XOVES 28 de SETEMBRO do 2023

Unha nova emisión deste noso programiña de dúas horas en galego. Despois da nosa sintonía de sempre e un bocadiño de música dámoslle a ben-vinda a XAN VEIGA, humorista, monologuista, contacontos, presentador... ... etcétera, a quen saudamos e felicitamos porque ten preparada unha actuación especial no FIOT de Carballo para celebrar o seus 30 aniversario da súa traxectoria e faceta humorística coa presentación do seu espectáculo: "Sonchistorias", previsto para o día 29 a partir das 22.30 horas no Bar A Estación. Coméntanos algunhas cousas da súa faceta e adiántanos tamén a celebración doutras actuacións que ten contratadas. Agradecémoslle a súa amable atención e desexámoslle moita sorte e moitos éxitos.

Conectamos agora con XABIER DÍAZ, a quen tamén felicitamos e parabenizámolo polo intenso traballo que ven desenvolvendo ultimamente. Teremos a honra de poder disfrutalo e escoitalo a partir das 20:30h en directo, o vindeiro venres día 6 de outubro no Centre Artesá Tradicionarius de Gracia (CAT), xunto coas Adufeiras de Salitre. Denantes  impartirá unha master-clas de pandeireta para todos aqueles que se inscriban na web do Tradicionarius. Promete que será unha actuación memorable que ademais contará con algunha sorpresa para tódolos asistentes. Desexamos que teña moita sorte e augurámoslles moitos éxitos.

Continuamos a emisión e poñémonos en contacto con FRAN AMIL, un músico compositor e clásico compoñente doutros grupos musicais, que estará na representación e actuación prevista para o venres 29, sábado 30 e domingo 1 de outubro na Festa dos Barrios de Montealto, na Coruña. Coméntanos parte da súa traxectoria profisional, do traballo publicado "Popsia", da proposta infantil e de grande repercusión mediática "Chuches AMIL"... ... Desexamos que siga colleitando moitos éxitos.

Mesón Catro Ventos

A última intervención é a de OVIDIO MÉNDEZ, do "Mesón Catro Ventos", en Barbeitos - A Fonsagrada. Xa falaramos noutras ocasións con el, pero hoxe aproveitamos para que nos comente a inauguración dos Apartamentos que ten a disposición de tódolos clientes que o desexen. Tamén nos comenta parte das ofertas gastronómicas que se poden degustar no seu establecemento, basadas nos produtos de 1ª calidade e moi particularmente a carne procedente da súa explotación gandeira propia, e os produtos da súa horta e outros produtos de quilómetro cero, que ofrece aos seus clientes. Tamén se poden degustar outros pratos de peixe, como o polbo á feira e á brasa con ameixas e boletus e moi especialmente o bacallau e a merluza de pincho. A súa satisfacción é poder atender con eficacia aos moitos clientes que se achegan ao Mesón. Desexamos que siga tendo moita sorte e moitos éxitos.

Despedímonos ate o vindeiro xoves á mesma hora. Colgamos aquí o programa completo.

XOVES 21 de SETEMBRO do 2023

Unha emisión máis deste noso programiña de dúas horasa en galego. Comezamos coa sintonía e as salutacións de sempre, para escoitar un bocadiño de música e poñémonos en contacto con MERCHI ÁLVAREZ FERNÁNDEZ, Presidenta de GALICIAME, que nos fala das diferentes actividades desenvolvidas no verán e da próxima "Gala-Xantar" prevista para o día dous de decembro próximo, no que terán a participación de artistas, escritores, músicos e moitas participacións desinteresadas para recoller unha cantidade respetable de fondos que destinarán a axudar á investigación e outros proxectos moi importantes para as persoas que padecen esa enfermidade "Atrofia Muscular Espinar". Como cada ano terán un embaixador de renome a nivel nacional (como Antonio Resines) e aínda que o modelo de realización será diferente doutras galas, sí que contará coa presencia de Belén Xestal e en nome das nosas emisión radiofónicas queren contar coa participación do noso Armando Fernández. Agardamos poder participar, si a saúde o permite. Desexámoslles moita sorte e moitos éxitos.

A segunda participación é a de SUSANA FERNÁNDEZ, inxeñeira de prestixio, pero desexamos a súa participación para que nos fale da AAVV de GROU, porque na ultima conversa que mantivemos falonos da proposta de rehabilitación do "Clube" que tiñan. Fálanos da inauguración exitosa a principios deste mesmo ano, do concerto firmado para a utilización durante 25 anos, do feiticeiro e fermoso que lles quedou este establecemento, da posta en marcha da bilbioteca, das instalacións con ordenadores e ténicas modernas, dos socios e participantes... Todo un logro que acadaron grazas ao esforzo dos veciños e persoas que desinteresadamente prticiparon para conseguilo. Estes mesmos son os que participan e celebran as diferentes actividades e festas que realizan. Pódese comprobar cómo son esas dependencias e algunhas das súas actividades na páxina "Grou eco-avanza". Dámoslle os nosos parabens e agradecémoslle a súa participación no programa de hoxe, desexando que sigan mantendo esas inquedanzas e ánimos para seguir adiante.

 

Recibimos agora ao noso correspondente na capital da Ribeira Sacra (Monforte de Lemos) XOSÉ MANUEL F. MONTES, encargado da sección QUEN CHE PREGUNTOU? coa que nos fai chegar as novas escollidas a modo de Ghústanme e Desghústanme, e finaliza cos seus apuntes e anotacións da "libretiña pequena" na que recolle algunhas frases e outra ocurrencias moi retranqueiras.

Finalizamos o programa de hoxe conectando novamente con Galicia, concretamente Navia de Suarna, onde se atopa dona MARI CARMEN FERNÁNDEZ, Chef do "Café-Bar Xegunde" pero tamén cociñeira específica da Cooperativa "A Carqueixa" coa que colabora e traballa para ofrecer os seus pratos pre-cociñados que están para "quentar e degustar", como eles mesmos anuncian na súa páxina "osabordosancares.com", como son: Caldo galego, Callos con garavanzos, Tenreira con salsa de figos e Xarrete con castañas. Felicitámola por teren recibido o 2º Premio que lle concedeu o Ministerio de Agricultura pola Innovación das  Mulleres Rurais, que recollerán no mes de novembro. Agradecémoslle a súa participación e desexamos que sigan colleitando moitos éxitos.

Deixamos aquí o programa completo.

14 de SETEMBRO DO 2023 - 1º Programa desta tempada 2023 - 2024

Comezamos esta nova tempada coa nosa sintonía de sempre. Dámoslle a ben-vinda e deseguida escoitamos un tema interpretado por DANI PARDO, un cantante galego, concretamente de Baralla que a continuación entrevistamos. Fainos unha pequena semblanza da súa traxectoria como intérprete e dos seus anceios e desexos que continuar cantando e traballando para dar a coñecer a súa proposta creativa e interpretativa. Está traballando para poder publicar un primeiro CD coas súas cancións. Agradecémoslle a súa participación e despedímolo precisamente cunha das súas interpretacións musicais moi coñecidas, que el mesmo nos explica que está dedicada ao seu pobo e máis concretamente á súa aldea.

Oscar, MariCarmen e Manuel

Continuamos o programa e poñémonos en contacto con Galicia, novamente para falar con MANUEL LAMELA, o irmán do noso grande, querido e admirado colaborador Xosé Lamela. Agradecémoslle a súa participación e felicitámolo polo traballo e dedicación que lle puxeron para homenaxear a figura de seu irmán Xosé. O día 14 de agosto pasado moitos veciños, amigos e coñecidos de Xosé, xuntámonos en Padrendo para depositar unhas frores na lápida onde está soterrado, colocouse unha placa conmemorativa na súa casa natal en Padrendo, fixemos un acto moi emotivo na capela da Virxe do Xurés, que finalizou coa interpretación do Himno á Virxe a cargo da nosa benquerida CARMEN PENIM e compartimos un xantar de convivio no Hotel-Balneario Caldaria de Lobios. Actos emotivos e cheos de engado que se repetirán o vindeiro ano 2024 na mesma data do 14 de agosto para plantar unha oliveira ou un castiñeiro en memoria de Xosé, precisamente no adro da capela do Xurés. Tamén nos comentou que posiblemente se publique algún libro que recolla algunhas das investigacións, traballos e documentacións que tiña bastante adiantados antes do seu pasamento. Estaremos atentos e seguiremos en contacto con Manuel Lamela.

Recibimos a colaboración do noso correspondente en Monforte de Lemos, XOSÉ MANUEL F. MONTES, encargado da sección Quen che Preguntou? Sorpréndenos cunha nova definición que nomea como  "Nin me Ghusta nin me disghusta".  Innovando e aportando a súa creatividade na información e colaboración desinteresada. Agradecémoslle a súa dedicación.

 

Entrevistamos agora ao escultor TOÑO MONTEIRO, que foi o escultor que confeccionou a placa que está colocada na casa natal de Xosé Lamela en Padrendo. Infórmanos de cómo esculpiu a capela da Virxe do Xurés que ten un fondo inox para que cando lle dea a luz se convirta nun espello reflexando a silueta con todo o seu explendor. Tamén nos comenta algunhas das súas obras escultóricas que están espalladas polo Parque Internacional Gerés-Xurés, pola Baixa Limia, en Portugal e noutras localidades. Agradecémoslle a súa aportación no noso programa de hoxe.

Aquí deixamos o programa enteiro. Desexamos que teñan unha feliz semana. Ate o vindeiro xoves, á mesma hora. Sexan felices!

Venres 14 de XULLO do 2023

Entrevista no Programa "Dies de Ràdio" de Mónica Santacreu, en Ràdio Sant Boi, hoxe mesmo, falando con Henrique Sanfiz Raposo, de "Radiofusión" "RADIO FENE", na provincia da Coruña. Foi un honor e unha honra poder participar e facer de "ponte cultural" entre Galicia e Cataluña, mediante a pequena conversa.entrevista que nos concederon. Parabens a Henrique e tamén a Mónica polo convite. Deixamos aquí o audio da conversa que mantivemos, xunto cunhas fotos de lembranza. ¡Moitas Grazas!

XOVES 29 de XUÑO do 2023

Comezamos este último programa da tempada 2022-2023, coa nosa sintonía de sempre e despois das salutacións oportunas escoitamos unha peza musical para recibir ao primeiro convidado, EULOXIO FERNÁNDEZ, dramaturgo e director cineasta, a quen recibimos dándolle as nosas felicitacións por ter acadado o 1º Premio do Certame Literario de Relato Curto da Irmandade Galega de Rubí. Sabemos un pouco máis da súa traxectoria escrita e creativa. Tamén nos conta unha pequena anécdota doutro premio en Madrid. Desexámoslle moitos éxitos.

A segunda intervención é a do PABLO GONZÁLEZ, da ADEGA EDV 2015.SLU que ven de recibir unha serie de Premios en sendos Certames e Concursos de viño moi importantes. Concretamente nada menos que sete Premios para os seus viños godello e mencía.  Poden visitar a súa páxina web  https://bodegaedv.com/, para ampliar esta información e tamén para poder comprobar os Premios que recibiron en sendos Concursos aos que ten asistido. Desexamos que sigan colleitando moitos máis éxitos.

Continuamos a nosa emisión conectando co noso correspondente na capital da Ribeira Sacra, Xosé Manuel F. Montes, que nos aporta a súa crónica-sección QUEN CHE PREGUNTOU? cos "Desghústalle" e "Ghústalle". Son informacións acompañadas de certa aportación retranqueira. Desexámoslle que teña unha vacación de verán moi feiticeiras e mándanos a súa viñeta que fan referencia a unha das noticias e comentarios tratados no programa de hoxe.

A última intervención no programa é con IRENE SILVA XIRÁLDEZ, pintora galega que se define como aldeana, que recrea e aporta unha visión moi especial da muller galega nas súas pinturas. Fálanos dunha súa escultura que escolleu a Deputación de Pontevedra para Premios  "Hai unha voz". Parabenizámola e desexamos que siga colleitando moitos éxitos.

Despedímonos ate o vindeiro mes de setembro. Deixamos aquí o programa completo.

XOVES, 22 de XUÑO do 2023

Unha semaniña máis con todos vosoutros, tentando levar adiante este programiña de dúas horas en galego. Comezamos coa nosa sintonía, escoitamos un bocadiño de música e a continuación conectamos con Galicia para falar con PEPE FORMOSO, do Hotel Literario "Bela Fisterra". Unha conversa que encetamos felicitando a Pepe polas moitas actividades e éxito que está acadando ultimamente. Exposicións e charlas no Hotel, Celebración do 11 Aniversario do Albergue "Bela Muxía", Presentación do libro de Modesto Fraga sobre a obra de Ramón Marcote, da presencia e participación de Suso de Toro no seu Hotel, Recibe o Certificado de "Hotel Xusto e laboralmente Responsable"... ... unha conversa moi amena e chea de informacións. Desexamos que siga colleitando moitos éxitos.

A continuación falamos con don MARIO GARCÍA GÓMEZ, Diputado no Parlament de Catalunya. Licenciado en Filosofía e Ciencia da Educación pola Universidade de BCN. Graduado en Ciencias Políticas e da Administración pola UNED,  Máster en Comunicación e liderazgo político pola Universidade de BCN... ... Agradecémoslle a súa participación de hoxe e dámoslle os nosos parabens por ser elixido "Xuíz Honorario do Couto Mixto". Entregaráselle este cometido o vindeiro día un de xullo, xunto con outras dúas personalidades de relevancia, como son Fernando Venancio (autor do libro "Assim Nasceu uma lingua", elexido pola trascendencia do seu estudo na reivindicación da lingua galega como eixo fundamental do idioma portugués)  e dona Angeles Huerta González (Directora de Cine, doutora en literatura comparada, elexida pola súa película "O Corpo Aberto", que recrea unha trama ambientada na fronteira galego-portuguesa, nos pobos de Tourem e Pitoes).

 

Despois conectamos co noso amigo e colaborador HENRIQUE FDEZ-MON SÁNCHEZ, que dende Vigo nos aporta algunhas novidades interesates, relacionadas coa cultura e algunha que outra presentación de libros, como de Santiago Ferragud, en Redondela, que leva por título "Todo Chega desde o mar". Tamén nos fala do Concerto ao que asistiu, de Paco Ibáñez, que foi presentado e acompañado polo noso admirado poeta Antonio García Teijeiro. Moitas actividades culturais e cheas de engado.

 

Finalmente conectamos novamente con Galicia para achegarnos a Santa Marta de Ortigueira, para falar con FANI PÉREZ YÁÑEZ, Vicepresidenta da "Escola de Gaitas de Ortigueira". Conversamos con ela e aproveitamos para coñecer un bocadiño máis desa grande Escola de Gaitas, que admiramos e que estivo precismante na nosa "Festa Galega de Can Mercader" o pasado fin de semana. Fálanos algo dos seus inicios das moitasa actuacións e concertos nos que participaron, do "Festival Internacional do Mundo Celta, en Sant Marta de Ortigueira"... Premios recibidos... Agradecémoslle a súa amable atención e desexámoslles que teñan moito éxito no Festival deste ano e moita sorte.

Despedímonos ate o vindeiro xoves. Deixamos aquí o programa completo.

XOVES 15 de XUÑO do 2023

Unha emision máis con todos vosoutros. Comezamos coa sintonía e salutacións de sempre. Escoitamos unha peza "de estrena" que nos agasallou o "Grupo AILÁ" a fin de semana pasada, para darlle a benvida a dona PILAR ANSEDE, Presidenta do Centro Galego de Barcelona. Conversamos con ela e recibimos cumprida información das cousas que están a realizar no Centro. Seguiremos en contacto.

O segundo convidado é RAFAEL LEMA MOUZO, escritor e Licenciado en Ciencias Ambientais. Fálanos dun seu libro "Costa da Morte. Un País de sueños y naufragios". Tamén se extende na súa explicación sobre a Ruta dos Faros e moitas máis cousas relacionadas con esa zona da Costa da Morte. Agradecémoslle a súa aportación de hoxe.

Continúa o programa conectando novamente con Galicia para falar con CHEMA ÁLVAREZ, un grande defensor do Rural Galego, tamén é apicultor e coordina a "Festa da Gaita en Cancelada" que se celebra tódolos anos no mes de agosto. Desexámoslle moitos éxitos.

Finalmente falamos Armando e un servidor (Couxil) telefónicamente, xa que estou desprazado ao Balneario de Fitero para realizar unha pequena "cura de saúde" aproveitando a augas medicinais que alí se atopan.

Despedímonos ate o vindeiro xoves á mesma hora. ¡Que teñan unha feliz semana! e deixamos aquí o programa completo.

XOVES 8 de XUÑO do 2023

Outra entrega deste programa que pretende entreter e dar a coñecer as "nosas cousas". Comezamos coa nosa sintonía de sempre e despois das salutacións e un bocadiño de música, poñémonos en contacto con dona MARICARMEN FERNÁNDEZ, Cociñeira do Restaurante

Café-Bar XEGUNDE, en Navia de Suarna, que é a persoa que se encarga de preparar e cociñar os pratos preparados que se comercializan grazas á "tenda" osabodosancares.com, pertencente á Cooperativa "A Carqueixa". Coméntanos a grande demanda que están a ter e a elaboración tan delicada e especializada deses pratos pre-cociñados: O Caldo galego, o Xarrete con castañas, a Ternera con salsa de Figos, Callos con grabanzos... ... pratos que tamén se poden degustar no seu propio establecemento. Agradecémoslle a súa participación de hoxe.

A continuación poñémonos en contacto co Ilmo.Sr.Alcalde de Ribadumia, don DAVID J. CASTRO, que nos atende moi amablemente, e mantemos unha conversa-entrevista chea de informacións moi interesantes. Parabenizámolo polo exitazo acadado na "50 Festa do Viño Tinto do Salnés e Exaltación das Variedades Autóctonas". Tamén pola celebración que terán esta fin de semana do Campeonato Copa de Rexión da UEFA. Fálanos de diferentes celebracións, o nomeamento dos Valedores do Viño de Barrantes, a presentación e cata de 115 viños e 35 variedades, a Ruta da Pedra e da Auga, o Xacemento do Monte do Castro, a Festa do Pan no mes de agosto... Unha honra para o noso programa poder conversar con David. Desexamos que siga colleitando moitos éxitos.

Charlamos con OLIVER FERNÁNDEZ, Presidente da nosa Asociación C.G.Rosalía de Castro de Cornellà. Agradecémoslle a súa participación no programa de hoxe. Infórmanos da realizaicón e grande celebración da "Festa Galega de Cornellà" que se celebrará esta fin de semana próxima no Parque de Can Mercader. Unha fermosa ocasión para disfrutar desta "Romería Galega" acompañada de diversos actos nos que haberá música tradicional coa que se inaugura a Festa, o propio día 9, venres, coa participación das "Rosalieiras" (Pandereteiras e cantoras da Asociación), xunto co "Grupo AILÀ", de Galicia, que veñen de recibir o Premio da Música Tradicional no "Martín Codax". O sábado terán, pola mañá o ofrenda floral no busto de Rosalía de Castro, intervención de diversos Grupos Galegos e colaboradores. Pola noite verbena a cargo da Orquestra Costa Dorada e do Grupo Gin Toni's, intercalados co Folión de Fogos de Artificio. O domingo novamente intervención e actuacións de Grupos Tradicionais Galegos e colaboradores, xunto coa Banda da Asociación e verbena coa Orquestra Costa Dorada e remate con queimada para tódolos asistentes.

Recibimos a MIRIAM REYES, unha poeta traductora e editora galega, a quen felicitamos polas recentes actuacións e participacións en diversos actos poéticos moi interesantes, como o "Rosalía en Camiño Diálogos literarios multilingües 2023". Realizáronse en Galicia: O día 1 en Padrón -na Casa de Rosalía-, o día 2 en Santiago de Compostela -no Museo do Pobo-, o día 3 en Lugo -no Vello Cárcere- Estivo acompañada de outros autores e poetas, Xuan Bello, Sara Plaza, Luís López Alonso, Antía Otero, Jesús Castro Yáñez... Tamén nos falou dos seus traballos recentemente publicados, da traducción dos seus poemas ao ruso, a cargo de Nikolay Eremin. Unha traxectoria chea de novidades e grandes eventos. Agradecémoslle a participación de hoxe e desexámoslle que siga colleitando moitos éxitos.

Despedimos o programa e desexamos que volvan a sintonizarnos eo vindeiro xoves á mesma hora. Que pasen unha feliz semana.

Desixamos aquí o programa completo:

 

1 de XUÑO do 2023

Comezamos coa nosa sintonía de sempre e despois das obrigadas salutacións, escoitamos un bocadiño de música para recibir ao primeiro convidado de hoxe, ALBERTO MONTES, do Grupo Musical GIN TONI'S, que virá a amenizar a verbena que ofrecerán o próximo día 9 de xuño na "Festa Galega de Can Mercader", organizada pola Asociación C.G.Rosalía de Castro de Cornellà. Agradecémoslle a súa participación no programa de hoxe e desexamos que teñan moitoa sorte.

A continuación conectamos co noso correspondente na capital da Ribeira Sacra (Monforte de Lemos) XOSÉ MANUEL F. MONTES, que sempre ten preparada a súa colaboración na sección QUEN CHE PREGUNTOU? cos seus Me Ghustan e Desghústanme, que representan unha escolla das noticias máis relevantes da semana, acompañadas da entrega especial que recolle na súa "libretiña pequena" e despois envíanos a "viñeta" que fai referencia a algún momento da emisión. A de hoxe é unha representación dunha anécdota que nos contou en directo ¡Moitas Grazas, Xosé Manuel!

Despois conectamos novamente con Galicia, para falar con Alberto Cancela, compoñente da Orquestra COSTA DORADA, que virán á "Festa Galega de Can Mercader", os días 10 e 11 de xuño, para amenizar as verbenas verbenas cos seus concertos. Cóntanos algunhas das actuacións-concertos que teñen apalabrados para este mes de xuño, máis de dez, entre os que se encontra precisamente este de Cornellà e moi especialmente o que realizarán en directo na Televisión de Galicia este mesmo venres día 2 de xuño, no espectáculo do LUAR. Desexámoslles moitos éxitos.

Falamos con ROMÁN SÁNCHEZ BESTEIRO, Xerente da Cooperativa "A Carqueixa". Agradecémoslle a súa amable atención. Comezaron ofrecendo os produtos relacionados coa explotación gandeira, e moi concretamente a carne de vaca e tenreira de calidade. Precisamente polo seu traballo e dedicación teñen recoñecido o Certificado de "Tenreira Galega de Benestar Animal". Tamén teñen recibido o Premio Aresa 2021 e Agader 2021 de Desenvolvemento Rural. O traballo e a dedicación especializada fan que estes cooperativista ofrezan ademais outros produtos moi valorados e demandados, como comida elaborada: Caldo galego, xarrete con castañas, callos con garabanzos e tenreira con salsa de figos. UEspecialidades que se pode demandar na súa páxina: osabordosancares.com. Foi un placer conversar con Román e enviámoslle os nosos mellores desexos de benestar e sorte nesa laboura rural tan importante.

Antes de despedirnos voltamos a informar da "Festa Galega de Can Mercader" e convidámolos a que se acheguen a disfrutar deste grande acontecemento que cada ano programa a Asociación C.G. Rosalía de Castro de Cornellà. Desexamos que teñan unha feliz semana.

Colocamos aquí o programa completo. E voltamos a informarlles que este programiña noso volve a reemitirse mañá venres en Radio FENE, ás 15h.

XOVES 25 de MAIO do 2023

Xiana Lastra

Unha nova emisión deste noso programiña en língua galega. Comezamos coa sintonía e salutacións de rigor e ofrecémoslle unha peza de música: "Lingua perversa", interpretada polo Grupo Musical Galego "A Banda da Loba", para poñernos en contacto con XIANA LASTRA PERNAS, que pertence a esta formación musical. Saudámola e parabenizámola por este video-clip recentemente estrenado. Coméntanos a súa elaboración e fálanos dos concertos que xa teñen firmados para este mes de xuño próximo e tamén doas súas creacións discográficas, xa levan publicados 3 CDs: Bailando as rúas no 2017, Fábrica de Luz no 2019, Hasme oir no 2021 e Xabón Lagarta este pasado ano 2022. Teñen previsto actuar en Ourense (o día 26) esta fin de semana e tamén en Tabeirós (A Estrada, o día 27). Desexámoslle moita sorte e moitos éxitos.

A continuación conectamos con XOAN CARLOS PASTOR, técnico químico ambiental, que xunto coa súa compañeira ZAIRA, están montando un proxecto de cosmética natural (pielnatura.com) e xa se estableceron na localidade galega de San Xoan de Río. Apostan polo Rural e ofrecen unha proposta de atención moi interesante para a saúde, como é a cosmética natural sólida e o compromiso de mellorar o aspecto e a saúde das persoas. Empregan produtos naturais e queren ofrecer unha atención personalizada e chea de novidades moi interesantes. Seguro que terán moita sorte.

 

Fran Fernández Davila

A segunda hora comezámola chamando a FRAN FERNÁNDEZ DAVILA, inxeñeiro escritor e poeta de Nigrán, a quen felicitamos por ter acadado o "VIII Premio de Novela Curta Antón Risco 2023", pola súa novela que leva por título: "Primavera. A camareira, o cuarto e o libro de poemas". Adiántanos un chisco de qué vai esta súa creación, que ten moito que ver coa lírica. E falando de lírica tamén o felicitamos porque acaba de gañar o IX Certame de Poesía Rosalía de Castro, de Padrón, polo seu poemario: "Kompostela". Tivemos un pequeno atranco técnico (desconectouse a chamada) pero seguimo conversando con Fran e recibindo a súa aportación no programa de hoxe. Desexamos que siga acadando moitos éxitos e despedímonos ata unha vindeira ocasión.

Despois falamos con dona ELISA GUERRA, da Panadería Guerra e Vilariño de Conso. Agradecémoslle a súa atención e centrámonos e preguntarlle cales son os produtos que comercializa, pan, empanadas e doces de grande calidade, e moi particularmente as bicas de Vilariño, a Bica de Castañas (con fariña de castaña, da zona, claro) e o xa famoso "Montonico", un postre-doce moi delicado e moi aprezado na zona, que comercializa e ten moitas encargas grazas a "Delicias do Támega.es" e tamén "De.aldea". Desexámoslle moitos éxitos e moita sorte na súa andaina emprendedora e familiar.

Aproveitamos para publicar o cartel da "Festa Galega en Can Mercader" organizado pola A.C.G.Rosalía de Castro de Cornellà, con motivo da "Festa Major" da vila, e na que destacamos a celebración da noite celta co Grupo galego "Ailá" e as nosas "Rosalieiras" para o venres día 9. O sábado día 10, a ofrenda de frores diante do busto de Rosalía no propio Parque. As actuacións das diferentes Asociacións Galegas e colaboradoras. A verbena coa Orquestra "Costa Dorada" de Lugo e os Gin Toni's de Sober; no intermedio folión con Fogos Artificiais. O domingo contiúan as actuación e antes de finalizar coa degustación dunha queimada, novamente verbena coa Orquestra "Costa Dorada".

 

Deixamos aquí o programa completo. Que teñan unha feliz semana.

XOVES 17 de MAIO do 2023

Comezamos unha nova emisión de dúas horas en galego ofrecéndolles unha pequena intervención musical para conectar co noso primeiro convidado, ANTONIO GARCÍA TEIJEIRO, poeta e escritor galego a quen saudamos moi cordialmente e parabenizámolo pola súa asistencia a "Feira Internacional do Libro do Bogotá" FILbo, na que estivo presente durante varios días. Tamán o felicitamos pola participación no día de onte, "Letras Galegas 2023", no Corte Inglés de Vigo, xunto con Pedro Feijoo, Malores Villanueva, Manuel Bragado, Manuel Esteban, Beatriz de Cea, Pati Blanco, Elba Pedrosa e Andrea López. Mantemos unha conversa moi amena e infórmanos da recente publicación dun seu poemario: "O poder da fraxilidade". Agasállanos coa lectura de dous poemas da súa autoría, que el mesmo nos recita. Agradecémoslle a súa amable atención e desexamos que teña moita sorte e moitos éxitos.

Continuamos a emisión conectando con JUAN CARLOS CAMBAS, Pianista, arreglista e Productor arxentino ubicado en Galica, concretamente en Vilagarcía. Felicitámolo polo seu CD "VIAXE". Fálanos da súa creación das múltiples participacións e colaboracións de moitos músicos galegos, arxentinos, portugueses, españois, vascos... Un extraordinario traballo que se pode adquiri poñéndose en contacto con el na súa páxina, no seu instagram... etcétera. En vindeiras datas prometémoslle ofrecer algunhas das pezas musicais contidas neste traballo tan cuidado e que lle levou tanto tempo ()máis de dez anos) poñelo a disposición do público. Agradecémoslle a súa aportación no programa de hoxe e seguiremos informando da súa creatividade e proxectos.

 

A seguinte participación é a do noso correspondente na capital da Ribeira Sacra, Monforte de Lemos, XOSÉ MANUEL F. MONTES, encargado da sección QUEN CHE PREGUNTOU?, que cos seus "Desghúsnme e Ghústanme" vai debullando as noticias e informacións que el mesmo escolle para tódolos nosos oíntes e seguidores. Non faltan as súas anotacións da "libretiña pequena" coas que finaliza a súa intervención. E compartimos aquí, con todos vosoutros a "viñeta" que hoxe está dedicada ao homenaxeado nas "Letras Galegas 2023" don Francisco Fernández del Riego. ¡Moitas grazas Xosé Manuel!

Entrevistamos agora a dona NAZARET LÓPEZ, periodista e escritora, a quen felicitamos polo seu último libor publicado: "Pecados Veniais". Fálanos desa súa novela editada por Xerais, que está tendo unhas boas críticas. Comentamos con ela a participación e colaboración que nos envióu o noso colaborador en Pontevedra Luís Losada, que nos fai querer e desexar ler o seu libro. Coméntanos que esta dedicación escritora xa lle ven de moi nova, e aínda que tan só ten publicadas dúas novelas, sempre estivo moi relacionada coa escrita e tamén co teatro. Está traballando para poder publicar o vindeiro ano. Desexámoslle moita sorte e moitos éxitos na súa andaina creativa.

Despedímonos ate o vindeiro xoves e deixamos aquí o programa completo.

XOVES 11 de MAIO do 2023

Unha nova emisión deste noso programiña de dúas horas en língua galega. Comezamos, coma sempre coa nosa sintonía e as salutacións oportunas para ofrecerlles un bocadiño de música antes de conectar coa primeira convidada, dona MARÍA XOSÉ NÓVOA RODRÍGUEZ, Directora Técnica/Xerente da Asociación Saúde Mental A Mariña. Mantemos unha conversa-entrevista moi esclarecedora e chea de informacións relacionadas con esta Asociación sen ánimo de lucro, que se fundou no ano 1999. Teñen unha grande e extensa profesionalidade. Os traballadores actuais, segundo nos informa Mª Xosé, son máis de 15, aos que se suman un número importante de voluntarios. A atención aos usuarios é moi diversa, polo que atenden a persoas xóvenes ata maiores de sesenta e cinco anos. Teñen recibido varios premios e condecoracións. A súa asistencia está moi relacionada coa atención psicolóxica, atención social e atención laboral. Tamén editan unha revista, "Agarimo", onde recollen a maior parte de actividades que realizan. Agradecémoslle a súa amable atención e desexámoslles que teñan moita sorte.

A segunda intervención é a de MARC REGUEIRA GRAÑA, membro activo e Profesor de música na "Asociación C.G. AGARIMOS de Badalona". Esta fin de semana, concretamente os días 13 e 14 deste mes de maio, celebrarán o "25 Aniversario da Entidade" cunha Festa extraordinaria coa participación doutras Asociacións, así como o Grupo Musical "Caamaño&Ameixeiras" e a Orquestra JAQUE. Aproveitarán esta ocasión para facerlle unha homenaxe ao grande poeta e maestro que foi Xesús Galán, socio e maestro gaiteiro da Entidade. Convida a tódolos nosos oíntes e seguidores que se acheguen a disfrutar desta Festa, na que poderán disfrutar de música, baile e degustación de productos gastronómicos galegos de grande calidade. As actuacións faranse na Plaça Trafalgar.

 

Conectamos con don ANTONIO, Presidente da "Asociación Irmandade Galega O NOSO LAR de Terrassa", que tamén teñen previsto realizar a Festa Galega do "41 Aniversario da Entidade". Os actos serán na Praza Lluis Companys, os días 12, 13 e 14 deste mes de maio. As actuacións previstas atópanse nun Programa de Actos que teñen publicado na súa páxina de facebook, e tamén nun cartel anunciador nas Redes Sociais. A destacar a actuación dos artistas Raperos: Moe Lee, Sandro el Critiko, Pelo8 e CRZ, así como tamén o Grupo Titánic e a Orquestra Klam. Tamén contarán coa actuación do Grupo Folkclórico Galego da Irmandade Galega de Rubí e Rosi Ugal coas súas Sevillanas. Unha fin de semana para disfrutar.

Recibimos a participación e colaboración do noso amigo e colaborador HENRIQUE FDEZ-MON SÁNCHEZ. Fainos un perocrrido e diserta sobre o "toque especial" daqueles gaiteiros de antigo, que tiñan un xeito especial de interpretar as melodías galegas. Eran, e aínda se pode escoitar e admirar algún gaiteiro destes, persoas que facían disfrutar desas melodías cunha interpretación moi de seu. Tiñan "alma", non recibiran ningún tipo de escola musical nin académica, pero a súa forma de tocar e as gaitas empregadas eran moi persoais e particulares. As súas interpretacións ían acompañadas quizais doutro gaiteiro, facendo un duo, e da percusión imprescindible así como tamén dalgún outro instrumento, como o clarinete. Quixo deixar moi claro que esas actuacións non tiñan ren a ver, sin desmerecer para nada, coas bandas actuais de gaiteiros que son outra forma de tocar moi diferente. Agradecémoslle a súa aportación de hoxe. E despedímonos ate o vindeiro xoves á mesma hora.

Deixamos aquí o programa completo.

XOVES 4 de MAIO do 2023

Manoel Carrete

Unha emisión máis que encetamos coa nosa sintonía e as salutacións de sempre, para escoitar un bocadiño de música e recibirmos ao primeiro convidado de hoxe, MANOEL CARRETE, avogado e historiador. Saudámolo e parabenizámolo pola exposición e mostra sobre o arcebispo Benjamín de Arriba y Castro, de quen se cumple o seu cincoenta aniversario do seu pasamento. Manoel é o comisario desta exposición que se fixo en Becerreá e que agora se atopa no Centro Galego de Tarragona. Tamén está previsto que esta mostra se expoña en diversos Concellos de Galicia e moi concretamente en Castro Caldelas e Trives no mes de agosto próximo. Está convidado a impartir unha Conferencia no Salón de Cróniques do Concello de Barcelona, o día 13 deste mes de maio, ás seis do serán. O título da Conferencia: "Don Francisco Fernández del Riego e a emigración", organizada pola Federación de Entidades Galegas de Cataluña. Agradecémoslle a súa participación no noso programa de hoxe e desexámoslle moitos éxitos.

Xulio Pardo de Neyra

O seguinte convidado é don XULIO PARDO DE NEYRA, filólogo, historiador, escritor e ensaíasta galego, q ue recibimos e saudamos despois de escoitar outro bocadiño de música. Fálanos da súa ultima obra de narrativa, a novela que leva por título: "A monxa e o grumete". Ten previsto presentala en diversas datas e lugares emblemáticos de Galicia, Lugo, Coruña, Pontevedra e posiblemente en Portugal, Braga e Vila Nova de Cerveira. Tamén nos comenta que está inmerso na investigación xenealóxica da súa familia que ten moito que ver coa artesanía dos ferreiros. Desexámoslle que teña moita sorte e moitos éxitos.

Paula Carballeira

A continuación poñémonos en contacto con PAULA CARBALLEIRA CABANA, a quen saudamos cordialmente e felcitámola por ter recibido o "Premio Follas novas na categoría de Teatro". Tamén a felicitamos por ter asistido ao convite que lle realizaron dende Tenerife para participar no LEILIJ, "Salón del Libro Infantil.Juvenil y Album de Canarias". Hoxe mesmo atópase en San Joan d'Alacant, participando no "Xª Xornades d'animació a la Lectura". Mantemos unha conversa moi agradable. Agradecémoslle a súa amable atención e desexámoslle moitos éxitos e moita sorte.

Celia Pereira Porto

Entrevistamos agora a dona CELIA PEREIRA PORTO, avogada e Presidenta da FUNDACIÓN VICENTE RISCO, en Allariz. Tamén a felicitamos polas actividades e propostas culturais que están a realizar con motivo do "60 cabo de ano do pasamento de Vicente Risco". Fálanos do primeiro acto no "Liceo de Ourense", do "RISCO-FEST", do concerto de Nanán na Taberna A Arca da Noe, dos obradoiros "Risco de cores", do Recital poético Uhuhú, nos xardins da Fundación con grandes poetas e coa participación musical dun grande pianista, do Conta contos de Risco, do saúdo a Risco no cemiterio e dos actos de conmemoración que se celebrarán no Castelo de Castro Caldelas mañá mesmo, co Concerto de Cardo Roxo. Enviámoslle as nosas felicitacións e desexámoslle unha fermosa andaina cultural e moitos éxitos.

Voltamos a informar que este noso programa reemitirase mañá venres ás 15h en RADIO FENE. Colocamos aquí o noso programa completo.