XOVES 24 DE OUTUBRO DO 2024

Outra emisión máis do noso programa "Galegos no BAIX". Comezamos coa nosa sintonía de sempre, e despois das salutacións de sempre, escoitamos unha audición do próximo convidado de hoxe, PACO RODRÍGUEZ GÓMEZ-DACAL. Saudámolo, dámoslle a benvinda e parabenizámolo polo seu traballo de recollida de cancións e coplas populares moi antigas. Entregou nada menos que varios cassetes coas pezas e coplas gravadas naquela zona de Xinzo da Limia, algunhas delas coa voz propia das persoas que lle-las ensinaron. Fainos un agasallo especial, cantando un bocadiño dalgunha daquelas coplas que aprendeu. Entregou toda esa documentación ao Museo do Pobo Galego, onde se atopan xa accesibles para tódolos estudosos e interesados na recolleita popular. Agradecémoslle a súa participación no programa de hoxe.

Continuamos con máis música, e nunca mellor dito, porque deseguida poñémonos en contacto con BIEITO ROMERO, do Grupo Musical BREO, que acaban de presentar un CD que leva por título: "Máis Alá". Recíbenos moi amablemente e coméntanos cómo foi o traballo de gravación e composición. Mantemos unha conversa moi agradable na que nos fala de onde procede o nome do Grupo Musical e cómo elixiron ese nome tan céltico e feiticeiro. Tamén nos comenta que xa o presentaron na Sala Garufa, da Coruña e próximamente tamén o presentarán na Casa das Crechas, en Santiago de Compostela. Recibímolo cunha das súas pezas, María a Meiga, e despedímolo tamén con outra peza que se atopa no seu disco. Despedímolo e desexamos que teñan moito éxito.

Conectamos agora con SILVIA CASTAÑEDA, Presidenta da "IRMANDADE GALEGA DE RUBÍ". Parabenizámola polo traballo que están a realizar nese Centro Galego. Coméntanos que celebrarán o día 2 de novembro a Festa do Magosto previa presentación dun documental moi interesante, titulado: "Anduriña, muller de ida e volta". Fainos saber que estiveron a traballar investigando sobre a posibilidade real de que o Camiño de Santiago pasara por Rubí. Teñen moita documentación e tan só están a espera dun documento que confirme realmente as súas investigacións. Para dalo a coñecer teñen previsto a realización dunha "Pulpada popular" o día 9 de novembro, coa posibilidade de expoñer imaxes fotográficas dos camiños que fixeron. Desexamos que todo decorra con ben.

Unha última conexión é con MIGUEL MOSQUERA, que pertence a FINA REI (Artesans de Repostería) en Allariz. Agradecémoslle a súa atención e parabenizámolo pola recente presentación dun traballo escpecional que conta coa aportación artística de varios escultores. Chámase LEGATUM. Son reproducións, en chocolate recheo, de esculturas realizadas por cinco escultores de renome: Acisclo Manzano, Soledad Penalta, Arturo Andrade, Xosé Cid e Acisclo Novo. Esas figuras reciben o nome de: Xénese, Agarimo, Díscolo, Odisea e Perenne. Representan o ciclo da vida, tal e como nos comenta Miguel. Unha forma máis de aportar cultura xunto co traballo artesanal que caracteriza esa Empresa que cumple máis de cincoenta anos de existencia. Agradecémoslle a súa participación no noso programa de hoxe.

Despedímonos ate o vindeiro xoves á mesma hora.

Deixamos aquí o programa completo.

XOVES 17 de OUTUBRO do 2024

Unha nova entrega do noso programa. Comezamos coa nosa sintonía, as salutacións e escoitamos unha peciña de música para recibir ao primeiro convidado de hoxe: MANUEL VÁZQUEZ OSORIO, Presidente do Centro Galego NÓS, de Sabadell, que nos fala da próxima "FESTA GALEGA", que se celebrará dende o 25 ata o 27 de outubro. Tamén nos informa doutras actividades previstas, como a celebración do Magosto tradicional, na Sede da Entidade, e próxima exposición de pinturas que terá lugar en datas aínda non confirmadas, e para a que teñen previsto xuntar sinerxias co "Noso LAR de Terrassa". Desexamos que teñan moito éxito.

A continuación poñémonos en contacto con GUSI DOMARCO, que forma parte dun equipo que levan a cabo a distribución de documentación moi importante relacionado coa nosa antropoloxía: lembrame.gal. Un traballo altruista no que participan tamén a súa compañeria Carolina Fernández e Sergio Santos Otero, ademais doutras persoas, que menciona nesta conversa que mantemos con el. Na súa páxina pódense contemplar e admirar videos, fotos e outras aportacións documentais moi interesantes e cheas de informacións, recollidas por eles, facéndolles cantar, ou falar aos maiores que aínda conservan e lembran moitas cousas que se esquecerían ou se perderían se non se plasmaran nos seus cortos. Préganos que lles digamos aos nosos oíntes e seguidores que lles regalen un "me gusta" na súa páxina e no seu canal de youtube. Agradecémoslle a súa amable participación no programa de hoxe, e desexámoslles moitos éxitos.

Seguimos a emisión e recibimos a crónica do noso correspondente na capital da Ribeira Sacra, XOSÉ MANUEL F. MONTES, que como xa adiantabamos na anterior conexión que nos fixo, está modificada e mellorada. Está dividida en varios apartados, que inicia previa escoita dunha peciña musical moi acaída: 1º Apartado: Bule... Bulo, precedido da peza musical "bule-bule rock, son Noticias escollidas nas os escoitantes terán que descubri cal é o "bulo" que nos tentou colar. 2º Apartado: Que pasa... que pasa na Ribeira Sacra, un compendio reducido de noticias que acontecen na Ribeira Sacra, que o inicia despois de escoitar a peciña musical "Brétema" do Grupo Baiuca. 3º Apartado: Escoitamos a peza de Uxía "A Fala", para encetar estas "Pingadelas de Sabedoría Popular" e finaliza co audio que nos envía cunha aportación ocurrente dun personaxe moi recoñecido. Hoxe "Alberte Montes". Agradecémoslle a súa colaboración.

E escoitamos unha peciña de música das "Pandereteiras de Verducido", un Grupo Musical Galego, que decidiu facer unha "pausa" na súa traxectoria musical, por mor de completar as súas formacións académicas e persoais. Falamos con CLARA, unha das súas compoñentes. Felicitámola e escoitamos un bocadiño da súa creación musical, porque ela tamén é compositora. É unha peza algo máis longa, pero a sensibilidade e interpretación que nos ofrece é encantadora. Convidámola a que nos veña a visitar o vindeiro día 26 á nosa Asociación C.G.Rosalía de Castro de Cornellà, que celebraremos o tradicional Magosto. Animámola a que siga coa súa tarefa estudiantil desexámoslle que teña moito éxito.

E despedímonos de todos, lembrándolles as diferentes actividades que a nosa Asociación C.G.Rosalía de Castro, ten previsto realizar neste outubro e novembro...

 

¡Que teñan unha feliz semana!

XOVES 10 de OUTUBRO do 2024

Comezamos coa nosa sintonía. Celebramos a recuperación do noso compañeiro Armando Fernández López, e despois das salutacións, escoitamos unha peza de música para recibir ao primeiro convidado de hoxe: don FRANCISCO XABIER ALMUIÑA CHOREN, da Casa Rural "Casa de Romualdo". Xa tivemos a honra de conversar con el noutra ocasión, pero hoxe temos que felicitalo porque foi elixido Presidente da Federación Galega de Turismo Rural. Nesta ocasión temos o privilexio de contar coa súa estimada participación, para comunicarlle aos nosos oíntes e seguidores que están a celebrar, e xa van 18 anos, os "Outonos Gastronómicos", que consisten nunha estancia de venres ou sábado con cea e almorzo por tan só cento sensenta e cinco euros. Os menús que ofrecen son de moita calidade e unha forma máis de coñecer esa gastronomía de proximidade que eles elaboran con tanto cariño. Desexamos que teñan moito éxito. 

A segunda conexión é con CARLOS JULIO GONZÁLEZ, periodista e grande coñecedor do entorno Quirogués, tanto é así que durante un certo tempo estivo á fronte do "Diario de Quiroga". Infórmanos que esta tarefa xa a rematou e está pendente dunha incorporación de traballo algo diferente. Parabenizámolo polo traballo de investigación titulado "Ondas de aquí: Catro décadas de Radio Municipal en Galicia", moi relacionado coas Emisoras Municipais, lóxicamente. Poden consultalo en Internet que está aberto para tódolos públicos. Desexamos que continúa disfrutando coa súa ilusión comunicativa e ofrecémonos para poder contactar con el cando teña algunha noticia que darnos. 

Despois voltamos a Galicia, concretamente a LIRA, para falar coa señora CARMEN, da Casa Rural XANELA DA LUA, con quen xa falamos noutras ocasións. Desta volta queremos que nos poña ao corrente das novedades e Menús que ofrece para os clientes que se queiran apuntar e disfrutar das ofertas do "Outono Gastronómico" que tamén ofrece no seu establecemento. Unha verdadeira degustación gastronómica con produtos da zona, con varios pratos a elixir, e cunha posible actividade que consiste nun paseo a cabalo pola zona, admirando a paisaxe tan feiticeira que alí se pode contemplar. Desexamos que teña moitos clientes e moito éxito. 

Continuamos a emisión conectando con EDUARDO BRAVO, da Adega Pazo de Lalón, no concello de Leiro. Unha edificación do ano 1204. Parabenizámolo por ter acadado o "Bacelo de Prata" que lle entregaron o sábada día 5 pasado no Pazo de Ulloa, nunha celebración que compartiu con Kalkói, que tamén foi agasallado por etiquetar os seus produtos en galego. Celebramos con el a traxectoria da súa Adega, que xa ten acadado varios premios e moi concretamente fai dous anos foi premiado como Mellor viño Branco de Galicia. Fainos saber que a degustación dos seus viños poden realizala no "Mesón do Xamón" en Carballiño, que é un establecemento dos máis antigos da vila. Tamén se poden atopar os seus viños na rúa Muntaner de Barcelona e en Madrid. 

E finalizamos a programación recibindo a EFRAÍM DÍAZ, Músico e Profesor nun Instituto en Laxe. Felicitámolo por ter alcanzado esa titularidade, despois de aprobar as oposicións. Un seu traballo final de carreira ten moito a ver co instrumento tradicional galego "Pito Pastoril". A súa participación no noso programa serve para coñecer un pouquiño máis, polo miúdo, en qué consiste ese instrumento que el coñece moi ben e que ten moi investigado, tanto é así que a súa Tese Doctoral vai encamiñada a publicar todo o que recolla sobre ese instrumento tradicional. Quedamos en voltar a comunicarnos con el para que nos axude a coñecer máis cousas. Agradecémoslle a súa colaboración. 

Desexamos que volvan a conectar con nosoutros o vindeiro xoves á mesma hora. 

 ¡Que teñan unha feliz semana!

XOVES 3 de OUTUBRO do 2024

Novamente con todos vosoutros, dúas horas de Radio en Galego. Comezamos coa nosa sintonía, as salutacións e disculpas porque non pode estar nos estudios o noso compañeiro Armando Fernández, a quen lle desexamos unha pronta recuperación. Ofrecémoslle unha peza musical: "Ligia Elena", interpretada pola "Banda e Coro do Conservatorio Profesional de Música de Tui", para recibir ao noso primeiro convidado: Xosé Anxo FONT, Director da Emisora de Radio Municipal de TUI. Recíbemos moi cordialmente, felicitámolo polo traballo e que están a desenvolver. Fálanos das distintas seccións que teñen na súa programación. Coméntanos cousas moi interesantes desa vila galega, do bairro e da zona xudea, da Catedral, dos moitos deportistas e en especial dos palistas e remeiros, do Monte Aloia, da situación privilexiada desa cidade... Recoméndanos a visita a esa localidade chea de engado, na que serán todos moi ben recibidos e atendidos. Agradecémoslle a súa participación con nosoutros.

Continuamos a programación poñéndonos en contacto con ALEX MOURE, da explotación gandeira : Kalekói. Felicitámolo porque foron elixidos para recibir o Premio Bacelo de Prata diste 2024, no Pazo-Adega dos Ulloa, o próximo día 5 de outubro, por etiquetar os seus produtos en língua galega. Fálanos da súa producción, leite, yogures, kéfir... Unha oferta moi natural e aprezada, que se pode atopar en numerosos establecementos galegos e tamén en Madrid e Barcelona. Tamén nos comenta que seguen a traballar para poder ofrecer algún producto máis, como queixo ou requeixo. Agradecémoslle a súa atención de hoxe e desexamos que sigan colleitando moitos éxitos.

A segunda hora comezámola co noso correspondente na Ribeira Sacra. Xosé Manuel F. Montes, que nos fai partícipe da remodelación da súa sección QUEN CHE PREGUNTOU? dividíndoa en varios apartados moi concretos: Primeiro Bule-Bulo, consistente en aportar seis novidades informativas na que unha delas non é verdadeira, e convida aos oíntes e seguidores que sexan capaces de descubrila. A segunda parte, moi específica, relacionada con noticias da Ribeira Sacra, moi concretamente, titulada "

Que pasa, que pasa ... na Ribeira Sacra?" e unha terceira "Pingadelas de sabedoría popular" consistente en aportar fraseoloxía popular galega, ditos, refráns (que moitas veces ten recollidos na súa "libretiña pequena"). Todo elo adubiado con música axeitada, escollida para deleitar aos oíntes nos diferentes apartados. Neste apartado conta coa colaboración de Pepe Capelán. Por ser esta a primeira vez, damos un espazo de tempo prudencial, ata a seguinte emisión do vindeiro xoves, para que intenten acertar o "bulo" que tentou colarnos o noso correspondente.

A ultima intervención é con STELLA MARIS GONZÁLEZ BALBUENA, Filóloga, escritora e poeta galega. Felicitámola pola celebración, hoxe mesmo a partir das 20h, do evento "Desafiando Sombras": Recital poético Plurilingüe, no que participarán unha ampla nómina de escritores e poetas declamando, en diversas línguas, conmemorando a traducción poética. Fainos partícipe da súa inquedanza e da grande colaboración de moitos e importantes persoas cos que contará esta noite. Recitarán en galego, portugués, inglés, francés, catalán, alemán... Desexámoslle que teña moito éxito. Comentamos a posibilidade de que graven algunha desas intervencións e que poidamos voltar a reproducilas para tódolos nosos oíntes e seguidores.

 

E despedímonos ata o vindeiro xoves á mesma hora. Aquí deixamos o programa completo.

XOVES 26 de SETEMBRO do 2024

Unha nova emisión de "Galegos no BAIX" para poder disfrutar das intervencións galegas dos convidados, durante dúas horas de Radio en galego. Comezamos coa estrea dunha peza musical que nos envióu o noso primeiro entrevistado, SANTI VELOSO, Presidente da ASOCIACIÓN CULTURAL E PEDAGÓXICA: "PONTE NAS ONDAS", que dende 1995 ven realizando actividades educativas e culturais no norte de Portugal e Galicia. Dende o ano 2002 estan a traballar na recuperación e difusión do Patrimonio Cultural común aos galegos e portugueses. Mantemos unha conversa chea de ensino e novidades moi interesantes, relacionadas coas propostas que realizarán durante este curso, e moi concretamente a celebración do trinta aniversario da creación e posta en marcha de "Ponte nas Ondas". Foi declarada pola UNESCO como "Exemplo Multicultural de Boas Prácticas". Parabenizámolo en nome de todo o equipo e desexamos que acaden moito éxito en todos os seus proxectos. Seguiremos en contacto.

O seguinte convidado é XANDRE VÁZQUEZ, de Educateatro, que nos fala da próxima estrea e posta en marcha dun Circo en Redondela, que será unha novidade moi importante a nivel de Galicia, única, galega cen por cen. Inauguran o día 4 de outubro: CIRCO DE PINOCHO. Levan preparando este acontecemento con moitísima ilusión dende fai moito tempo. Dende moi cativo sempre tivo a ilusión de montar un Circo, e pronto se fará realidade, para disfrute de maiores e cativos. Fálanos moi ilusionado dese espectáculo circense, musical e de creatividade, un espectáculo único que fusiona  o mellor do teatro musical e o circo, e que pretenden realizado ata o día 13, pero que despois desprazaranse por diversas cidades de Galicia, amosando unha nova visión do circo. Desexamos que teña moito éxito.

Escoitamos outra peciña de música para recibir ao poeta e escritor galego CARLOS DA AIRA, responsable do "Poemagosto - Festival Internacional de Poesía de Allariz", que se celebrará o día 5 de outubro no patio de Museo do Coiro. Un espacio de encontro de libre expresión con poesía, música e obradoiro, no que participarán unha morea de poetas que nos da a coñecer na súa intervención Carlos. Tamén haberá unha grande celebración infantil coa participación dunha grande colaboradora, para disfrute de cativos e familias. Desexamos que teñan moito éxito nesa andaina cultural chea de engado.

Despois de escoitar a Xabier Díaz, co comezo da súa peza "Flor de Maio", poñémonos en contacto con ARTUR PASTORIZA PUGA, grande Mestre e Profesor de Baile, investigador e divulgador con quen mantemos unha conversa moi interesante. Fálanos do seu traballo profisional, das súas actuacións recentes e tamén da posta en marcha do ""Seisporoito", para profesionalizar o baile e a música tradicional, un proxecto moi interesante e que terán a oportunidade, tódolos interesados e interesadas, de poder participar e apuntarse para recibir as clases respectivas, na súa propia páxina seisporoito.gal, que se celebrará unha vez ao mes (inauguración o vindeiro día 16 de outubro, concretamente, un domingo) nun local do Clot. Haberá dous turnos de clases: Iniciación e de Perfeccionamento. Non desbota calquera outra proposta para ampliar as clases nalgún Centro Galego que estea interesado. Desexamos que colleite moitos éxitos, despedímonos ate o xoves próximo.

 

Deixamos aquí o programa completo.

XOVES 19 de SETEMBRO do 2024

Segundo programa desta nova tempada 2024-2025.  Comezamos coa nosa sintonía de sempre, as salutacións e ben-vinda aos nosos oíntes e seguidores. Disculpamos a ausencia do noso compañeiro ARMANDO FERNÁNDEZ, por mor dun asunto moi persoal que atender, pero seguro que o vindeiro xoves poderemos contar coa súa presencia. Escoitamos unha peciña musical e poñémonos en contacto con AVELINO GONZÁLEZ, actor galego, narrador oral, monologuista, director de teatro e especialista de animación na rúa. Felicitámolo porque acaban de concederlle o título de "Xograr de Outono", no FIOT de CARBALLO. Unha conversa moi amena e chea de informacións relacionadas coa súa traxectoria creativa, tanto no teatro como outras innovacións moi interesantes. Agradecémoslle a súa participación de hoxe e desexámoslle moitos éxitos.

Escoitamos a peza: "O teu camiñar", de CAROLINA RUBIROSA, cantautora nada en O Grove, cunha traxectoria musical moi exitosa. Parabenizámola por estar elixida e participar, como xurado, no programa da Televisión Galega: "Liga dos Cantantes Extraordinarios". Pequena conversa, pero chea de contido e informacións persoais; fálanos dos seus traballos, das súas publicacións... e tamén dos proxectos nos que está a traballar para voltar a publicar non tardando. Estaremos atentos para poder ofrecérlle-los aos nosos oíntes e seguidores. Desexamos que Carolina siga acadando moitos éxitos, e despedímola con outra das súas cancións: "Sozinha".

 

O seguinte convidado é PEPE DO FIEIRO, persoa entrañable, de 90 anos de idade, que nos recibe moi amablemente, dende Fisterra. Coñecedor e grande camiñante do Monte Pindo -O Olimpo sagrado dos Celtas-, que axuda a coñecer a moitos interesados e desexosos de saber algo máis. Recomenda visitar esa grande reserva natural chea de engado e moitas lendas, así como tamén algunhas covas. Nos seus anos mozos ía con outros compañeiros a ese entorno facendo de pastor de ovellas, cabras e outros animais pertencentes aos pobos que lindan con esa fermosa zona, que se ergue con ciclópeas rocas zoomorfas ata chegar á Moa, con 627 metros de altitude sobre o nivel do mar. Dende alí pódense contemplar fermosísimas vistas panorámicas e unha posta de sol incomparable. Outro espectáculo é a fervenza do río Xallas, que se precipita ao mar dende corenta metros formando a Ría de Ézaro, única do mundo. O Sr.Pepe coñece os nomes de tódalas pedras e formas que alí se atopan. Tamén as ten anotadas nun seu caderno. Agradecémoslle a súa amable atención.

Falamos con CAROLINA SILVA, Presidenta da Asociación-Pro Fundación manoelvello.gal. Unha conversa moi interesante, na que nos pon ao corrente da figura que foi Manoel Vello, un activista cheo de inquedanzas por acadar un emprego do noso idioma en tódolos aspectos da vida, no consumo, no traballo, no lecer, nas comunicacións, nos xornais, nas novas tecnoloxías, nas documentacións, nos letreiros, nos envases, nos produtos galegos tanto alimenticios como doutra clas... Como eles mesmos nos din na súa páxina: É Manoel quen nos convoca para transmitirmos co goce do idioma, para revitalizalo e levalo de paseo, con alegría facendo de cada día unha festa co seu uso. Convida a tódolos nosos oíntes e seguidores para que entren na súa páxina web e facerse socios para poder acadar esa finalidade: A Fundación manoelvello.gal. Agradecémoslle a súa participación e desexamos que acaden ese obxectivo tan importante.

A última intervención é a de XURXO SOUTO, grande comunicador, actor, músico acordionista, escritor, director e locutor, Licenciado en filoloxía clásica. Recibímolo escoitando unha peza de Uxía, titulada: "Mazacinha"... Parabenizámolo porque será o encargado de participar, o día 21 de setembro, reivindicando a poesía de Vicente Risco, celebrando o 140 aniversario do nacemento del: Rock&Risco, NO ROI XORDO de Allariz, xunto a Radio Océano. Unha conversa á que nos convida a achegarnos, aínda que nos queda lonxana, porque será unha celebración especial e chea de engado. Augurámoslle moito éxito nesa fermosa celebración o sábado vindeiro. Moitas grazas, Xurxo. E despedímolo tamén con outra peciña: "Fui a fonte beber agua", de Antonio Zambujo. E aproveitamos para despedírmonos tamén nosoutros ata o vindeiro xoves á mesma hora.

Que teñan unha feliz semana! Deixamos aquí o programa completo.

XOVES 12 de SETEMBRO do 2024

 TEMPADA 2024 - 2025    

Comezamos unha nova tempada dándolles a Ben-Vinda a tódolos nosos oíntes e seguidores. Escoitamos a nosa sintonía de sempre e ofrecémoslle unha peza de música popular, interpretada polo Grupo "Son do SIL": "Galicia docemente", para recibir á nosa primeira convidada: MARTA GONZÁLEZ CASAS, da empresa rexentada por ela e mais Xosé David "Olivareiros.es". Mantemos unha pequena conversa-entrevista para coñecer un pouco máis polo miúdo ese traballo tan interesante de recuperar as árbores centenarias dos seus antergos, autóctonas, variedades Brava e Mansa, pero tamén outras de distintas variedades, na localidade de Sequeiros, pertence a Quiroga. Un aceite de grande calidade e moi solicitado. Desexamos que teñan moito éxito na súa tarefa e unha boa colleita.

O seguinte convidado é PEPE FORMOSO, do Hotel Literario Bela Fisterra, que nos fala do grande acontecemento relacionado co tema video-poema musical co que o recibimos: "Un peixe é un peixe, é un peixe", recitado por Marilar Alexandre, no que participa nada menos que Alberto Pombo, poema homenaxe ao poeta fisterrán Alexandre Nerium. Mantemos unha conversa chea de novidades e informacións moi interesantes. Sempre é un pracer conversar con este comunicador que nos ten preparadas noticias e novidades que comparte con todos nosoutros. Prométenos sorprender con grandes acontecementos en vindeiras datas. Agradecémoslle a súa colaboración e desexámoslle moitos éxitos en tódalos seus proxectos.

Despedimos a Pepe, coa música de Treixadura: "Fisterra". E despois escoitamos o Himno del Riego, coma homenaxe ao seguinte convidado: Eduardo Alberto Rodríguez Cunha, máis coñecido por TATÁN CUNHA, que será o representante da súa Compañía, Tanxarina Títeres no Teatro Municipal Matosinhos (Constantino Nery), onde se interpretará a coproducçao do evento galego-portugués: "Territorios da Liberdade", xunto coa Companhia Certa da Varzím Teatro e Centro Dramático Galego. Tamén nos fai partícipes da concesión de "Xograr de Outono" ao actor Avelino González no FIOT de Carballo. Un grande que temos na axenda para entrevistar e felicitar en directo. Despedímolo, escoitando a peza reivindicativa"Uah!"de Suso Vaamonde, desexándolle que acaden moitos éxitos.

A última conversa-entrevista é con EDU CARREIRA, poeta galego, de Castroverde concretamente. Fainos unha presentación do que é o Grupo de escritores e poetas que se denominan "Os Nabos de Gracián", qué o mesmo título que recibe o primeiro libro publicado por eles, no que participan todos. Tamén nos adianta algunhas novidades máis, como a incorporación dalgunha que outra persoa creativa, e non desbotan o ingreso doutras que desexen participar con eles nas súas inquedanzas. Agradecémoslle a súa amable atención e participación. Finaliza coa lectura dun poema do seu pai.

Desexamos que volvan a sintonizarnos o vindeiro xoves á mesma hora. ¡Que teñan unha feliz semana! Deixamos aquí o programa completo.

7 de SETEMBRO do 2024

Benqueridos escoitantes e seguidores, o vindeiro xoves, día 12 comezaremos unha nova andaina, tempada 2024 - 2025. Estaremos, coma sempre dende as catro da tarde ata as seis, emitindo en galego, co ánimo de ofrecervos novidades, entrevistas e música galega de actualidade. Desexamos ofrecervos dúas horiñas de entretenemento e comunicación agradable. ¡CONECTÁDEVOS!

XOVES 20 de XUÑO do 2024

Último programa da tempada 2023-2024. Comeza coa sintonía de sempre, as slutacións oportunas e unha peza para recibir á primeira convidada: CARMEN PENIM. Hoxe non se atopa nos estudios o Xulio, por mor de certas obrigas persoais. Mantén Armando unha conversa-entrevista moi interesante dando a coñecer algunhas novidades relacionadas coa escrita e novas creacións que ten previstas. Actualmente está moi implicada co asunto do último traballo "A fraga de pasacorrendo". Rememora a súa producción musical e comenta unha próxima novidade prevista para o vindeiro Nadal. Despídense desexando que todo decorra con ben.

A segunda intervención é a miña, Xulio Couxil. Estou desplazado ao Balneario de Fitero para aproveitar uns días de desconexión e lecer. Comentamos a realización do acto que programou a nosa Entidade A.C.G.Rosalía de Castro, que consistiu na presentación do libro de dona IOLANDA DÍAZ GALLEGO, que tivo a presentación do Ilmo.Sr.Director Xeral de Política Lingüistica de Galicia, don Valentín García Gómez. O libro leva por título: "Decidín desvelar o proceso". Un traballo con moita documentación relacionada coa emigración galega en Uruguai. A emisión de hoxe convértese na última desta tempada, porque xa non quedan máis días para o noso programa. Desexamos que teñan un feliz verán e desexamos voltar a contar coa  audición que nos dispensaron nesta temporada, a partir do mes de setembro que voltaremos con máis azos e desexos de cumplir cos obxectivos que nos propoñamos.

 

Falamos agora co noso director da revista "Lúa Nova" da A.C.G.Rosalía de Castro de Cornella, e coordinador do Certame de Poesía Rosalía de Castro, ANTONIO DÍAZ. Tamén comenta a presentación do libro de Iolanda Díaz Gallego o pasado sábado. Despídense ate o vindeiro setembro. Fai unha pequena referencia á convocatoria do seguinte Certame de Poesía, nada menso que a trinta e oito convocatoria, e a presentación do próximo libro que reclle os poemas premiados nos cinco últimos Certames, previsto para a celebración do fallo desta convocatoria no mes de novembro próximo.

Escoitamos a entrevista que lle fixemos a José Angel Hevia Velasco,  máis coñecido ccomo HEVIA, que tivemos ocasión de facerlle con motivo da súa participación no "Festa Celta" que organiza e celebra a nosa Asociación o día do Corpus, a "Festa Galega" en Can Mercader, deste 2024. E con ela despedímonos ate o vindeiro mes de setembro que voltaremos con todos vosoutros.

 

Deixamos aquí o programa completo:

¡Que teñan unhas felices vacacións e un feliz verán!

XOVES 13 de XUÑO do 2024

Comezamos coa nosa sintonía, os saúdos a tódolos nosos oíntes e seguidores e unha peciña de música para recibir ao primeiro convidado: PRIMITIVO LAREU, da "Adegas e Viñedos Lareu" na Ribeira Sacra. Os seus caldos (Sabatelius - Mencía) estiveron presentes na celebración da exposición "O tempo que ficou no olvido", no Pazo de Sabadelle o día 8 deste mes de xuño. Este evento que congregou a unha man chea de artistas, poetas e artesans que se uniron para lembrar a aldea e a súa xente. Un colaborador altruista que participou moi activamente nesta mostra que estará activa ata do mesmo día trinta de setembro, no Pazo. Agradecémosllle a súa participación no programa de hoxe.

Mercedes e Primitivo Lareu

A segunda convidada é MERCEDES VÁZQUEZ SAAVEDRA, unha grande fotógrafa galega, que conta cunha grande traxectoria de recoñecementos. O motivo da nosa chamada é para coñecer máis polo miudo, a súa participación nese evento do día 8 no Pazo de Sabadelle, no que ten unha exposición das súas "fotografías de mulleres", proposta etnográfica de mulleres. Estarán alí, naquelas dependencias xunto as esculturas doutros artistas, pintores e escultores, dos que nos comenta a súa aportación. Tamén nos falou do fermoso concerto ofrecido pola cantautora Carolina Rubirosa e da intervención da poeta Olga Novo. Agradecémoslle a súa información detallada e desexamos que siga colleitando moitos éxitos.

Laura

Falamos con LAURA LÓPEZ DRUSETTA, Profesora e escritora, que ven de acadar o Premio de Novela Curta "Antón Risco" 2024, coa súa obra que leva por título: "Todo pasa". Parabenizámola e mantemos unha conversa moi interesante sobre a trama desta novela que ten moito a ver con dúas mozas, segundo nos describe, sin develar o seu contido. O xurado que elixiu este traballo salientou unha trama histórica motivadora que mestura o presente e o pasado con protagonismo dunhas personaxes femininas que defenden o seu. Aldonza de Mendoza (tránsito da idade media á idade moderna) e Carmela (actual) son as protagonistas... Agradecémoslle a súa participación e prometémonos voltar a conversar con ela noutra ocasión, ou cando se presente esa novela xa editada.

Conectamos novamente con Galicia para falar con XOSÉ FIGUEROA LORENZANA, do Pazo de Sabadelle, que foi o encargado de programar ese evento que se realizou nas dependencias dese Pazo, que data do século XII: "O tempo que ficou no olvido", lema que foi extraído dun texto de Antón Avilés de Taramancos, segundo nos comenta el mesmo. Tamén nos fai referencia a distintos momentos destacables do evento, como o desfile de xoias elaboradas pola ourive Susi Gesto e unha xoia específica para a "Virxe do Faro", que lle entregarán ao Concello e que será levada á ermida da Virxe do Faro na Festa que se celebra cada ano. Tamén nos falou da escultura de Tino Canicoba e pinturas de Lomarti e Xoan Guerreiro, xunto coa perfonmance de Elena Salgueiro. Unha noite de cultura e posta en valor do rural galego. Agradecémoslle a súa aportación.

Despois de escoitar outra peza de música poñemonos en contacto con XAVIER PEREIRA, que é un dos tres (Jorge Pereira e Camilo Castiñeiras Boán) responsables da "Adega Terras Mancas", en Soutomanco - Trasalba - Amoeiro (Ourense). Fálanos do seu proxecto de explotación e elaboración de viños brancos moi especialmente Albariño, Godello, Treixadura e Loureira. Veñen de recibir un Baco de Ouro e algún que outro premio máis. Son grandes colaboradores coa "Fundación Vicente Risco" e tamén coa que teñen próxima "Fundación Otero Pedraio". Coméntanos tamén que reciben os consellos e asesoramento dun grande profesional e enólogo de grande prestixio, como é Pablo Estévez. Agradecémoslle a súa participación e desexamos que sigan colleitando moitos éxitos.

Deixamos aquí o programa completo.

XOVES 6 de XUÑO do 2024

Comezamos o programa coa reincorporación do noso compañeiro ARMANDO FERNÁNDEZ. Escoitamos a nosa sintonía, damos a ben-vinda e salutacións e escoitamos unha peza do grande Hevia, para recibir ao primeiro convidado: PABLO NOGUERA CAMPO, mestre e escritor a quen parabenizamos por ter acadado o Premio do "VII Certame de Relato Curto da Irmandade Galega de Rubí". Un trab allo que como el mesmo nos informa, ten moito a ver co emprego de palabras casi esquecidas e moi pouco usadas. Precisamente o título premiado é: "AMOCELO", cuxo significado é "anzol". Fálanos da súa inquedanza e traballo investigador e da posta en valor de moitas palabras moi interesantes que non teñen un uso moi corrente, pero que sí están contempladas no noso dicciónario. Falamos da súa traxectoria escrita e dalgunha publicación máis. Tamén nos comenta o Premio de Poesía da localidade de Cabanas, que ven de acadalo este ano. O anterior xa estivera premiado cun Relato Curto. Desexamos que siga colleitando moitos éxitos.

A seguinte invitada é JOAQUINA UTRERA, periodista e escritora, que ven de publicar o libro:"A GOLPE DE BARRENO", ambientada no Val de Lubián, na fronteira entre Zamora e Ourense. Neste preciso lugar está situada a trama desta publicación. Trátase de recrear, á súa maneira, o grande traballo que fixeron os mineros (tamén chamados carrilanos) e outro empregados non especialistas, como moitos presos que redimían as súas condenas traballando para construir o chamado "Tunel Doce" do camiño de ferro que uniu Zamora con Ourense. A documentación aportada é moi importante e axuda a entender moitas cousas que sucederon naquel período que comezou na Repúbica e rematou a finais dos anos cincuenta. Agradecémoslle a súa atención e desexamos que teña moitos éxitos.

Tratamos de informar un chisco das actividades próximas que se realizarán na nosa A.C.G. Rosalía de Castro de Cornellà, concretamente o día 15 coa convocatoria de votacións para a Xunta Directiva, da presentación do libro de Yolanda Díaz, que terá a participación do Ilmo.Director Xeral de Política Lingüística dn Valentín Garcia. Tamén informamos da próxima celebración da Festa do San Xoan diante da Entidade, convidando aos asistentes a unha copiña de cava e coca. Haberá música en directo.

Conectamos novamente con Galicia, cocretamente con PABLO RODRÍGUEZ FERNÁNDEZ, "VIVIN", que nos fala de don JOSÉ MARÍA ALONSO TRELLES - "El Viejo Pancho", figura ilustre da cidade de Ribadeo. Próximamente presentarase o libro onde se relata a vida e obra deste personaxe ilustre. Seguiremos en contacto par que nos axude a coñecer moitas máis cousas.

A crónica do noso correspondente na capital da Ribeira Sacra, XOSÉ MANUEL FERNÁNDEZ MONTES, serve para saber algo máis da nosa comunidade, cos seus "Me gustan e disgustan", que corresponden as noticias escollidas por el. Desexamos  que teña unha feliz semana.

Deixamos aquí o programa completo.

XOVES 30 de MAIO do 2024

Sentimos moitísimo non poder ofrecerlles o programa deste xoves. A ausencia do noso técnico impediu que puidéramos emitir o programa deste xoves. Tentaremos compensarlles esta omisión cun programa cheo de engado e moitas cousas interesantes na vindeira ocasión.

 ¡Pedímoslles disculpas! 

Desexamos que se conecten o vindeiro xoves á mesma hora: de 4 (catro) a 6 (seis) da tarde. ¡Que teñan unha feliz semana.

XOVES 23 de MAIO do 2024

Unha semana máis con todos vosoutros. Disculpamos a ausencia do noso compañeiro Armando Fernández, que se atopa un pouco delicado e hoxe tentarei levar adiante o programa coa máxima humildade e atención, tentando que poidan disfrutar dunha emisión agradable. Despois da nosa sintonía de sempre e as salutacións oportunas, escoitamos unha peza de música para recibir ao primeiro convidado: RAFA AGUIAR, de Radio Monforte, con quen mantemos unha conversa moi agradable chea de información e novidades moi interesantes relacionadas coa súa emisión radiofónica moi persoal, de proximidade, rural e chea de contidos. Agradecémoslle a súa colaboración e aportación de hoxe.

A segunda intervención é a do enólogo XURXO AMOEDO, propietario do Furancho "O Tarrastal" en Redondela. Fálanos dese establecemento singular situado na rúa do Tarrastal nº 33 na parroquia de Reboreda en Redondela. Ofrece tres clases de viño plurivarietaison tres variedades escepcionais de colleita propia, Albariño fresco, tinto suave e unha mestura clásica moi gustosa. Tamén nos comenta que ultimamente tamén ofrece un clarete que ten moita demanda. A súa teima é poder establecer unha adega propia. Os pratos de degustación son verdadeiras especialidades familiares adubiadas pola escelente cociñeira Luchi. Abrirán o establecemento este mesmo venres próximo, e poderanse degustar os chourizos da casa fritidos, a empanada de millo con xoubiñas, orella galega fritida con alliño, a tortilla cuadrada e algunha novidade e sorpresa seguro que tamén haberá. Desexámoslle que teña moito éxito.

Continuamos a emisión conectando con DON DIONISIO PEREIRA, Historiador, Investigador e Economista, que nos fala da próxima celebración dunha homenaxe ao guerrilleiro antifascista Alfredo Yáñez "O Aguirre", e á comunidade de Sernande (Vinhais-Portugal) e A Gudiña (Ourense), o vindeiro sábado día 25. Queren manter viva a reflexión sobre a resistencia antifranquista e a solidariedade transfronteiriza naquela zona da "Raia Seca", durante un dos períodos máis oscuros da historia recente da península. Proxectarase o documental: "A menina que via homes encadeados", que recolle testemuñas de perto de trescentos presos políticos que realizaron traballos forzados na construcción do camiño de ferro entre Zamora e Ourense, moi concretamente nos túneles do Padornelo e os campos de concentración de Lubián e Requejo. Agradecémoslle a súa participación.

Recibimos agora a don ALBERTE ANSEDE ESTRAVIZ, Profesor, Licenciado en Filosofía e Ciencias da Educación, Presidente da Fundación Manuel María en Outeiro de Rei. Coméntanos as diferentes actividades que están a realizar, presentación de libros, concertos musicais, convocatoria de concursos (o IIIº Concurso Manuel María de composicións musicais), o VII Concurso de videopoemas, o clube de lectura, exposicións, audios, videos... etcétera. Amósanos moi detalladamente a grandísima e extensísima documentación que posúe a Casa-Museo de Manuel María, toda catalogada e que se pode consultar gratuitamente. Libros da biblioteca, cartas escritas por el e cartas recibidas de escritores e grandes personaxes galegos, portugueses e outros. Esta primeira conversa-entrevista coidamos que será o comezo de moitas máis que continuaremos en vindeiras datas para coñecer máis polo miúdo este grande legado de Manuel María. Agradecémoslle a súa amable atención.

Despedímonos ate o vindeiro xoves á mesma hora. Deixamos aquí o programa completo.