XOVES 31 de MARZO do 2022

Último programa do mes de marzo. Dámoslles a ben-vinda a tódolos nosos escoitantes e seguidores. Poñemos unha peciña musical e conectamos con Galicia para falarmos con SONIA MELÓN, unha poeta galega que apreciamos e saudamos cordialmente. Fálanos da próxima publicación dun seu poemario: "Dende a miña Fiestra". Seguro que será terá moita aceptación e moito éxito con el. Tamén nos comenta a celebración de varios eventos que se realizarán no Concello de Ponteareas, na Sala Multiusos. Presentacións de libros de varios escritores, un cada fin de semana do mes de Abril. Agasállanos coa lectura de dous dos seus poemas. Agradecémoslle a súa amable atención e desexámoslle moito éxito.

A segunda convidada é dona LUCÍA FREITAS, CHEF do Restaurante "A TAFONA" en Santiago de Compostela. Parabenizámola porque acaba de recibir o Premio ao CHEF do Futuro: "Prix au Chef de l'Avenir", Premios Academia Internacional de Gastronomía 2022. Un restaurante de alta calidade, con 1 estrela Michelín e 2 soles de Repsol... mantemos unha conversa moi ilustrativa sobre as súas propostas gastronómicas e destaca unha serie de elementos que a converten nun referente nacional como cociñeira galega que ademais ofrece unha creatividade exquisita nos postres. Agradecémoslle a súa participación tan amable no noso programa de hoxe e desexámoslle moitos máis éxitos e moita máis prosperidade.

Saudamos e dámoslle a ben-vida aos estudos ao escritor MARCOS FERNÁNDEZ CALLEJA, que nos ven a agasallar cun libro da súa autoría: "Giráldez. Salvar las circunstancias para poder salvar lo que eres". Marcos é fillo dun home natural de Valeixe e dunha dona de Robledo de Losada. É a historia novelada que narra uns feitos reais e reconstruidos dunha saga familiar. Agradecémoslle a súa estimada aportación cultural ao noso programa de hoxe. Tódolos nosos oíntes e seguidores poden mercar esta novela en Amazon.

 

A continuación conectamos con EDILBERTO RODRÍGUEZ, una pastor-poeta-músico e entroideiro da zona do Bierzo, da Cabrera, concretamente do pobo de Pombriego. Mantemos unha conversa agradable, a pesares das inclemencias do tempo que el mesmo nos indica que está a padecer. Declámanos un bocadiño da súa creatividade poética e prometémonos a voltar a chamalo para dedicarlle máis tempo e que nos fale dos seus escritos e posiblemente o comprometamos para que tamén nos interprete algunha peza musical da zona.

Despedimos ao noso convidado nos estudios, Marcos Fernández e tamén nos despedimos de tódolos nosos oíntes e seguidores ate o vindeiro xoves á mesma hora. Te que teñan unha feliz semana.

A última intervención é a do Presidente da ASOBECAT, Juan Pedro SÁNCHEZ, que nos presenta ao homenaxeado, don DAVID VALCARCE CANEDO, no "XVIII Festival del Botillo 2022" en Cataluña, previsto para o día 2 de ABRIL. Conversamos moi distendidamente con eles. Felicitaremos personalmente a don DAVID, Director na Radio Televisión Española. Agradecémoslles a súa participación.

A vindeira semana máis. Aquí deixamos o programa enteiro.

XOVES 24 de MARZO do 2022

Comezamos un programa máis de "Galegos no BAIX" coa nosa sintonía e a salutacións oportunas de cada semana. Despois de escoitar un bocadiño de música recibimos ao primeiro convidado de hoxe: CARLOS PARDO da Empresa  Alimentaria "VALLELONGO" radicada no Bierzo, concretamente no pobo de Ocero. Mantemos una conversa moi amena, infórmanos dos diferentes produtos elaborados de forma tradicional: Queixo en aceite, Queixo Picante, Queixo negro de vaca, Queixo de Cabra con pera, Pimentón de 1ª calidade (que xa foi premiado e está catalogado como o mellor de España), Estracto de Allo Negro, Vinagre de allo negro con mel, Vinagre de mazá... ... Todo tradicional elaborado con naturalidade. Virán ao "XVIII Festival do Botillo en Cataluña", organizado pola ASOBECAT o próximo día 2 de Abril no Hotel Front Air Congress de Sant Boi. Agradecémoslle a súa atención e desexámoslle moitos éxitos!!

A segunda intervención é a da Profesora, Crítica Literaria e Doutora en Filóloxía Galego-Portuguesa dona TERESA SEARA, con quen mantemos unha pequena conversa-entrevista na que aprendemos un chisco de qué foi e cómo se desenvolveu o "Batallón Literario da Costa da Morte". A Editorial Chan da Pólvora acaba de publicar a Antoloxía do Batallón Literario da Costa da Morte, "Feros Corvos". Foi dona Teresa a que se encargou do estudo introdutorio e da selección de poemas do volume. Tamén lle preguntamos pola súa traxectoria e productividade creativa e escritora. Agradecémoslle a súa amable atención.

A continuación poñémonos en contacto con ANA VILA PROTOMEÑE "Poeta labrega". Felitiámola porque foi elixida para ser pregoeira da "XXX Festa do Caldo de Osos" da localidade de Taboada. Comentamos con ela varias cousas para informar aos nosos oíntes e seguidores e agasállanos coa lectura dun seu poema que leva por título "Sen ACOUGO". Agradecémosllelo e desexamos que siga colleitando moitos éxitos.

Finalizamos o programa de hoxe escoitando a entrevista-conversa coa nosa admirada amiga escritora e poeta EMMA PEDREIRA. Participa nun evento no Concello de Carral, celebrando a 25 edición do Certame de Poesía dese Concello. Despois a presentación de "Os libros que hai en min" da súa propia autoría no Concello de Lalín. Antes de finalizar agasállanos coa lectura dun pequeno texto dun seu libro de narrativa. Agradecémoslle a súa aportación de hoxe...

 

E despedímonos ate o vindeiro xoves á mesma hora. 

¡Que teñan unha feliz semana!

XOVES 17 de MARZO do 2022

Un xoves máis con todos vosoutros para ofrecervos dúas horiñas de Radio en galego. Comezamos coa nosa sintonía de sempre e despois das salutacións de ben-vinda escoitamos un bocadiño de música para conectar con dona ISABEL MOCIÑO GONZÁLEZ, Profesora, Doutora en Filoloxía Galego-Portuguesa, Crítica Literaria e Padroeira da Fundación Vicente Risco. Agradecémoslle a súa participación no programa de hoxe. Infórmanos da próxima celebración dun evento moi interesante precisamente relacionado coa Fundación Vicente Risco en Allariz. Trátase da presentación do 24 Premio Vicente Risco de Ciencias Sociais outorgado a Luisa Alexandra Oliveira Martins, e o XXV Premio Vicente Risco que se lle concedeu a Carlos Quiroga, "A costela galega de Eça de Queiros". Unha conversa distendida e moi ilustrativa.

A seguir conectamos con don Manuel Fernández Conde, de "gourmetgallego.com", en Sober (Lugo). Fainos un percorrido desa oferta on-line de productos galegos "Gourmet" escollidos precisamente para que os seus clientes vexan cumplidos as súas preferencias de productos de grande calidade, de orixe exclusiva galega. Comunícanos unha exclusiva, que posiblemente en próximas datas poderemos disfrutar dunha tenda física en Barcelona, para poder mercar e disfrutar deses productos que se poden atopar na súa páxina. Agradecémoslle a súa amable atención e desexámoslle moitos éxitos.

Tamén falamos con FRAN SIEIRA, Compañía de Danza. Agradecémoslle que nos atenda, porque incomodámolo un chisco xa que está a dar aulas. A compañía está a interpretar unha obra "De mente" que veñen interpretando con moito éxito, tanto é así que están nominados para nada menos que 7 Premios. Infórmanos que virán a Cataluña, concretamente a Olot, o vindeiro día 10 de abril, para unha interpretación especial de trinta minutos, de ruada. Desexámoslle que teñan moitos éxitos.

 

O ultimo convidado é don JUAN PEDRO SÁNCHEZ GARCÍA, Presidente da Asociación de Bercianos en Cataluña (ASOBECAT), que nos informa da Rolda de Prensa informativa do "XVIII Festival del Botillo en Cataluña" prevista para este próximo día 19 ás 18h no Hotel Front Air Congress de Sant Boi. En primicia adiántanos que a celebración desta Festa Berciana por excelencia, será nese mesmo Hotel o día 2 de abril. Coméntanos cales son os homenaxeados deste ano e convídanos a participar. En próximas emisións falaremos máis detidamente deste evento. Desexámoslle moita sorte e moitos éxitos.

E despedímonos ate o vindeiro xoves á mesma hora. Aquí póden escoitar o programa enteiro.

XOVES 10 de MARZO do 2022

José Iglesias

Unha semana máis con todos vosoutros, tentando levar adiante este programa de dúas horas en galego. Comezamos escoitando unha peza do Grupo Musical "Son do SIL" para conectar e darlle a ben-vinda a un dos seus intérpretes solistas: JOSÉ IGLESIAS SEARA, que nos recibe moi amablemente e conversamos con el sobre a súa faceta de intérprete na Agrupación Musical que xa volven a ensaiar con asiduidade. Por mor do coronavirus estiveron un tempo sen poder ensaiar e actuar, pero xa fai dúas semanas que comezaron a ensaiar para próximos compromisos e concertos en vindeiras datas. Agradecémoslle a participación e desexámoslle moitos éxitos.

A segunda intervención é a de Xan Rodiño, grande dinamizador e impulsor dos xogos tradicionais e populares galegos, en concreto da "billarda, a chave, a ra, os bolos..." a maioría deles con Ligas a Nivel Nacional Galego, e que proximamente, a Televisión de Galicia, retransmitirá algunha das competicions que en Galicia se realizan. Desexamos que teñan moito éxito.

Continuamos, na segunda hora cunha nova convidada, nesta ocasión MARTA GONZÁLEZ, colleiteira, xunto co seu marido, dun Aceite de Oliva virxe, na localidade de Quiroga. "O ouro de Quiroga", con árbores autóctonas de Galicia, coas variedades Brava e Mansa. Danos a coñecer a súa páxina Web, por se algún dos nosos oíntes e seguidores queren adquirir os seus productos: hhp://olivareiro.es. Desexamos que sigan acadando moita sorte nesa andaina de traballo, recuperando árbores centenarias e ofrecendo unha producción de aceite de grande calidade, que nos enorgullece a tódolos galegos.

A seguinte entrevista é con Paula Romero, do "Grupo De VACAS", con quen comentamos parte da súa traxectoria musical, que virán ao Teatre Plaza de Castelldefels, o día 18 de marzo ás 20h. Agradecémoslle a súa colaboración de hoxe e desexamos que recollan moitos éxitos nesa actuación prevista en terras catalanas. As súas letras reivindicativas, cheas de feminidade e retranca galega, cunha mensaxe moi suxerente e en galego.

 

Despedímonos de tódolos oíntes e seguidores, desexando que teñan unha feliz semana.

Aquí colgamos o programa completo.

XOVES 3 de MARZO do 2022

Sonia Arias

Comezamos a emisión de hoxe coa nosa sintonía de sempre e despois das salutacións de ben-vinda escoitamos un bocadiño de música pra recibir á primeira convidada de hoxe: SONIA ARIAS LÓPEZ, poeta Luguesa que nos recibe moi  amablemente. Conversamos con ela, falamos da súa creación poética, da súa escrita e precisamente falando do seu traballo agasallanos coa lectura dun seu relato poético moi acaído para os tempos que estamos a padecer agora mesmo (alusivo á guerra). Agradecémoslle a súa aportación de hoxe e prometémonos voltar a conectar con ela.

A segunda intervención é a de ANGEL MACIÑEIRAS, voceiro da Asociación Cultural de Filloa. Falamos con el para comentar a próxima celebración da "XXXIX Festa da Filloa de Lestedo", prevista para o día 6 de marzo. Infórmanos das diferentes actividades previstas para ese día: as camisetas desta Festa, a confección das filloas coa máquina filloeira que teñen (feita artesanalmente por un dos socios desta Entidade), o Pregón da Festa a cargo dun veciño de Boqueixón: don Xosé Manuel Lobato Martínez, que será presentado pola actriz e preentadora María Mera, a actuación das orquestras Olimpus e Finisterre, a participación dos Xenerais do Ulla, como remate do Entrudio e moitas cousas máis. Desexámoslles moitos éxitos.

Manuel Rivero

A continuación falamos co noso amigo MANUEL RIVERO PÉREZ, escritor, Licenciado en Socioloxía, Antropoloxía e Ciencias Políticas e Doutorando en Humanidades... Recibimos unha pequena lección de historia e biografía de Eugenio Montes, outro grande escritor e periodista Limiao, de Bande concretamente. Está a facer un traballo de recopilación e documentación relacionado coa traxectoria de Eugenio, moi pouco coñecida. Agradecémoslle a súa aportación tan interesante.

Juan Luis Estévez

E finalizamos o programa de hoxe coa conversa-entrevista que mantivemos con Juan Luís Estévez, Panadeiro artesán na Panadería-Pastelería Germán de Finisterre. Fainos unha pequena descrición da súa traxectoria chea de Premios con respecto á elaboración tradicional do pan. Felicitámolo e enviámoslle o noso agradecemento pola súa amable atención.

¡Que teñan unha feliz semana! 

Aquí deixamos o programa completo.

XOVES 24 de FEBRERIRO do 2022

Unha nova emisión do "Galegos no BAIX". Esta vez temos que disculpar a ausencia do noso compañeiro ARMANDO FERNÁNDEZ, porque tivo que desplazarse a Galicia a causa dun compromiso persoal. Enviámoslle as nosas condolencias polo triste suceso ao que ten que asistir, e apertas saudosas á familia. Despois da nosa sintonía e os saúdos correspondentes escoitamos un bocadiño de música (a Alborada de Rosalía) e poñémonos en contacto con JORGE MINAS DOMÍNGUEZ COUSO, a quen parabenizamos polo traballo que está realizar para continuar recuperando moitas das tradicións ancestrais do "Entrudio" Vianés e arredores, así como tamén as Comparsas. Agradecémoslle a súa amable atención e desexámoslle que sigan acadando moitos éxitos.

Nesta pequena pausa aproveitamos para dar a coñecer dúas noticias interesantes relacionadas coa Universidade de Barcelona, concretamente dende o Departamento de Galego: Fil Gal Port, relacionadas cunha Conferencia de dona María López Sández, que leva por título: "O tratamento da natureza en Rosalía: a paisaxe como condición simbólica da nación", prevista para hoxe mesmo a partir das 19:30, mediante zoom. Tamén informamos da entrega da Medalla de Honra do Consello da Cultura Galega, para mañá día 25 de febreiro á Profesora Helena González Fernández e a Luís García Montero. Poderase seguir en directo pola canle de youtube:  https://www.youtube.com/channel/UCIeVhIBqppusZgDisCA5b4A. Foi Chus Lama a que nos fixo chegar toda esta información. ¡Grazas!

Despois poñémonos en contacto co noso correspondente na capital da Ribeira Sacra, Xosé Manuel F. Montes, encargado de sección "Quen che Preguntou?" e recibimos a súa crónica semanal coas informacións escolidas e das que nos fai partícipe cos seus "Ghústanme" e "Desghústanme". Nesta ocasión envíanos unha viñeta dedicada ao grande Pedro Brandariz, recentemente falecido, como homenaxe a este grande Actor galego. Enviamos as nosas máis sinceras condolencias á familia.

Seguimos a emisión e falamos coa nosa amiga e colaboradora TAMARA ANDRÉS, escritora e traductora a quen tamén felicitamos polo recente traballo publicado e que se pode descargar e disfrutar del: "Rosalía inspírame". Fálanos da súa investigación no "ramón Piñeiro" de Santiago de Compostela, da súa próxima publicación de creación poética... non pode descubrirnos moito porque está a piques de saír... do Festival da Armadiña, de proxectos, ideas e próximas noticias que seguro poderemos disfrutar. Agradecémoslle a súa amable atención, que sempre está disposta a colaborar connosco e desxámoslle que acade moitos éxitos. ¡Graciñas Tamara! Envíache aloumiños a nosa común amiga Chus Lama.

E a última conversa-entrevista é con NOEMÍ, da "Taberna A Arca da NOE", en Vilar de Santos, con quen falamos das moitas actividades que están a realizar e moi concretamente da edición do Libro-CD que titularán como: "Oceanoe.Travesía polo Mar das Antelas". En vindeiras ocasións falaremos con máis profundidade dese traballo que promete ser moi fermoso e interesante. ¡Moitas grazas e moitos éxitos, NOE!

Así decorrer o noso programa de hoxe. e despedímonos ate o vindeiro xoves.

Tamén deixamos aquí o programa enteiro.

XOVES !7 de FEBREIRO do 2022

Xosé Magalhaes e Lydia Olmo

Unha nova emisión de "Galegos no BAIX". Dúas horiñas da Radio en galego. Comezamos coa nosa sintonía, salutacións de sempre e un pouquiño de música para recibir a XOSÉ MAGALHAES, do Restaurante CEIBE, na Rúa San Miguel, 8 de Ourense. Veñen de ser elixidos para competir como Cociñeiros Revelación do ano 2022 en Madrid Fusión. Felicitámolo e enviámoslle os nosos parabens tamén para a súa compañeira Lydia Olmo. Unha equipa moi ben conxuntada que están a ofrecer unha cociña moderna de tradición moi interesante. Iniciarán tempada mañá mesmo. Agradecémoslle a súa aportación de hoxe e desexámoslles que teñan moitos éxitos.

A segunda intervención é a de DANI de BIDU, que pertence ao Folión da Mourela pra acá, en Manzaneda, que nos fala do Entrudio con todas as celebracións e actos previstos para esta "Grande Festa" que celebran anualmente. Énchenos de información e aprendemos coas súas explicacións en qué consisten as "mázcaras" (recalca e insiste nesa precisión con "z"). Fálanos de cómo se realizan os folións, que hai que pedir permiso, cun verso, para as foliadas nas distintas parroquias, os agasallos con que son recibidos nas diferentes aldeas, as celebracións gastronómicas, o touro e o toureiro recentemente recuperado... leccións para coñecer un chisco esas celebracións tradicionais que se teñen que apreciar máis e mellor, en directo. Grazas, Dani.

Continuamos con outra entrevista-conversa trátase da nosa maiga e admirada cantautora e filóloga María Xosé Silvar "SES". Felicitámola porque fará o seu concerto presentando o último CD "Liberar as arterias", no Barna Sants, o día 27 de febreiro. Despois trasladarase a América para facer unha xira especial por Arxentina, Uruguay, Chile e posiblemente México... Desexámoslle moitos éxitos.

Diego Trillo

Seguimos conectando novamente con Galicia para falarmos con Diego Trillo, do establecemento "Pandejuevo", en CEE (A Coruña). Tamén o felicitamos porque é un dos elexidos para participar na sección de pastelería - docería dentro do Madrid Fusión deste 2022. Agradecémoslle a súa atención. Fálanos dos produtos que ofrecen na súa tenda, das investigacións e traballos no seu obradoiro para ofrecerlle aos clientes: moitas e variadas novidades para disfrutar. Desexámoslle que teñan moitos éxitos.

Tamén damos a coñecer unhs noticias relacionadas coas actividades da A.C.G.Rosalía de Castro de Cornellà

 

E despedímonos ate o vindeiro xoves á mesma hora. 

¡Sexan felices!

Día MUNDIAL da RADIO

Como unha aportación máis a tódalas celebracións que se realizarán no mundo enteiro, queremos facer esta nosa aportación para felicitar a tódolos RADIOFONISTAS do MUNDO coa fermosa e desinteresada participación deste grande Actor galego FEDERICO PÉREZ REY. Desexamos que teñan un fantástico día da RADIO e desexamos que a comunicación siga sendo un fermoso medio para comunicarnos e formarnos.

¡FELIZ DÍA da RADIO!

XOVES 10 de FEBREIRO do 2022

Lucía Pérez - Na miña pel

Comezamos escoitando a nosa sintonía de sempre e saudando a tódolos oíntes e seguidores. Escoitamos un bocadiño de música, concretamente a dun videoclip de Lucía Pérez: Na miña Pel. Precisamente aproveitamos a ocasión para conectar con ela e falar dese traballiño tan fermoso. Coméntanos algunhas cousas da súa traxectoria, da próxima edición dun CD que recollerá esta canción na que seguro incluirá un mínimo de dez pezas. Tamén nos comenta parte dos compromisos que ten previsto realizar, os desexos de poder actuar en Cataluña, concretamente en Barcelona, da próxima visita a Miami, nun acontecemento e celebración moi interesante... ... Agradecémoslle a súa amable atención e desexámoslle moitos éxitos.

Damos a coñecer algunhas informacións. Próxima celebración dunha "Calçotada", concretamente o sábado día 12. Concerto de Guadi Galego o día 13 no "Casinet de Hostafrancs" e outras cousiñas...

A segunda intervención é a do noso correspondente na capital da Ribeira Sacra, Xosé Manuel F. Montes, encargado da sección "Quen che Preguntou". Fainos a súa crónica co seus "Desghústanme" e "Ghústanme", finalizando con algún apunte sacado da súa observación minuciosa, popular e retranqueira.

 

Ledicia Sola

Continuamos, na segunda hora conectando con Ledicia Sola, actriz galega de moito prestixio. Forma parte do elenco de actrices que intervendrán na obra de Teatro "Cigarreras", baixo a Dirección de Cándido Pazó. Estarán no Teatre Romea de BCN, dende o día 22 de febreiro ate o día 6 de marzo. Os espectadores que desexen asistir poden entrar na páxina do Teatro para reservar as entradas, porque teñen un pequeno desconto si as adquiren con tempo, antes da estrea. Unha conversa moi interesante. Agradecémoslle a súa atención e desexámoslle moitos éxitos, a ela e a tódolos compoñentes.

Miguel Anxo Mato

A última conversa-entrevista é con Miguel Anxo Mato Fondo, escritor, poeta e crítico literario nado en Ponteceso. Comentamos con el a súa dedicación á escrita, tanto poética como narrativa. Fálanos da súa última publicación: Sisley no Xuncal da Trave. E agasállanos coa lectura dun dos seus poemas. ¡Moitos éxitos! e ¡Moitas grazas Miguel Anxo!. En vindeiras datas voltaremos a poñernos en contacto para que nos sigas explicando cousas da túa creación literaria.

A vindeira semana máis. ¡Que teñan unha feliz semana!

XOVES 03 de FEBREIRO do 2022

Unha emisión máis deste noso programa tentando comunicarnos con tódolos nosos oíntes e seguidores. Dúas horiñas de radio en galego con música, conversas, entrevistas e informacións diversas. Despois da sintonía do programa (a Danza dos DEDOS, composta polo grande Xiao, cando aínda non tiña os 18 anos, que precisamente cumpriría hoxe). Dámoslle a ben-vinda e conectamos con Galicia para conversar-entrevistar ao Dtr. Gumersindo Rego Fernández. Agradecémoslle a súa aportación de hoxe.

A segunda colaboración é con dona Mari Carmen Sánchez Iravedra, da Empresa "Embutidos artesanos Suarna". Infórmanos da realización o próximo día 27 de febreiro da "31 Festa da Androlla-2022" en Navia de Suarna. Fálanos dos seus produtos e onde se poden adquirir. Desexámoslle moitos éxitos.

Continuamos o programa saudando a Rubén Pérez, enólogo da Adega Ponte da Boga, na Ribeira Sacra. Unha conversa moi interesante e coa que non só coñecemos un pouco máis polo miúdo esta Adega e os seus produtos, senón que tamén aprendemos algo máis dese traballo tan importante que se está a facer relacionado co cultivo das uvas autóctonas desa D.O. Agradecémoslle a súa amable atención e desexámoslle que sigan colleitando moitos máis ouros nas diversas exposicións e mostras ás que acuden. Precisamente mandámoslle os nosos parabens por ter acadado nada menos que 5 Ouros recentemente con diversos viños presentados.

A última conversa-entrevista é con Uxía, unha das máis grandes voces da música tradicional galega, que nos fala da próxima publicación dun CD do Grupo "Malvela" que titularán "O Benquerer". Tamén nos adianta que está a preparar outro CD, seu, que levará por título: "De tu casa a la mía", que próximamente presentará en Santiago de Compostela... Agradecémoslle o tempo que nos dedicou e desexámoslle que siga colleitando moitos éxitos.

E despedímonos ate o vindeiro xoves á mesma hora. 

Aquí vos deixamos o programa completo.

XOVES 27 de XANEIRO do 2022

Comezamos unha nova emisión de "Galegos no BAIX" dándolle a ben-vida aos nosos oíntes e seguidores ofrecéndolles unha peza das "Tanxugueiras", que veñen de ofrecer unha intervención excelente na clasificiación para a Eurovisión, no Festival que se está a realizar en Benidorm Fest. A primeira conversa é con dona Rosalía Morlán que nos fala do seu último traballo "Camelias de amor", que debido á Pandemia aínda non foi presentado. Agradecémoslle a súa amable atención.

A segunda comunicación é con Rosalía Fernández Rial, outra poeta licenciada en Filoloxía e Doutora en Didáctica das linguas e expresión dramática pola Universidade de Santiago de Compostela. Estudou e toca o acordeón, fai teatro e, sobre todo escribe. Agradecémoslle que nos conceda este tempo para entrevistala e coñecer un pouco, máis polo miúdo, parte da súa creatividade e moi concretamente dese "Desnortada" que acaba de publicar en Espiral Mayor. Desexámoslle moitos éxitos.

A sección "Quen che preguntou?" do noso correspondente na capital da Ribeira Sacra, Xosé Manuel F. Montes, coma sempre é unha selección de noticias debulladas mediante os seus "Desghústanme e Ghústanme" que sempre son moi acaidos. Finaliza coa sentencias e recollidas puntuais relacionadas coa fraseoloxía e outras ocurrencias populares e tradicionais.

Continuamos na segunda hora conectando con Aurelio Blanco Trincado, Presidente do Instituto de Estudios Valdeorreses. Fálanos da importancia que ten a elección de Florencio Delgado Gurriarán, algo do que levan traballando dende ese Instituto. Tamén nos comenta moitas máis cousas relacionadas coa fundación dun Museo antropolóxico no Barco de Valdeorras, da gastronomía e dos viños con D.O. Valdeorras.

E finalizamos o programa de hoxe recibindo ao grande Xosé Avelino González Fernández, máis coñecido por "Avelino González". Actor galego, contacontos, narrador, director e tradutor de teatro... Agradecémoslle a súa participación de hoxe no noso humilde programa e fainos partícipes dos proxectos e traballos nos que está inmerso. Desexámoslle moitos éxitos.

Desexamos que volvan a conectar con nosoutros o próximo xoves. Aquí deixamos o programa enteiro.

XOVES 20 de XANEIRO do 2022

Inma López Silva

Unha nova emisión do "Galegos no BAIX" comezando saudándovos e ofrecéndolles un bocadiño de música para conectar coa primeira convidada de hoxe, dona INMA LÓPEZ SILVA, Profesora, escritora, investigadora e crítica de teatro. Felicitámola por ser elexida como Profesora para a "Escola de Letras", organizada pola Deputación de Pontevedra xuntamente coa Editorial Galaxia. Fálanos do obradoiro, de Narrativa que terá cos alumnos inscritos, cuxo cupo xa está esgotado, da súa traxectoria como escritora... A súa conversa é unha lección de aprendizaxe para nosoutros e unha primicia para tódolos nosos oíntes e seguidores. Agradecémoslle a súa amable atención.

 

Continuamos o programa e conectamos co noso correspondente na capital da Ribeira Sacra, Xosé Manuel F. Montes, encargado da sección "Quen che Preguntou? que nos fai a súa crónica semanal cos "Deghústanme" e "Ghústanme" correspondentes. Nesta ocasión tamén nos envía a súa "viñeta" alusiva a un tema que tratamos na audición. ¡Moitas grazas Xosé Manuel!

Sara Inés - Castro Caldelas

Comezamos a segunda hora conectando con dona Sara Inés Vega Núñez, Ilma. Alcaldesa do Concello de Castro Caldelas. Felicitámola pola celebración dos FACHÓS deste ano, con reservas e coas medidas de prudencia recomendadas polas autoridades sanitarias. Unha festa de San Sebastián que data de 271 anos de existencia e que non se puido celebrar completa, como en anos anteriores, xunto coa xoranda gastronómica que a acompaña, pero ese fogo purificador paseóu un fachón de nada menos que 35 metros polas rúas de Castro Caldelas. Desexámoslle que sigan acadando moitos éxitos.

Vacas Jersey en pastoreo

A conversa-entrevista que mantemos para finalizar o programa de hoxe é con Xesús Mazaira Varela da Queixería Airas Moniz, no Lugar de Outeiro - San Salvador de ASMA - Chantada. Felicitámolo polos éxitos que están acadando coa manteiga e os Premios que lle concederon ao queixo SAVEL. Agradecémoslle a súa información detallada e desexamos que sigan acadando grandes éxitos.

O vindeiro xoves, se podemos, moito máis. Que teñan unha feliz semana! Aquí deixamos o programa enteiro.

XOVES 13 de XANEIRO do 2022

Unha emisión máis deste noso programiña convidando ao ademirado poeta da Ribeira Sacra PACO LEDO, que nos recibe moi amablemente e entrevistámolo para que nos conte parte da súa traxectoria creativa. Agasallános coa lectura dun dos seus poemas e despedímolo con música de Xoan Eiriz, que musicou algúns poemas doutro poeta amigo noso, Suso Díaz.

A continuación conectamos co noso correspondente na capital da Ribeira Sacra, Xosé Manuel F. Montes, encargado da sección Quen che Preguntou?, que sempre ten preparada a súa crónica semanal cos seus "Desghústanme e Ghústanme" correspondentes. Finaliza a súa intervención coa lectura das frases e ocurrencias que ten na súa "libretiña pequena". Agradecémoslle a súa colaboración, moi estimada.

A segunda hora comezámola voltando novamente a Galicia para recibir ao cantautor e músico XABIER VIZCAÍNO. Ven de actuar recentemente na Televisón de Galicia xunto con Lucía Pérez, estreando un tema composto precisamente por el. Falamos da súa traxectoria musical dos concertos e doutras cousas de interese para tódolos nosos oíntes.

Despois entrevistamos a Mari Carmen Sánchez Iravedra, de "Embutidos Suarna", que ultimamente ofrecen os seus productos na plataforma "Son de Lugo" aínda que ela mesma nos indica que poñéndose en contacto con Mari Carmen encárgase de enviar os productos solicitados. Felicitámola porque ven de recibir un Premio que lle entregou a Asociación de Empresarios Galegos, a finais do mes de decembro pasado, "Son Emprendedora Rural" ¡Parabens! e a seguir colleitando éxitos.

Finalizamos informando do Concerto que dará o Grupo Caamaño&Ameixeiras mañá mesmo, venres día 14 no Tradicionarius de Gràcia. Tódolos nosos oíntes e seguidores que desexen asistir aínda están a tempo de poder adquirir as entradas para esa fermosa actuación.

E despedímonos ate o vindeiro xoves, á mesma hora. Desexando que teñan unha feliz semana.