que compartirán esa grande celebración xunto co Concello de Viana do Bolo. Agradecémoslle a súa colaboración e participación no noso programa de hoxe e desexámoslle que teñan moitos éxitos.

Conectamos con XOSÉ BENITO REZA, Enxeneiro de Montes e Escritor, que foi Director Xeral de Conservación da Natureza. Nesta ocasión queremos parabenizalo pola recente publicación e presentación do seu libro "Ciencia e Misterio en Celanova. A capela mozárabe de San Miguel". Un grande traballo moi ben documentado que, segundo nos confesa escribiu xunto coa colaboración da súa filla. Agradecémoslle a súa aportación de hoxe no noso programa e desexámoslle que teña moitos lectores ese fermoso traballo que moitos galegos non coñecían. Aproveitamos para despedirnos ate o vindeiro xoves á mesma hora.

Deixamos aquí o programa Completo-Enteiro.

XOVES 27 de MARZO do 2025

Outro programa máis con todos vosoutros. Comezamos coa nosa sintonía de sempre, as salutacións oportunas, un bocadiño de música e poñémonos en contacto con EDUARDO, o responsable do "Restaurante AGARIMOS" de Badalona. Saudámolo e felicitámolo porque está a ofrecer, dende hai un tempo, os venres como prato estrela o Cocido Galego. Coméntanos que está a ter unha grande afluencia e reservas importantes. Tamén ofrece un Menú diário con catro pratos de primeiro e catro de segundo, con postre, bebida e café. Outro dos pratos moi solicitado, é o "bacallao", posto que sendo el de procedencia portuguesa, concretamente de Oporto, xunto coa súa dona (grande cociñeira e reposteira) elaboran tres modalidades de bacallao que son moi solicitadas. Agradecémoslle a súa atención e desexamos que sigan colleitando moito éxito.

A segunda convidada é PALOMA RAMOS, que elabora embutidos artesáns de grande Calidade, sendo a súa especialidade as "Androllas de Liñares": "Embutidos Paloma Ramos",  que este ano participou e ofreceu os seus produtos, por catorce ano consecutivo na Feira de Navia de Suarna. Sempre nos recibe moi amablemente. O seu traballo artesanal compleméntase co afumado dos seus produtos, elaborados de forma tradicional. É unha honra poder contar coa súa participación no noso programa.

 

Recibimos, a continuación a NADIA VÁZQUEZ, Gaiteira de grande prestixio, a quen parabenizamos polo seu traballo musical tan importante. Mantemos con ela unha conversa moi distendida e interesante, mediante a que nos dá a coñecer algo máis da súa traxectoria creativa e interpretativa, especialmente a da Musette, que como ela mesmo nos puntualiza, é a única muller gaiteira que fixo un Concerto na Catedral de Tui dando a coñecer ese instrumento medieval. Desexamos que teña moito éxito na súa andaina musical e pronto voltaremos a conectar con ela para que nos fale dos seus vindeiros traballos.

Na segunda hora conectamos co noso correspondente XOSÉ MANUEL F. MONTES, que dende Monforte de Lemos nos fai unha crónica moi ben argallada. Encargado da sección QUEN CHE PREGUNTOU?, que subdivide en tres apartados moi elaborados, precedidos dunha música moi axeitada. Agradecémoslle a súa atención e dedicación, que complementa a nosa emisión cun contido informativo e cultural moi importante.

Despois falamos co Ilmo.Sr. Alcalde do Concello de Quiroga, don XOSÉ LUÍS RIVERO CASTRO, que nos fala da "25 Mostra do Aceite de Quiroga", prevista para os días 29 e 30 de marzo próximos. Todo un acontecemento declarado como "Festa de Interese Turístico". Terán unha serie de actos moi importantes con participacións de "chefs" de Restaurantes de recoñecido prestixio, colleiteiros de aceite que amosarán os seus aceites, demostración da elaboración tradicional do aceite, e postos de venda de produtos. Tamén haberá actuacións musicais de interese tradicional e popular. Desexamos que teñan moito éxito e agradecémoslle a súa amable atención. Aproveitamos para despedirnos ate o vindeiro xoves á mesma hora.

Deixamos aquí o programa Completo-Enteiro.

XOVES 20 de MARZO do 2025

Comezamos unha nova emisión do "Galegos no BAIX" de cada xoves, coa nosa sintonía, as salutacións oportunas e un bocadiño de música das "TANXEDORAS". Precisamente con esta música de fondo recibimos a LENI PÉREZ, unha das fundadoras e partícipe dese Grupo de Música Tradicional Galego, que nos recibe moi amablemente. Cóntanos que están a preparar unha nova posta en marcha do seu Grupo musical. Tamén nos comenta a celebración dun Festival Musical que organizou e puxo en marcha: "Bembibre En Pé", que contou con moitos participantes e colaboradores, para reivindicar que non pase pola súa localidade unha estrada que teñen previsto poñer en marcha. Desexámoslle moitos éxitos na súa andaina.

 

Seguimos escoitando a música de "Tanxedoras" e poñémonos en contacto con RODRIGO COSTOYA, Profesor e escritor, que ven de publicar un seu último libro que leva por título: "O SÉCULO DO MILAGRE". Fixo a súa presentación no Hotel Bela Fisterra, contando coa participación do noso benquerido amigo Pepe Formoso, grande comunicador. Cóntanos parte da trama desenvolvida na novela recentemente publicada. Agradecémoslle a súa participación e desexámoslle moitos éxitos.

 

Continuamos a emisión e poñémonos en contacto con MIGUEL ANXO RODRÍGUEZ,

Presidente da Asociación de Albergues Galegos (AGALBER). Mantemos unha conversa relacionada cos Albergues Galegos que forman parte desa Asociación tan interesante. Teñen contabilizado que un de cada tres Albergues pertencen á AGALBER. Todos están interesados en ofrecer un servizo cheo de melloras e atencións especiais aos peregrinos e moi particularmente as "ceas de comunitarias", que formentan o intercambio e participación dos usuarios destas instalacións. Agradecémoslle a súa aportación de hoxe e desexamos que teñan moito éxito.

Seguimos escoitando outro bocadiño de música, do Grupo TANXEDORAS, para poñernos en contacto co Presidente do "Centro Galego NÓS" de Sabadell, don MANUEL VÁZQUEZ OSORIO. Fainos partícipe de varios eventos e actos que xa realizaron, como Teatro cos "Furafollas" o pasado día 15 de febreiro... pero coméntanos a próxima celebración, como cada ano, da "Festa do LACÓN", no Eix Macià, prevista para a fin de semana do 28, 29 e 30 de marzo. Son tres días cheos de oferta gastronómica con produtos de calidade, especialmente o Lacón, pero que tamén se poderán degustar outras viandas como polbo, e outros manxares de grande calidade. Aproveitamos para despedirnos ate o vindeiro xoves á mesma hora.

Deixamos aquí o programa completo-enteiro.

XOVES 13 de MARZO do 2025

Unha semana máis con todos vosoutros, tentando ofrecerlles dúas horas de Radio en Galego. Comezamos coa nosa sintonía, as salutacións e un bocadiño de música para poñernos en contacto con VALENTÍN ÍNSUA PALACIOS, Campaneiro da Catedral de Mondoñedo. Unha conversa moi agradable e chea de ensino, coa que aprendemos cousas interesantes sobre o nome das campanas e outras cousas. Coméntanos varias e importantes cuestións relacionadas co esa responsabilidade de conservar o toque das campanas da Catedral, que segundo nos explicou tiñan ese cometido as mulleres. Cóntanos algunha anécdota relacionada cos "trasnos" ou fantasmas, que ao parecer "habelos hainos". Agradecémoslle a súa participación e colaboración no programa de hoxe.

A segunda intervención, despois doutro bocadiño de música é a do Concelleiro MARCOS MARTÍNEZ FERNÁNDEZ, do Concello de Viana do Bolo. Fálanos da "53 Festa da Androlla" desa localidade, do Domingo Gordo, do Entrudio, dos boteiros e fulións. Coméntanos a grande afluencia e participación dese grande evento, que foi declarado Ben de Interés Cultural. Posiblemente consigan que se declare Ben de Interese Nacional. Felicitámolo e adiántanos que están a traballar para a posta en marcha da seguinte "Mascarada-2025" que, xunto con Vilariño de Conso teñen previsto realizar no vindeiro mes de maio, pero que aínda está por concretar, debido á moita participación que para este ano teñen casi confirmada. Un traballo que compre enfialo moi ben, xa que a poboación que se concentra nesa celebración é moi abondosa. Agradecémoslle a súa amable atención e desexamos que teñan moito éxito nesa andaina festiva e mostra entroideira.

Conectamos co noso correspondente, en Monforte de Lemos, XOSÉ MANUEL F. MONTES, encargado da sección QUEN CHE PREGUNTOU?, que nesta tempada comprende tres sub-seccións que titula: Bule-Bulo, Que pasa que pasa na Ribeira Sacra e Sabedoría Popular. Cada unha delas precedida dunha introducción musical moi axeitada. É unha honra contar coa súa colaboración tan feiticeira.

A conexión final é con LAURA, da Asociación AMAS DE CASA de MAZARICOS. Acaban de celebrar a "XXVI Festa do Bolo do Pote". Felicitámola e mandámoslle os memos parabens a todo o equipo de mulleres e demais persoas que estiveron a elaborar as racións que se despacharon egustaron esa fin de semana pasada en Mazaricos. Cóntanos en qué consiste ese prato e o grande éxito que tiveron a pesar do mal tempo que lles cadrou. Desexamos que continúen celebrando esa festa e prometémonos voltar a comentar con ela outras celebracións que teñan previstas. E coa música de fondo despedímonos ate o vindeiro xoves á mesma hora.

Deixamos aquí o Programa Completo-Enteiro.

XOVES 6 de MARZO do 2025

Un xoves máis con todos vosoutros, tentando levar adiante este programa en língua galega, con entrevistas, informacións, noticias e música para adubiar esta emisión. Escoitamos a nosa sintonía, saudamos a tódolos nosos oíntes e seguidores e escoitamos unha peciña musical mentres nos poñemos en contacto co primeiro convidado, MANUEL SUÁREZ, da Asociación Cultural Entroido Aguasantas, en Cotovade. Mantemos unha conversa chea de información e ensino relacionado coa recuperación desa tradición entroideira ancestral. Agradecémoslle a súa participación e desexámoslle que sigan recollendo moitos éxitos na súa tarefa e mostra cultural.

Escoitamos outra peza musical, namentres conectamos con MANUEL RIVERO PÉREZ, escritor e grande investigador, entre outras moitas particularidades e distincións académicas. Parabenizámolo polo recente traballo publicado no Consello da Cultura Galega, e tamén en Galicia Dixital, relacionado con dona LOLA ARRIBE DOPICO. Ferrolana íntegra e valente, que como el mesmo nos dice, destacou na política, na lingüística e na galeguización da liturxia. Fainos unha pequena descrición da súa traxectoria, destacando a súa faceta como poeta. Ten pensado publicar un libro que recollerá todo o investigado ate o dagora. Agradecémoslle a súa colaboración de hoxe, xa que coa súa participación poñendo en valor a unha muller de grande relevancia, adiantámonos á celebración do "Día Internacional da Muller", prevista para o día 8.

 

Recibimos nos estudios a dona AMPARO CENTENO PRIETO, grande amiga e colaboradora. Socia da Asociación C.G.Rosalía de Castro de Cornellà, membro do "Consell da Dona" de Cornellà, que nos ven a presentar e informar sobre os "Actos do Día Internacional da Dona Traballadora en Cornellà-2025". Un grande listado de actividades que comezaron a celebrarse o día 4 de marzo pasado, e que se prolongarán ao longo de todo este mes e finalizando o día 4 de abril vindeiro. Quérenos destacar a celebración, este domingo, da manifestación prevista para rememorar a desaparición da moza CRISTINA VERGUA.

Escoitamos outro bocadiño de música e continuamos a conversa con AMPARO CENTENO, que nos segue informado das diferentes actividades que se realizarán no mes de marzo en Cornellà, conmemorando o "Día da dona" que xa dixemos anteriormente, pero que se convertirá nun mes enteiro de actos, programados polo Concello e o Consell da Dona e moitas Entidades e Asociacións, poñendo de relieve a que ten previsto realizar a nosa Entidade A.C.G.Rosalía de Castro o día 29 coa impartición da Conferencia "A muller na música e na vida" que impartirá Clara Fariña Castro, compoñente de Pandereteiras de Verducido.

Coa música de fondo que escoitamos poñémonos en contacto con COCÓ BLANCO, encargado e coordinador da celebración, que teñen previsto para o domingo día 9 de marzo, do "Enterro do ÓSO". É esta unha Festa entroideira que se celebra cada ano o domingo seguinte ao mércores de cinsa, en Abanqueiro, do Concello de Boiro. Descríbenos en qué consiste esta festa entroideira moi anterga, chea de engado e cunha grande participación popular. O matrimonio elixido que concelebrará este acontecemento participará convidando a tódolos asistentes a uns petiscos e bebida. A colaboración dalgún establecemento e outros veciños tamén axudarán a que os gastos se repartan e todos poidan disfrutar. Agradecémoslle a súa participación e información detallada, desexándolles que teñan moito éxito. Aproveitamos para despedirnos de tódolos nosos oíntes e seguidores ate o vindeiro xoves á mesma hora.

Deixamos aquí o programa Completo-Enteiro.

XOVES 27 de FEBREIRO do 2025

Outra semaniña máis con todos vosoutros, tentando ofrecerlles estas dúas horas de Radio en Galego. Escoitamos a nosa sintonía, saudamos e escoitamos unha peciña de música para poñernos en contacto con ELIGIO SUEVOS OTERO, do Centro Galego de Lleida, que nos pon ao corriente da celebración da súa "Semana Cultural" de cada ano. Comezaron o mesmo luns pasado coa exposición de Traballos manuais, o martes dedicado aos cativos con debuxos e xogos de mesa acabando coa degustación dunha chocolatada para tódolos asistentes, o mércores a Conferencia a cargo de don Xosé Manuel García Catalán, Comisario do Corpo Nacional de Policía de Lleida, este xoves terán unha mostra culinaria que aportarán os socios e simpatizantes, mañá venres presentación do número 38 da revista "Xurdimento", que recolle tódolas actividades realizadas durante o ano 2024 e que contén moitos artigos interesantes, e finalizará a Semana Cultural coa Asemblea Xeral Ordinaria da Entidade cun xantar de convivio. Desexamos que teñan moito éxito.

A seguinte intervención é a do Presidente da Escola de Gaitas e Danzas Toxos e Xestas de BCN, don ALVARO VOCES, con quen mantemos unha conversa-entrevista moi amena e na que nos comunica a celebración, o día 8 de febreiro, do "II ENCONTRO DO DÍA INTERNACIONAL DA GAITA". Este segundo ano é unha afirmación e continuidade que comezaron o ano pasado, pero con convidados especiais, e moi concretamente Internacionais, tal e como anuncian no seu cataz. A verdade é que están a traballar moi concienzudamente para poer amosar a nosa cultura popular e moi concretamente a musical, relacionada coa gaita moi concretamente. O acto máis salientable será o concerto que realizará a gaitera SUSANA SEIVANE, para finalizar o evento. Tamén nos aidanta que están convidados a participar no grande desfile da "Festa de San Patricio" en Madrid. Desexamos que teñan moito éxito.

Escoitamos outra peza de música e poñémonos en contacto con CATUXA SALOM, unha cantautora galego-arxentina que nos presenta un traballo en primicia para tódolos nosos oíntes, galegos do Mediterraneo, que leva por título "As nosas raons", interpretado xuntamente coa cantante catalana Joana Dark, e que fusiona folklore catalán e galego e música electrónica. Parabenizámola e mantemos con ela unha pequena conversa-entrevista na que nos dá a coñecer un bocadiño do seu traballo musical, a publicación do CD "Caldo" que está proposto e seleccionado para os "Premios MIN 2025". Animamos aos nosos escoitantes e seguidores que se metan na páxina e voten esta opción para ser premiada. Agradecémoslle a súa participación no programa de hoxe, e desexamos que teña moito éxito. 

.

Despois dun pouquiño de música, novamente, ofrecémoslle a lectura do poema "Miña casiña, meu lar" para celebrar, con todos vosoutros, o "Día de Rosalía", con ese CALDO DE GRORIA, que tan ben describía a nosa autora, e co que se festexou ese 23 de febreiro pasado en moitos establecemetnos galegos.

Conectamos novamente con Galicia para darlle paso ao noso correspondente, XOSÉ MANUEL F. MONTES, na capital da Ribeira Sacra (Monforte de Lemos). Encargado do QUEN CHE PREGUNTOU? Que ten subdivido en tres apartados moi interesantes, precedidos sempre dunha música moi axeitada, e finalizando coa colaboración dunha persoa escollida por el mesmo, aportando a súa proposta persoal relacionada coa última sección: A Sabedoría Popular.  Despedímonos ate o vindeiro xoves á mesma hora.

 

Deixamos aquí o Programa Completo-Enteiro.